គ.ជ.ប ចែកបណ្ណព័ត៌មានបោះឆ្នោតជូនអ្នកមានឈ្មោះបោះឆ្នោតសម្រេចបានជាង ៩៤ ភាគរយ
ភ្នំពេញ៖ លទ្ធផលនៃការចែកបណ្ណព័ត៌មានអ្នកបោះឆ្នោត សម្រាប់ការបោះឆ្នោតជ្រើសតាំងតំណាងរាស្ត្រ នីតិកាលទី៧ឆ្នាំ២០២៣សម្រេចបានចំនួន៩៤,១៣ភាគរយនៃចំនួនអ្នកបោះឆ្នោតសរុប ៩,៧១០,៦៥៥ សន្លឹក។
ឯកឧត្តម ហង្ស ពុទ្ធា អ្នកនាំពាក្យនៃគណៈកម្មាធិការជាតិរៀបចំការបោះឆ្នោត (គ.ជ.ប) នៅថ្ងៃទី២៧ ខែមិថុនា បានឱ្យដឹងថា ការចែកបណ្ណព័ត៌មានអ្នកបោះឆ្នោតទៅអ្នកមានឈ្មោះបោះឆ្នោត បានប្រព្រឹត្តិទៅតាំងពីថ្ងៃទី ២៨ ខែឧសភា រហូតល់២៦ ខែមិថុនា ឆ្នាំ២០២៣ ដោយចែកបានសរុប ចំនួន ៩៤,១៣ ភាគរយ។ចំនួនបណ្ណព័ត៌មានដែលនៅសល់ ដោយសារតែប្រជាពលរដ្ឋបានធ្វើចំណាកស្រុកពីស្រុកកំណើត មកធ្វើការនៅទីក្រុងភ្នំពេញ និងក្រៅប្រទេសផងដែរ។ ដោយឡែកចំពោះឧបសគ្គដូចជាមិនមានបញ្ហានោះទេ ក្នុងដំណើការចែកបណ្ណព័ត៌មានអ្នកបោះឆ្នោតនេះ។
ឯកឧត្តម ហង្ស ពុទ្ធា បានប្រាប់ថា ៖ «ចំពោះចំនួន ជាង ៥ភាគរយទៀត ដែលមិនទាន់បានចែកទៅដល់ដៃ អ្នកបោះឆ្នោតនេះ គ.ជ.ប នឹងបន្តចែកជូនបងប្អូនប្រជាបលរដ្ឋទៀត ប៉ុន្តែសាមីខ្លួនត្រូវទៅយកនៅគណៈកម្មការឃុំសង្កាត់រៀបចំការបោះឆ្នោត ចាប់ពីថ្ងៃទី ២៨ ខែមិថុនា រហូតដល់ ថ្ងៃទី២១ ខែកក្កដា ខាងមុខ»។
លោក សំ គន្ធាមី នាយកប្រតិបត្តិអង្គការ និចហ្វិក បានប្រាប់យ៉ាងខ្លីឱ្យដឹងនៅថ្ងៃទី ២៧ ខែមិថុនាដោយលោកបានសារទរចំពោះលទ្ធផលនៃការចែកបណ្ណព័ត៌មានអ្នកបោះឆ្នោតនេះ ដែលគ.ជ.ប បង្ហាញមានចំនួនច្រើន ដែលលទ្ធផលនេះខាងលោកអាចទទួលយកបាន។
ដោយឡែកទាក់ទងនឹងជុំវិញបញ្ហាការបោះឆ្នោតនេះដែរ ឯកឧត្តម ប្រាជ្ញ ចន្ទ ប្រធានគណៈកម្មការជាតិរៀបចំការបោះឆ្នោត (គ.ជ.ប) បានចេញសេចក្តីណែនាំពីការពង្រឹង សន្តិសុខ សណ្តាប់ធ្នាប់ និងរបៀបរៀបរយ ក្នុងការិយាល័យបោះឆ្នោត និងការិយាល័យរាប់សន្លឹកឆ្នោត ក្នុងដំណើរការបោះឆ្នោតជ្រើសតំាងតំណាងរាស្រ្ត នីតិកាលទី៧ នៅថ្ងៃអាទិត្យ ទី២៣ ខែកក្កដា ឆ្នាំ២០២៣។
ឯកឧត្តម ប្រាជ្ញ ចន្ទ បានលើកឡើងតាមរយៈសេចក្តីណែនាំថា ៖ «ប្រធានគណៈកម្មការរាជធានី ខេត្តរៀបចំការបោះឆ្នោត (គធ.ខប), ប្រធានគណៈកម្មការឃុំ សង្កាត់រៀបចំការបោះឆ្នោត (គឃ.សប) និងប្រធានគណៈកម្មការការិយាល័យបោះឆ្នោត និងរាប់សន្លឹកឆ្នោត (គ.ក.ប/គ.ក.រ) ត្រូវធ្វើការពង្រឹង សន្តិសុខ សណ្តាប់ធ្នាប់ និងរបៀបរៀបរយ ដើម្បីធានបាននូវ ដំណើរការបោះឆ្នោតប្រព្រឹត្តទៅដោយរលូន និងធានាបាននូវសន្តិសុខ សុវត្ថិភាព សណ្តាប់ធ្នាប់ របៀបរៀបរយ និងបរិយាកាសស្ងប់ស្ងាត់ល្អ»។
ឯកឧត្តមបញ្ជាក់ដែរថា អ្នកដែលមានសិទ្ធិចូលក្នុងការិយាល័យបោះឆ្នោត ត្រូវបានអនុញ្ញាតឱ្យចូលក្នុងការិយាល័យបោះឆ្នោត និងបរិវេណខាងក្នុង គឺមានមន្រ្តីបោះឆ្នោតដែលបានទទួលការតែងតំាងពី គ.ជ.ប,ភ្នាក់ងារគណបក្សនយោបាយ ដែលបានចុះបញ្ជីគណបក្សនយោបាយឈរឈ្មោះបោះឆ្នោត និងដែលត្រូវបានអនុញ្ញាត។
ឯកឧត្តមបន្តថា អ្នកសង្កេតការណ៍ដែលមានបណ្ណសម្គាល់ផ្តល់ឱ្យដោយ គ.ជ.ប ឬដោយ គធ.ខប, អ្នកសារព័ត៌មានដែលមានបណ្ណផ្តល់ឱ្យដោយ គ.ជ.ប និងមន្រ្តីពាក់ព័ន្ធមួយចំនួនទៀតដែលត្រូវបានអនុញ្ញាត។
ឯកឧត្តម ប្រាជ្ញ ចន្ទ បានបញ្ជាក់ថា ៖ «គធ.ខប គឃ.សប និង គ.ក.ប/គ.ក.រ ត្រូវសហការជាមួយកម្លាំងសន្តិសុខបោះឆ្នោតតាមមូលដ្ឋាន និងតាមការិយាល័យនីមួយៗរៀងៗខ្លួន ដើម្បីធានាឱ្យបាននូវសន្តិសុខ សុវត្ថិភាព សណ្តាប់ធ្នាប់សាធារណៈ និងរបៀបរៀបរយ ក្នុងដំណើរការបោះឆ្នោត និងរាប់សន្លឹកឆ្នោត»។
គធ.ខប និង គឃ.សប ត្រូវធ្វើការផ្សព្វផ្សាយឱ្យបានទូលំទូលាយដល់គណបក្សនយោបាយឈរឈ្មោះបោះឆ្នោត អ្នកសង្កេតការណ៍ជាតិ អន្តរជាតិ អង្គការមិនមែនរដ្ឋាភិបាល ប្រព័ន្ធផ្សព្វផ្សាយព័ត៌មាន និងប្រជាពលរដ្ឋដែលមានសិទ្ធិបោះឆ្នោត។ នេះបើតាមការបន្ថែមពីឯកឧត្តម ប្រាជ្ញ ចន្ទ៕
ដោយ៖គឹម យុត្ថារ៉ូ
