ភ្នំពេញ ៖ ឯកឧត្តម សាយ សំអាល់ រដ្ឋមន្រ្តីក្រសួងបរិស្ថាន និងថ្នាក់ដឹកនាំ មន្រ្តីរាជការទាំងអស់ សូមក្រាបបង្គំទូលថ្វាយ ព្រះករុណា ព្រះបាទសម្តេច ព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចកកម្ពុជា ព្រះករុណាជាអម្ចាស់ជីវិតលើត្បូង ជាទីគោរពសក្ការៈដ៏ខ្ពង់ខ្ពស់បំផុត ក្នុងឱកាសទ្រង់ទទួលបានព្រះរាជគោរមងារកិត្តិយសថ្នាក់ ខ្ពស់បំផុត ខាងព្រះពុទ្ធសាសនា ជា «ព្រះរាជពុទ្ធមាមកាភិបាល» នៃអង្គការពុទ្ធសាសនិកពិភពលោក ដែលមានខ្លឹមសារថា ៖

ក្នុងឱកាសដ៏មហានក្ខត្តឫក្សវិសេសវិសាលថ្លៃថ្លាបំផុត ដែល ព្រះករុណាជាអម្ចាស់ជីវិតលើត្បូងជាទីគោរពសក្ការៈដ៏ខ្ពង់ខ្ពស់បំផុត ទ្រង់ទទួលបានព្រះរាជគោរមងារកិត្តិយសថ្នាក់ខ្ពស់បំផុតខាងព្រះពុទ្ធសាសនា ជា «ព្រះរាជពុទ្ធមាមកាភិបាល» នៃអង្គការពុទ្ធសាសនិកពិភពលោក ទូលព្រះបង្គំជាខ្ញុំតាងនាមថ្នាក់ដឹកនាំ និង មន្ត្រីរាជការគ្រប់លំដាប់ថ្នាក់នៃក្រសួងបរិស្ថាន សូមព្រះបរមរាជានុញ្ញាតសម្ដែងនូវអំណរសាទរ និងសេចក្តីសោមនស្ស រីករាយឥតឧបមា និងសូមថ្វាយព្រះរាជសព្ទសារធុការពរប្រកបដោយសម្ភារវកថាដ៏មហាជ្រាលជ្រៅឧត្តុងឧត្តម ចំពោះព្រះករុណាជាអម្ចាស់ជីវិតលើត្បូង ជាទីគោរពសក្ការៈដ៏ខ្ពង់ខ្ពស់បំផុត ។

ព្រះករុណាជាអម្ចាស់ជីវិតលើត្បូង ជាទីគោរពសក្ការៈដ៏ខ្ពង់ខ្ពស់បំផុត ព្រះរាជគោរមងារកិត្តិយសថ្នាក់ខ្ពស់បំផុតនេះ ជាព្រះរាជសក្ខីកម្មដ៏មហានក្ខត្តឫក្សប្រសើរថ្លៃថ្លាបំផុត នៃព្រះមហាករុណាទិគុណដ៏ឧត្តុងឧត្តម ដែលព្រះអង្គទ្រង់សព្វព្រះរាជហឫទ័យទុកដាក់ក្នុងព្រះរាជសទ្ធា និងព្រះរាជតួនាទីដ៏ប្រសើរខ្ពង់ខ្ពស់ក្រៃលែង លើកតម្កើង វិស័យព្រះពុទ្ធសាសនា ដរាបក្លាយជា ព្រះនិមិត្តរូបដ៏ល្អបរិសុទ្ធឧត្តុងឧត្តមនៃឯកភាពជាតិ និងនិរន្តរភាពជាតិ ជាព្រះរាជ វីរៈគំរូក្នុងការប្រតិបត្តិ និងផ្សព្វផ្សាយព្រះធម៌លើសកលលោក ជាពិសេសការបន្តបវេណីអភិរក្ស និងអភិវឌ្ឍព្រះពុទ្ធសាសនា នៅកម្ពុជាថែមទៀតផង ។

ជាថ្មីម្តងទៀត ទូលព្រះបង្គំយើងខ្ញុំទាំងអស់គ្នា សូមលំឱនកាយលើកហត្ថប្រណម្យបួងសួងដល់វត្ថុស័ក្តិសិទ្ធិក្នុងលោក ទេវតារក្សាព្រះមហាស្វេតច្ឆត្រ គុណបុណ្យព្រះរតនត្រ័យកែវទាំងបី បុណ្យបារមីដួងព្រះវិញ្ញាណក្ខន្ធនៃអតីតព្រះមហាក្សត្រ ព្រះមហាក្សត្រីយានី និងព្រះមហាវីរក្សត្រ ព្រះវររាជបិតា ឯករាជ្យ បូរណភាពទឹកដី និងឯកភាពជាតិខ្មែរ «ព្រះបរមរតន កោដ្ឋ» សូមទ្រង់តាមជួយថែរក្សាអភិបាលនិងប្រោះព្រំព្រះសព្ទសាធុការពរជ័យ បវរសួស្តី សិរីវឌ្ឍនា វិបុលសុខ មហាប្រសើរថ្វាយ ព្រះករុណាជាអម្ចាស់ជីវិតលើត្បូង សូមព្រះអង្គទ្រង់ប្រកបដោយ បញ្ញាញាណភ្លឺថ្លា ព្រះកាយពលមាំមួន ព្រះរាជសុខភាពល្អបរិបូណ៌ និងមានព្រះជន្មាយុយឺនយូរជាងរយព្រះវស្សា ដើម្បីគង់ប្រថាប់ក្នុងព្រះបរមរាជសម្បត្តិជាម្លប់ ដ៏ត្រជាក់ត្រជំដល់ប្រជារាស្ត្រខ្មែរគ្រប់រូប និងបន្តព្រះរាជកិច្ចដឹកនាំប្រកបដោយ ទសពិធរាជធម៌ ក្នុងបុព្វហេតុសន្តិភាព បង្រួបបង្រួមជាតិ ឯកភាពជាតិ បូរណភាពទឹកដី និងភាពចម្រុងចម្រើនសម្បូរសប្បាយនៃទឹកដីសុវណ្ណភូមិជានិច្ចនិរន្តរ៍។

សូម ព្រះករុណាជាអម្ចាស់ជីវិតលើត្បូង ជាទីគោរពសក្ការៈដ៏ខ្ពង់ខ្ពស់បំផុត ទ្រង់ព្រះ មេត្តាទទួលនូវគារវកិច្ចដ៏ខ្ពង់ខ្ពស់ និងភក្តីភាពដ៏ស្មោះស្ម័គ្របំផុតពីទូលព្រះបង្គំយើងខ្ញុំ ទាំងអស់គ្នា ៕ ដោយ / គ្រី សម្បត្តិ