អ.ស.ប ៖ រុស្ស៊ីនៅតែបន្តបិទផ្លូវជំនួយសង្រ្គោះទៅប្រជាជនរងផលប៉ះពាល់ដោយទឹកជំនន់បាក់ទំនប់វារីអគ្គិសនី
អ.ស.ប៖ អង្គការសហប្រជាជាតិ(អ.ស.ប) បានចោទប្រកាន់រុស្ស៊ីកាលពីថ្ងៃអាទិត្យថា នៅតែបន្តបិទផ្លូវជំនួយមនុស្សធម៌ទៅកាន់ប្រជាជនដែលរស់នៅតំបន់រងផលប៉ះពាល់ពីទឹកជំនន់បាក់ទំនប់វារីអគ្គិសនី កាខូវកា ក្នុងភាគខាងកើតនៃតំបន់ឃើរសុនរបស់អ៊ុយក្រែន ដែលស្ថិតក្រោមការគ្រប់គ្រងរបស់កងទ័ពរុស្ស៊ី។
ទំនប់វារីអគ្គិសនី កាខូវកា ត្រូវបានគេបំផ្ទុះកាលពីថ្ងៃទី៦ ខែមិថុនា ដែលធ្វើឱ្យទឹកជនលិចនៅតំបន់ខាងក្រោមទំនប់ ដោយបង្ខំឱ្យមានការជម្លៀសខ្លួនប្រជាជនរាប់ពាន់នាក់ ហើយបង្កជាការភ័យខ្លាចចំពោះគ្រោះមហន្តរាយបរិស្ថាន ខណៈអ៊ុយក្រែន និងរុស្ស៊ីចោទប្រកាន់គ្នាទៅវិញទៅមកពីការបំផ្លិចបំផ្លាញ។
អ្នកសម្របសម្រួលផ្នែកមនុស្សធម៌របស់អ.ស.ប ប្រចាំប្រទេសអ៊ុយក្រែន លោកស្រី ដេនីស ប្រោន(Denise Brown) បាននិយាយនៅក្នុងសេចក្តីថ្លែងការណ៍កាលពីថ្ងៃអាទិត្យថា ៖ «រហូតមកដល់ពេលនេះ រដ្ឋាភិបាលនៃសហព័ន្ធរុស្ស៊ីបានបដិសេធសំណើរបស់យើងក្នុងការចូលទៅកាន់តំបន់[អ៊ុយក្រែន]ដែលស្ថិតនៅក្រោមការគ្រប់គ្រងយោធាបណ្តោះអាសន្នរបស់ខ្លួន»។
លោកស្រី ប្រោន បាននិយាយថា ៖ «អ.ស.បនឹងបន្តធ្វើការឱ្យអស់ពីសមត្ថភាព ដើម្បីជួយប្រជាជនទាំងអស់ រួមទាំងអ្នករងទុក្ខដោយសារការបំផ្លិចបំផ្លាញទំនប់នាពេលថ្មីៗនេះ ដែលត្រូវការជំនួយសង្គ្រោះជីវិតជាបន្ទាន់ មិនថាពួកគេនៅទីណាក៏ដោយ»។លោកស្រីបានបន្ថែមថា ៖ «យើងជំរុញឱ្យអាជ្ញាធររុស្ស៊ី ធ្វើសកម្មភាពស្របតាមកាតព្វកិច្ចរបស់ខ្លួន ក្រោមច្បាប់មនុស្សធម៌អន្តរជាតិ»។
កាលពីថ្ងៃសៅរ៍ ក្រុមមន្ត្រីនៅក្នុងតំបន់កាន់កាប់ដោយរុស្ស៊ី បានប្រកាសថាចំនួនអ្នកស្លាប់ដោយសារការបាក់ទំនប់នៅខាងខ្លួន បានកើនឡើងដល់ ២៩ នាក់ ខណៈដែលទីក្រុងកៀវ បាននិយាយថា ចំនួនអ្នកស្លាប់នៅខាងខ្លួនវិញ បានកើនឡើងដល់ ១៦ នាក់ ហើយ ៣១ នាក់នៅតែបាត់ខ្លួន៕
ដោយ៖ហួន ឌីណា ប្រភព៖ UN says Russia still blocking aid to dam breach victims https://www.channelnewsasia.com/world/un-says-russia-still-blocking-aid-dam-breach-victims-3571156
