ប៉មចម្រោះទឹកស្អាត និងម៉ាស៊ីនអនាម័យ ត្រូវបានដាក់ឱ្យប្រើប្រាស់នៅវិទ្យាល័យ ហ៊ុន សែន ក្រវ៉ា
កំពង់ធំ៖ ក្រសួងទេសចរណ៍ បានសម្ពោធដាក់ឱ្យប្រើប្រាស់ប៉មចម្រោះទឹកស្អាត និងម៉ាស៊ីនអនាម័យ នៅវិទ្យាល័យ ហ៊ុន សែន ក្រវ៉ា ដើម្បីផ្តល់ទឹកស្អាតសម្រាប់សិស្សទទួលទានសម្រាប់ធ្វើឱ្យសុខភាពរបស់ពួកគាត់កាន់តែរឹងមាំ។
ក្រសួងទេសចរណ៍ បានឱ្យដឹងនៅថ្ងៃទី១៩ ខែមិថុនានេះថា ប៉មចម្រោះទឹកស្អាត Aqua Tower និងម៉ាស៊ីនអនាម័យ Aqua San បានសម្ពោធដាក់ឲ្យប្រើប្រាស់នៅទីតាំងស្ថិតក្នុងវិទ្យាល័យ ហ៊ុន សែន ក្រវ៉ា នៅស្រុកបារាយណ៍ ខេត្តកំពង់ធំ ក្រោមអធិបតីភាពឯកឧត្តម ថោង ខុន រដ្ឋមន្រ្តីក្រសួងទេសចរណ៍។
![](https://asset.ams.com.kh/central/media/2023/06/photo_2023-06-19_19-28-32-1024x682.jpg)
តាមរយៈក្រសួង ទេសចរណ៍ លោក Arup Sinha Roy នាយកផ្នែកហិរញ្ញវត្ថុនៃក្រុមហ៊ុន Cambodia Beverage Co., Ltd បានថ្លែងថា ប៉មចម្រោះទឹកស្អាតនេះ ជាប៉មទី២ហើយ សម្រាប់ខេត្តកំពង់ធំ។ លោក បាន លើកឡើងថា Aqua Tower គឺជាប្រព័ន្ធចម្រោះទឹកស្អាតដែលបង្កើតឡើងដោយមូលនិធិ Planet Water ដែលមានបច្ចេកវិទ្យាកម្ចាត់ភ្នាក់ងារបង្កជំងឺនានា និងសារធាតុកខ្វក់ផ្សេងទៀត ដោយផ្តល់ទឹកស្អាតសម្រាប់ពិសារដោយឥតគិតថ្លៃសម្រាប់សហគមន៍ខ្វះខាតទឹកស្អាតប្រើប្រាស់ វាមានសមត្ថភាពផលិតទឹកបាន ១ ០០០លីត្រ ក្នុងមួយម៉ោង។
![](https://asset.ams.com.kh/central/media/2023/06/photo_2023-06-19_19-28-37-1024x682.jpg)
បន្ថែមពីលើប៉មចម្រោះទឹកស្អាត Aqua Tower នេះ លោកថា ក្រុមហ៊ុនក៏ផ្តល់ជូនសាលានូវម៉ាស៊ីនអនាម័យលាងសម្អាតបន្ទប់ទឹក Aqua San ផងដែរ។
លោកមានប្រសាសន៍ថា ៖ «គម្រោងនេះគឺជាជំនួយឧបត្ថម្ភពីមូលនិធិកូកា-កូឡា ក្រៅពីប៉មចម្រោះទឹក និងម៉ាស៊ីនអនាម័យនេះ ក្រុមហ៊ុនក៏នឹងផ្តល់ជូនកែវទឹកចំនួន ៨០០ ដល់សិស្សានុសិស្ស ធុងបែងចែកសំរា មចំនួន៥ឈុតដល់សាលា ដើម្បីជាចំណែកចូលរួមក្នុងកិច្ចប្រឹងប្រែងលើការងារ ពិភពលោកគ្មានសំរាម និងការចូលរួមគ្រប់គ្រងទឹកប្រកបដោយចីរភាព»។
![](https://asset.ams.com.kh/central/media/2023/06/photo_2023-06-19_19-28-31-1024x682.jpg)
នាឱកាសនោះ ឯកឧត្តម ថោង ខុន បានស្នើឱ្យលោកគ្រូ អ្នកគ្រូ និងសិស្សានុសិស្សទាំងអស់ចូលរួមថែរក្សា ការពារ និងគ្រប់គ្រងប៉មចម្រោះទឹកស្អាតនេះ ឲ្យនៅគង់វង្ស និងប្រើប្រាស់បានយូរអង្វែង និងចូលរួមថែរក្សាអនាម័យ បរិស្ថាន និងគ្រប់គ្រងសំរាមនៅក្នុងបរិវេណសាលារៀនឲ្យបានល្អ និងបន្តអប់រំ ណែនាំ និងបង្ហាត់បង្រៀនសិស្សឲ្យក្លាយជាសិស្សល្អ សិស្សពូកែ សិស្សគំរូផងដែរ។
ឯកឧត្តមមានប្រសាសន៍ ថា ៖ «យើង សុំ ឱ្យមូលនិធិ Planet Water និងក្រុមហ៊ុន Coca Cola បន្តជួយឧបត្ថម្ភផ្តល់អំណោយប៉ោមចម្រោះទឹកស្អាតនេះ ទៅដល់វិទ្យាល័យ និងអនុវិទ្យាល័យជាច្រើនទៀតនៅក្នុងស្រុកបារាយណ៍ផងដែរ»។
ជុំវិញរឿងនេះ លោក តាន់ ប៊ុនហុង ប្រធានមន្ទីរអប់រំ យុវជន និងកីឡា ខេត្តកំពង់ធំ បានប្រាប់ ឱ្យដឹងនៅថ្ងៃទី ១៩ ខែមិថុនាថា នៅទូទាំងខេត្តកំពង់ធំ មានអង្គការដៃគូជាច្រើន បានជួយគាំទ្រ និងផ្ដល់ប៉មចម្រោះទឹកស្អាតសម្រាប់ឱ្យសិស្សានុសិស្ស រួមមន្ត្រីអប់រំ បានប្រើប្រាស់ទាំងនៅក្នុងសាលាតាមជនបទ និងទាំងសាលានៅតាមទីប្រជុំជនផងដែរ។
![](https://asset.ams.com.kh/central/media/2023/06/photo_2023-06-19_19-28-35-682x1024.jpg)
ទាក់ទងនឹងចំនួនដែលទទួល បាន ប៉មចម្រោះទឹកស្អាតនេះ លោក តាន់ ប៊ុនហុង មិនទាន់អាចបញ្ជាក់បាន នៅឡើយទេ ប៉ុន្តែជាគោលបំណងរបស់អាជ្ញាធរខេត្ត និងអង្គការដៃគូ ដែលផ្ដល់ជំនួយ គឺត្រូវតែធ្វើយ៉ាងណាឱ្យសាលាទូទាំងខេត្តកំពង់ធំទាំងអស់មិនថានៅតាមជនបទ និងនៅតាមទីប្រជុំជននោះទេ មានប៉មច ម្រោះទឹកស្អាត មានបង្គន់អនាម័យ និងព្រមទាំងមានកន្លែងសម្អាតដៃសម្រាប់ឱ្យសិស្សានុសិស្សបានប្រើប្រា ស់ជាដើម។
លោក តាន់ ប៊ុនហុង បញ្ជាក់ថា៖ « ការមានប៉មចម្រោះទឹកស្អាតនៅក្នុងសាលា គឺវាមានសារៈសំខាន់ខ្លាំងណា ស់ ពីព្រោះសុខភាពយើង ព្រោះ កាលណាយើងមានទឹកស្អាតប្រើប្រាស់ វាអាចកាត់បន្ថយជំងឺផ្សេងៗ និងបង្កើនឱ្យសុខភាពយើងល្អ ជាពិសេសធ្វើឱ្យបញ្ញាយើងលូតលាស់ ទើបធ្វើឱ្យការរៀនសូត្រយើងល្អ»។
លោកបន្ថែមថា អាជ្ញាធរខេត្ត នឹងបន្តជម្រុញឱ្យភាគីពាក់ព័ន្ធជួយគាំទ្រ និងពន្លឿការផ្ដល់ប៉មចម្រោះទឹកស្អាតនៅតាមសាលាទូទាំងខេត្តកំពង់ធំ ដើម្បីរួមចំណែកធ្វើឱ្យសាលារៀនកាន់តែមានសុវត្ថិភាពសម្រាប់សុខភាពសិស្សានុសិស្ស៕ ដោយ៖ ជា សុខនី