កង់បេរ៉ា៖ នៅព្រឹកថ្ងៃ​ព្រហស្បតិ៍ទី ២២ ខែមិថុនានេះ និយតករ​អ៊ីនធឺណិត​អូស្ត្រាលី​ម្នាក់​ ​បាន​និយាយ​ថា​ខ្លួន​បាន​ទាមទារ​ឱ្យ ធ្វីតធ័រ(Twitter) ធ្វើការពន្យល់​អំពីដំណោះស្រាយពាក់ព័ន្ធនឹងការវាយប្រហារតាម​អ៊ីនធឺណិត ដោយសារតែ បណ្តាញសសង្គមមួយនេះ បានក្លាយជាមុខព្រួញនៃការ​ត្អូញត្អែរបំផុត​ ចាប់តាំងពីម្ចាស់ថ្មី មហាសេដ្ឋី អេឡុន ម៉ាស់(Elon Musk) បានដកបម្រាមលើគណនីចំនួន ៦២ ០០០គណនី។

ការទាមទារនេះបង្កើតឡើង តាមរយៈយុទ្ធនាការមួយដោយស្នងការ eSafety ដើម្បី ឱ្យបណ្តាញសង្គមនេះ ​មានទំនួលខុសត្រូវខ្ពស់ក្រោយលោក Musk ដែលជាមហសេដ្ឋីទី១ របស់ពិភពលោកនាពេលបច្ចុប្បន្ននេះ​​បានទិញ​យកក្នុងតម្លៃ ៤៤ ពាន់លានដុល្លារអាមេរិក  កាលពីខែតុលា ឆ្នាំ ២០២២ ដោយភ្ជាប់ជាមួយនឹងពាក្យ​សន្យាថា​នឹងស្ដារឡើង​វិញនូវសិទ្ធិក្នុងការបញ្ចេញមតិដោយសេរី។

និយតករ eSafety បានអំពាវនាវ ឱ្យ Twitter លម្អិតអំពីដំណោះស្រាយចំពោះ ការរំលោភ​បំពានតាមអ៊ីនធឺណិត​លើកុមារ ដែលវាកើតឡើង ចាប់តាំងពីការកាន់កាប់របស់លោក Musk រួមទាំងការបាត់បង់ឱកាស​ការងារជាបន្តបន្ទាប់ និងតួនាទីសម្របសម្រួលមាតិកាផងដែរ។

ស្នងការអូស្ត្រាលីលោកស្រី Julie Inman Grant បាននិយាយថា ខ្លួនបានផ្ញើសេចក្តី​ជូនដំណឹងផ្លូវច្បាប់ទៅកាន់ Twitter ដើម្បីទាមទារការពន្យល់មួយ បន្ទាប់ពីមួ​យ​ភាគបីនៃពាក្យ​បណ្តឹងដែលខ្លួនទទួលបានគឺការប្រមាថ ឬវាយប្រហារតាមអ៊ីនធឺណិតទាក់ទងនឹង Twitter បើទោះបីជាវេទិកាបណ្តាញសង្គមមួយ​នេះមានអ្នកប្រើប្រាស់​តិចជាង TikTok ឬ Facebook និង Instagram របស់ក្រុមហ៊ុន Meta ក៏ដោយ។

លោកស្រី Inman Grant បាននិយាយនៅក្នុងសេចក្តីថ្លែងការណ៍មួយថា៖ «Twitter ហាក់ដូចជា​បានទម្លាក់​កូនបាល់លើដំណើរការនៃការដោះស្រាយភាពបញ្ហា»។
ការថ្លែងដូច្នេះ កើតឡើងក្រោយការកត់សម្គាល់ឃើញថា ​វេទិកានេះត្រូវបាន​ អនុញ្ញាត្តឱ្យគណនីដែលធ្លាប់ហាមឃាត់ចំនួន ៦២ ០០០ ដំណើរការឡើងវិញចាប់តាំងពីការកាន់កាប់របស់លោក Elon Musk មក។

លោកស្រីសង្កត់ធ្ងន់ថា៖ «យើងត្រូវការការទទួលខុសត្រូវចំពោះបណ្តាញសង្គម ហើយសកម្មភាព​ទាំងនេះ ដើម្បីការពារអ្នកប្រើប្រាស់។ អ្នកមិនអាចទទួលខុសដោយគ្មានតម្លាភាពដូច្នេះទេ»។

Twitter ត្រូវតែឆ្លើយតបទៅស្នងការ eSafety ក្នុងរយៈពេល ២៨ ថ្ងៃ ឬប្រឈមនឹងការផាកពិន័យជិត ៧០០០០០ដុល្លារអូស្ត្រាលីក្នុងមួយថ្ងៃ។

ចំណែក Twitter បានបដិសេធមិនធ្វើ​អត្ថាធិប្បាយអ្វីនោះទេនៅពេលសារព័ត៌មានរ៉យទ័រទាក់ទងទៅ។

គួរជម្រាបដែរថា ការទាមទារនេះកើតឡើងចំពេលដែលប្រទេសអូស្ត្រាលីខិតជិតដល់ការបោះឆ្នោត

ប្រជាមតិ​នៅឆ្នាំនេះ ស្តីពីការទទួលស្គាល់ជនជាតិដើមភាគតិចនៅក្នុងរដ្ឋធម្មនុញ្ញ ដែលវាជំរុញ​ឱ្យមានការជជែកវែកញែក​កាន់តែខ្លាំងឡើង​អំពីបញ្ហាពូជសាសន៍។

ស្នងការខាងលើនេះបានកត់សម្គាល់ទៀតថា ពិធីករទូរទស្សន៍ជនជាតិដើមភាគតិចដ៏ល្បីល្បាញលោក Stan Grant ក៏បានលើកឡើងពីការរំលោភបំពានលើ Twitter ពេលដែលគាត់បានប្រកាស​ពីការផ្អាកប្រើប្រាស់​កម្មវិធីបណ្តាញ​សង្គម​​កាលពីខែមុន។

ពិធីករទូរទស្សន៍ជនជាតិដើមភាគតិចនេះ បានបញ្ជាក់កាលពីខែមុនថា ខ្លួនក៏នឹងផ្អាកប្រើប្រាស់ Twitter ដែរ ដោយសារតែការរើសអើងជាតិសាសន៍ និងការមាក់ងាយដែល​ខ្លួនជួបប្រទះ​ជារៀងរាល់ថ្ងៃនៅលើវេទិកា ឬបណ្តាញសង្គមនេះ៕

ដោយ៖ ស្រ៊ុន សិរីវឌ្ឍនៈ

ប្រភព៖ Australia says Twitter is top platform for online hate, demands explanation