ការប្រយុទ្ធប្រឆាំងនឹងព័ត៌មានមិនពិត សម្រាប់អ្នកសារព័ត៌មានដំណាក់កាលទី២ ត្រូវបានធ្វើឡើងនៅខេត្ត ឆ្នេរសមុទ្រ
ព្រះសីហនុ៖ ក្រសួងព័ត៌មាន និងស្ថាប័នពាក់ព័ន្ធ បានរៀបចំសិក្ខាសាលាស្តីពី «ការប្រយុទ្ធប្រឆាំងនឹងព័ត៌មានមិនពិត សម្រាប់អ្នកសារព័ត៌មានដំណាក់កាលទី២» នៅខេត្តព្រះសីហនុ ក្នុងគោលបំណងដើម្បីផ្តល់ដល់មន្ត្រីទទួលបន្ទុកព័ត៌មាន និងអ្នកសារព័ត៌មាននូវការយល់ដឹងបន្ថែម ស្តីពីបញ្ហាប្រឈម និងការងារចូលរួមប្រយុទ្ធប្រឆាំងនឹងព័ត៌មានមិនពិត។
នេះជាការថ្លែងឡើងរបស់ឯកឧត្តម ខៀវ កាញារីទ្ធ រដ្ឋមន្រ្តីក្រសួងព័ត៌មាន ក្នុងសិក្ខាសាលានេះដែលប្រារព្ធឡើងចាប់ពីថ្ងៃទី២២-២៣ ខែមិថុនា ឆ្នាំ២០២៣ ដោយមានការចូលរួមពីមន្រ្តីក្រសួងព័ត៌មាន មន្ត្រីមន្ទីរព័ត៌មានរាជធានី-ខេត្ត ទាំង២៥ អ្នកសារព័ត៌មាន និងមន្ត្រីទទួលបន្ទុកព័ត៌មាន នៃប្រទេសបណ្តាប្រទេសមេគង្គ-ឡានឆាង និងភាគីពាក់ព័ន្ធ សរុបចំនួន ២៧០ រូប។
ឯកឧត្តមមានប្រសាសន៍ថា សិក្ខាសាលានេះ ធ្វើឡើងដើម្បីផ្តល់ជូនមន្ត្រីទទួលបន្ទុកព័ត៌មាន និងអ្នកសារព័ត៌មាននូវការយល់ដឹងបន្ថែមពីបញ្ហាប្រឈម និងការងារចូលរួមប្រយុទ្ធប្រឆាំងនឹងព័ត៌មានមិនពិត ក៏ដូចជាការទទួលបានបទពិសោធន៍ថ្មីៗ ដើម្បីជាពុទ្ធិផង និងជាធាតុចូលផង ក្នុងការបំពេញលើការងារជំនាញក្នុងវិស័យព័ត៌មាន និងការកសាងលិខិតបទដ្ឋានគតិយុត្តពាក់ព័ន្ធចាំបាច់ ដើម្បីប្រយុទ្ធប្រឆាំង ព័ត៌មានមិនពិត ឬដំណឹងក្លែងក្លាយ។
ក្នុងសិក្ខាសាលានេះ ក៏មានការធ្វើបទបង្ហាញស្តីពី អក្ខរកម្មព័ត៌មាន និងប្រព័ន្ធផ្សព្វផ្សាយ ក្នុងបរិបទនៃសម័យឌីជីថល,ការងារផ្ទៀងផ្ទាត់ព័ត៌មាន,ការបង្កើតបរិយាកាសសុវត្ថិភាពលើបណ្តាញផ្សព្វផ្សាយព័ត៌មានសង្គម ដែលធ្វើបទបង្ហាញដោយវាគ្មិនជាតិ និងអន្តរជាតិផងដែរ។
ឯកឧត្តមរដ្ឋមន្រ្តីក្រសួងព័ត៌មានបានបន្ថែមថា ការប្រយុទ្ធប្រឆាំងនឹងព័ត៌មានមិនពិត ឬដំណឹងក្លែងក្លាយ គឺជានិន្នាការសកល ដែលបណ្តារដ្ឋនៅលើសកលលោក បាននិងកំពុងយកចិត្តទុកដាក់ខ្ពស់ ពិសេស ការ
បង្កើតយន្តការដោះស្រាយ និងការរិះរកមធ្យោបាយល្អៗ ដោយបូកបញ្ចូលទាំងបច្ចេកទេស បច្ចេកវិទ្យា និងការចូលរួមពីគ្រប់ភាគី រាប់ទាំងប្រជាពលរដ្ឋ ដើម្បីទប់ស្កាត់បញ្ហានេះឱ្យមានប្រសិទ្ធភាព។
នាឱកាសនោះដែរ លោក ឡុង ឌីម៉ង់ អភិបាលរងខេត្តព្រះសីហនុ បានលើកឡើងដែរថា ជាការពិត ការប្រយុទ្ធប្រឆំាងនឹងព័ត៌មានមិនពិតជាកិច្ចការដែលមានសារៈសំខាន់ ហើយត្រូវដើរទន្ទឹមគ្នានឹងការរួមគ្នាផ្សព្វផ្សាយព័ត៌មានមិនពិត និងវឌ្ឍនភាពឆ្ពោះទៅមុខនៃការអភិវឌ្ឍសង្គម សេដ្ឋកិច្ច និងនយោបាយ។
លោកបានបញ្ជាក់ថាខេត្តព្រះសីហនុនាពេលកន្លងមក ត្រូវបានរងនូវភាពអយុត្តិធម៌តាមរយៈការផ្សព្វផ្សាយនូវព័ត៌មានមិនពិតក្នុងរូបភាពផ្សេងៗជាច្រើន ដែលគ្មានមូលដ្ឋានពិតប្រាកដ ជាព័ត៌មានប្រឌិត ចចាមអារ៉ាមប៉ះពាល់ដល់កេរ្តិ៍ឈ្មោះ និងភាពទាក់ទាញរបស់ខេត្តនេះក្នុងចំណោមសាធារណជន ធុរជន វិនិយោគិន និងទេសចរជាតិ និងអន្តរជាតិ។
លោក ឡុង ឌីម៉ង់ ក៏បានបញ្ជាក់ដែរថា អ្នកសារព័ត៌មានជាតិ និងអន្តរជាតិ ពិតជាតួអង្គយ៉ាងសំខាន់ និងមិនអាចខ្វះបានដែលអាចកំណត់ពីប្រភពនៃព័ត៌មានថាពិត ឬមិនពិត និងអាចចូលរួមចំណែកឆ្លើយតប ទប់ស្កាត់ការរីករាលដាលនៃព័ត៌មានមិនពិតទាំងនោះ ដែលនាំឱ្យប៉ះពាល់ដល់មុខមាត់ និងផលប្រយោជនរបស់ខេត្តទាំងមូល។
ឯកឧត្តម សុក ស៊ីផាន់ណា ទីប្រឹក្សាជាន់ខ្ពស់រាជរដ្ឋាភិបាល ក៏បានលើកឡើងដែរថា សិក្ខាសាលានេះ នឹងផ្តល់ឱកាសមួយផ្សេងទៀតដើម្បីអប់រំអ្នកសារព័ត៌មានពីអ្វីដែលត្រូវបានចាត់ទុកថា ជាទង្វើនៃព័ត៌មានមិនពិត និងរបៀបដែលត្រូវប្រយុទ្ធប្រឆាំងនឹងការផ្សព្វផ្សាយព័ត៌មានមិនពិត ដែលមិនត្រឹមតែនៅក្នុងប្រទេសកម្ពុជាប៉ុណ្ណោះទេ ប៉ុន្តែសម្រាប់អនុតំបន់មេគង្គផងដែរ។
លោកមានប្រសាសន៍ថា ៖ «អ្នកសារព័ត៌មានត្រូវដឹងនូវគុណតម្លៃ និងសារៈសំខាន់នៃតួនាទីរបស់ខ្លួនឯង និងចាំបាច់ត្រូវពង្រឹងគោលការណ៍នៃការគ្រប់គ្រងខ្លួនឯង។ ខ្ញុំនឹងមិននិយាយបន្ថែមទៀតទេ ព្រោះខ្ញុំនឹងទុកប្រធានបទដ៏រសើបនេះទៅកាន់អ្នកជំនាញដែលនឹងចែករំលែកនៅពេលក្រោយ»៕ ដោយ៖ នាង សុគន្ធា
