ថៃ៖ ក្រុមរថយន្ត Off Road កម្ពុជា បានធ្លាក់មកចំណាត់ថ្នាក់ទី១១ ក្រោយធ្វើបានល្អនៅថ្ងៃទី២ ក្រោយបញ្ចប់ទាំង៣ SS គឺ SS4 , SS5 និង SS6 ពីការប្រណាំង OFF ROAD ឆ្នាំ២០២៣ នៅទីលាន Magnificent នាខេត្តកាន់ឆាណាក់បូរី ប្រទេសថៃ។

លោក ញឹម សុវណ្ណារ៉ូ បានអោយដឹងថា ការប្រកួតនៅ SS6 មិនសង្ឃឹមថា បានពិន្ទុល្អនោះទេ ពីព្រោះដំណាក់កាលប្រណាំងចុងក្រោយនេះ ស្ថានភាពផ្លូវវែង មានឧបសគ្គច្រើន ភក់ ដីល្បាប់ និងចំណោតខ្លាំង។ លោក អះអាងថា ម្យ៉ាងទៀតក្រុមយើងក៏មានបញ្ហាបច្ចេកទេសផ្នែកគ្រឿងម៉ាស៊ីនផងដែរ ដោយត្រូវប្តូរម៉ាស៊ីនមួយគ្រឿងទាំងយប់ ដើម្បីអាចបន្តប្រកួតនៅថ្ងៃស្អែក។ អ្នកប្រណាំងបើករថយន្តពណ៌ក្រហម រហ័សនាម Mario រូបនេះ បន្តថា សម្រាប់ 2SS ចុងក្រោយ នឹងធ្វើអោយបានល្អ ដើម្បីសម្រេចគោលដៅឈរចំណាត់ថ្នាក់ Top 10 ពីការប្រណាំងកម្រិតអន្តរជាតិមួយនេះជូនកម្ពុជា។

លោក ញឹម សុវណ្ណារ៉ូ បន្ថែមថា សម្រាប់ការប្រណាំងថ្ងៃនេះ កម្ពុជាធ្វើបានល្អរហូតធ្លាក់ពីលេខ១៧ មកត្រឹមលេខ១១ ក្រោយឈរលេខ២ នៅ SS5 ទទួលបាន ៩៥ពិន្ទុ និងពិន្ទុសរុប ៣០៩ ឈរចំណាត់រួមលេខ១១ ក្នុងចំណោម ២៩ក្រុមចូលរួម ។

លោក ហេង បញ្ញា សមាជិកក្រុមជាង បានបញ្ជាក់ថា ម៉ាស៊ីនរថយន្តកីឡាករ ញឹម សុវណ្ណារ៉ូ ត្រូវខូចទាំងស្រុង ដូចជា បែកប៊ិះស្តុង ខូចដងយ៉េន ខូចក្បាលកន្លះ ដូច្នេះបើយើងមិនផ្លាស់ប្តូរទេ មិនអាចបន្តការប្រណាំងបានទេ ពីព្រោះរថយន្តប្រណាំងត្រូវមានកម្លាំងខ្លាំង។ ក្រុមជាងរូបនេះ បន្ថែមថា ក្រុមជាងនិងប្រឹងប្រែងធ្វើអោយបានល្អ និងទាន់ពេលវេលាសម្រាប់ធ្វើការប្រណាំងនៅថ្ងៃស្អែក។

សូមបញ្ជាក់ថា ការប្រណាំងរថយន្ត Off Road ឆ្នាំ២០២៣ នៅទីលាន The Magnificent ខេត្តកាន់ឆាណាក់បូរី ប្រទេសថៃ គឺមាន៤ប្រទេសចូលរួម កម្ពុជា ថៃម្ចាស់ផ្ទះ ឡាវ ម៉ាឡេស៊ី និងកម្ពុជា ក្នុងនោះកម្ពុជា បញ្ជូន១ក្រុមចូលរួមស្មើនឹង ៣រថយន្ត ត្រូវប្រជែងជាមួយ ២៩ក្រុមផ្សេងទៀត ៕ ចាន់ វិចិត្រ