រដ្ឋមន្រ្តីក្រសួងកសិកម្មជំរុញឱ្យសហគមន៍ព្រៃឈើចង្រ្កាន្តរយ រៀបចំជាកញ្ចប់សេវាទេសចរណ៍ ដើម្បីទាញកំណើនទេសចរ
សៀមរាប៖ ក្នុងឱកាសដឹកនាំគណៈប្រតិភូ និងដៃគូវិស័យឯកជន ទស្សនកិច្ចនៅសហគមន៍ព្រៃឈើចង្ក្រាន្តរយ ស្រុកវ៉ារិន ខេត្តសៀមរាប កាលពីថ្ងៃទី២៦ ខែមិថុនា រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ ឯកឧត្តម ឌិត ទីណា បានជំរុញឱ្យសហគមន៍នេះ រៀបចំជាកញ្ចប់សេវាទេសចរណ៍ ដើម្បីទាក់ទាញភ្ញៀវទេសចរមកកម្សាន្តឱ្យកាន់តែច្រើនថែមទៀត។
លោករដ្ឋមន្រ្តី បានលើកឡើងថា ការចុះពិនិត្យសក្តានុពលនៃតំបន់អភិវឌ្ឍសហគមន៍ព្រៃឈើចង្រ្កាន្តរយ ដើម្បីពិនិត្យមើលពីសក្តានុពលនៃការកែច្នៃ និងអភិវឌ្ឍតំបន់ការពារធនធានធម្មជាតិមួយនេះដោយផ្សារភ្ជាប់វិស័យកសិកម្ម ក្នុងការទាក់ទាញភ្ញៀវទេសចរមកកម្សាន្ត បន្ទាប់ពីតំបន់ប្រាសាទ។
យោងតាមក្រសួងកសិកម្ម រុក្ខាប្រមាញ់ និងនេសាទ ឯកឧត្តម ឌិត ទីណា ក៏បានណែនាំដល់ប្រជាសហគមន៍ត្រូវចេះថែរក្សាសមិទ្ធផលដែលទទួលបាន ហើយរួមគ្នាការពារ អភិរក្ស និងទាញប្រយោជន៍ពីធនធានព្រៃឈើរបស់សហគមន៍ដែលក្រសួងបានប្រគល់ឱ្យតាមរយៈការបង្កើត រៀបចំ និងផ្តល់សេវាដល់ភ្ញៀវទេសចរប្រកបដោយភាពគុណភាព និងភាពរួសរាយរាក់ទាក់ ដោយមិនសំដៅតែលើភ្ញៀវទេសចរអន្តរជាតិ។
ឯកឧត្តមបានថ្លែងថា ៖ «សហគមន៍អាចរៀបចំជាកញ្ចប់សេវាទេសចរណ៍ មានការស្នាក់នៅ ម្ហូបអាហារ បន្លែ ត្រី សាច់ ដែលត្រូវបានដាំដុះ និងចិញ្ចឹមតាមបែបធម្មជាតិដល់ភ្ញៀវទេសចរណ៍ដែលមកលេងកម្សាន្ត ដែលការងារនេះ នឹងអាចផ្តល់ប្រាក់ចំណូលជាប្រចាំ ឬតាមរដូវកាល បន្ថែមពីលើមុខរបរធ្វើស្រែចម្ការ»។ ដើម្បីឱ្យកិច្ចការនេះទទួលបានជោគជ័យ សហគមន៍ត្រូវមានភាពស្មោះត្រង់ សាមគ្គីភាព និងធ្វើការរួមគ្នា ដោយមិនត្រូវកាប់បំផ្លាញព្រៃឈើដើម្បីតែផលប្រយោជន៍ផ្ទាល់ខ្លួនរយៈពេលខ្លី តែត្រូវរួមគ្នាថែរក្សា និងការពារសម្បត្តិធម្មជាតិដែលនៅសេសសល់ សម្រាប់ទុកជាផលប្រយោជន៍រួមរយៈពេលយូរអង្វែងទៅមុខ។
ជុំវិញការជំរុញនេះ លោក ហុង វណ្ណៈ អ្នកជំនាញសេដ្ឋកិច្ចនៃវិទ្យាស្ថានទំនាក់ទំនងអន្តរជាតិ នៃរាជបណ្ឌិត្យសភាកម្ពុជា នៅថ្ងៃទី២៧ ខែមិថុនា បានប្រាប់ថា លោកគាំទ្រឱ្យមានរៀបចំកន្លែងសហគមន៍ទេសចរណ៍ធម្មជាតិនានា ជាកញ្ចប់សេវាទេសចរណ៍ ដើម្បីទាក់ទាញទេសចរ ជួយលើកស្ទួយសេដ្ឋកិច្ចគ្រួសារពលរដ្ឋ និងដើម្បីអភិរក្សធនធានធម្មជាតិនៅតំបន់នោះថែមទៀត។
លោកបានថ្លែងថា ៖ «បើកិច្ចការនេះ បង្កើតឡើងជោគជ័យ គឺពិតជាបានរួមចំណែកយ៉ាងច្រើនដល់វិស័យសេដ្ឋកិច្ច និងទេសចរណ៍កម្ពុជាកាន់តែទូលាយ ពិសេសជួយបំពេញតម្រូវការទេសចរធម្មជាតិបន្ថែមទៀត ខណៈខេត្តសៀមរាបមានសក្តានុពលសម្បត្តិវប្បធម៌សំបូរបែប មានប្រាង្គប្រាសាទជាច្រើន ហេតុនេះបើមានការយកចិត្តទុកដាក់លើការកែឆ្នៃលើសហគមន៍ទេសចរណ៍ ដូចជាផ្ទះស្នាក់ឱ្យបានសមរម្យ នឹងធ្វើឱ្យពលរដ្ឋទទួលបានប្រាក់ចំណូលបន្ថែមទៀត»។
ដោយឡែក នៅថ្ងៃដដែលនោះដែរ ឯកឧត្តម ឌិត ទីណា ក៏បានចុះពិនិត្យមើលដំណាំស្វាយចន្ទីរបស់ក្រុមហ៊ុនសុភ័ណ្ឌធារី ក្នុងស្រុកជីក្រែង ផងដែរ ដើម្បីស្វែងយល់អំពីវឌ្ឍនភាព និងជំរុញការដាំដំណាំដ៏មានសក្តានុពលសម្រាប់ការនាំចេញរបស់កម្ពុជាមួយនេះ ឱ្យស្របតាមគោលនយោបាយប្រែក្លាយកម្ពុជា ជាប្រទេសអធិរាជស្វាយចន្ទីរបស់រាជរដ្ឋាភិបាល។
នាឱកាសនោះ លោកបានលើកទឹកចិត្តដល់ម្ចាស់ក្រុមហ៊ុនរិះរកវិធីកាត់បន្ថយថ្លៃដើមក្នុងការកែច្នៃគ្រាប់ស្វាយចន្ទី និងស្វែងយល់ពីបញ្ហាប្រឈមផ្សេងៗរបស់ម្ចាស់ដំណាំពាក់ព័ន្ធនឹងគុណភាពដី ការប្រឈមបម្រែប ម្រួលអាកាសធាតុ ការយាយីពីសត្វល្អិតចង្រៃ និងជំងឺផ្សេងៗជាដើម ដើម្បីស្វែងរកដំណោះស្រាយសមស្របណាមួយ។
សូមរម្លឹកថា កាលពីខែមីនា ឆ្នាំ២០២៣ សម្ដេចតេជោ ហ៊ុន សែន នាយករដ្ឋមន្រ្តីកម្ពុជាបានប្រកាសចង់ឱ្យកម្ពុជា ក្លាយទៅជាប្រទេសអធិរាជគ្រាប់ស្វាយចន្ទី ដោយអាចនាំចេញគ្រាប់ស្វាយចន្ទីឱ្យបានច្រើនជាងគេនៅលើពិភពលោក។ នៅឆ្នាំ២០២១ កម្ពុជា ផលិតគ្រាប់ស្វាយចន្ទីបានចំនួន ១, ១៨លានតោនក្នុងមួយឆ្នាំ ឈរនៅចំណាត់ថ្នាក់លេខមួយលើពិភពលោក ដោយមិនទាន់គិតពីដំណាំស្វាយចន្ទីដែលទើបដាំ ខណៈប្រទេសកូតឌីវ័រ ផលិតបាន ១,១លានតោន និងប្រទេសឥណ្ឌាផលិតបាន ៨សែន តោន៕
ដោយ៖បូរ ពេជ្រហ្សាលីន
