កម្មករម្នាក់បានស្លាប់ និងជាង៤០នាក់ផ្សេងទៀតបានរងរបួសធ្ងន់ និងស្រាល ក្នុងករណីគ្រោះថ្នាក់ចរាចរណ៍នៅកំពង់ឆ្នាំង
កំពង់ឆ្នាំង ៖ផ្អែកតាមរបាយការណ៍របស់ការិយាល័យចរាចរណ៍ផ្លូវគោក នៃស្នងការដ្ឋាននគរបាលខេត្តកំពង់ឆ្នាំង បានឱ្យដឹងថា រថយន្តដឹកកម្មករដែលមានកម្មករ កម្មការិនីជិត៦០នាក់ បានរងគ្រោះថ្នាក់ក្នុងករណីរវាងរថយន្ត និងម៉ូតូនាល្ងាចថ្ងៃទី២៧ ខែមិថុនា ដែលបានបណ្តាលឱ្យមនុស្សម្នាក់ស្លាប់ និងជាង៤០ នាក់ផ្សេងទៀតរងរបួសធ្ងន់ និងស្រាល។
របាយការណ៍ដដែលបានលើកឡើងនាថ្ងៃទី២៨ ខែមិថុនា ថា ករណីគ្រោះថ្នាក់ចរាចរណ៍នេះ បានបង្កឡើងនៅតាមបណ្ដោយផ្លូវជាតិលេខ៥ ក្នុងឃុំសែប ស្រុកកំពង់ត្រឡាច ខេត្តកំពង់ឆ្នាំង ដែលបានបណ្តាលឱ្យកម្មការិនីរោងចក្រម្នាក់បានស្លាប់ និង៤២នាក់ផ្សេងទៀត បានរងរបួសធ្ងន់ និងស្រាល ខណៈដែលអ្នកបើកបររថយន្តត្រូវបានឃាត់ខ្លួនផងដែរនាពេលនោះ។
យោងតាមមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស (សង់ត្រាល់) បានឱ្យដឹងដែរថា គ្រោះថ្នាក់ចរាចរណ៍នេះ កើតឡើងនៅពេលដែលរថយន្តដឹកកម្មករចេញពីរោងចក្រត្រឡប់ទៅផ្ទះវិញ ដល់ចំណុចកើតហេតុមានម៉ូតូដួលនៅខាងមុខរថយន្ត ហើយរថយន្តចាប់ហ្វ្រាំងបន្ទាន់ទើបបណ្ដាលឱ្យរថយន្តក្រឡាប់តែម្ដង។
អង្គការសង់ត្រាល់ បានបន្តថា ជនរងគ្រោះដែលបានបាត់បង់ជីវិតឈ្មោះ ព្រំ ឈឺន អាយុ៣៦ ឆ្នាំ រស់នៅនៅភូមិចា ឃុំទឹកហូត ស្រុករលាប្អៀរ ខេត្តកំពង់ឆ្នាំង ជាកម្មការិនី នៅរោងចក្រស្បែកជើង Tripos International Co. Ltd។ ចំណែកឯកម្មករដែលរងរបួសធ្ងន់ និងស្រាលផ្សេងទៀតត្រូវបញ្ជូនទៅព្យាបាលមន្ទីរពេទ្យបង្អែកខេត្តកំពង់ឆ្នាំង និងខ្លះទៀតបញ្ជូនទៅមន្ទីរពេទ្យកាលម៉ែត្រផងដែរ។
ទាក់ទងករណីគ្រោះថ្នាក់ចរាចរណ៍មកលើកម្មករ កម្មការិនីនៅតែកើតមាន លោក ប៉ាវ ស៊ីណា ប្រធានសម្ព័ន្ធសហជីពចលនាកម្មករ បានប្រាប់ឱ្យដឹងថា លោកនៅតែមានការព្រួយបារម្ភចំពោះករណីគ្រោះថ្នាក់ចរណ៍លើកកម្មករកម្មការិនី ក្នុងរយៈពេលកន្លងមក និងនៅតែបន្តកើតឡើងចំពោះពួកគេ។
លោកបានបន្តថា ករណីនេះ អាជ្ញាធរមានសមត្ថកិច្ចពាក់ព័ន្ធ គួរតែមានការផ្សព្វផ្សាយ អប់រំដល់អ្នកបើកបរឱ្យបានយល់ដឹងពីច្បាប់ចរាចរណ៍ផ្លូវគោក និងបង្កើនការប្រុងប្រយ័ត្នខ្ពស់ ដើម្បីកាត់បន្ថយគ្រោះថ្នាក់ចរាចរណ៍ឱ្យនៅទាបបំផុត។
ចំណែក លោក ហេង សុផាន់ណារិទ្ធ អគ្គនាយករងនៃបេឡាជាតិរបបសន្តិសុខសង្គម (ប.ស.ស.) និងជាប្រធានក្រុមការងារសុវត្ថិភាពចរាចរណ៍ផ្លូវគោកសម្រាប់គាំពារកម្មករនិយោជិត បានលើកឡើងថា ការចុះបណ្តុះបណ្តាល និងផ្សព្វផ្សាយច្បាប់ស្តីពីចរាចរណ៍ផ្លូវគោក ដល់អ្នកបើកបរយានយន្ដដឹកកម្មករ និងកម្មករនិយោជិត គឺជាការងារមួយដ៏ចាំបាច់ដែលត្រូវបន្តធ្វើជាប្រចាំ ដើម្បីរួមចំណែករក្សានូវសុវត្ថិភាពក្នុងពេលធ្វើដំណើរ។
លោកបានបន្តថា កន្លងមកករណីគ្រោះថ្នាក់ចរាចរណ៍ភាគច្រើនបណ្ដាលមកពីការបើកបរហួសល្បឿនកំណត់ បើកបរមិនគោរពសិទ្ធិអាទិភាពត្រង់ផ្លូវប្រសព្វ ការបើកបរជែងក្នុងស្ថានភាពគ្រោះថ្នាក់ ការបត់ឆ្វេង បត់ស្ដាំ បត់ត្រឡប់ក្រោយមិនបានត្រឹមត្រូវ មិនប្រកាន់ស្ដាំ និងមិនបានត្រួតពិនិត្យយានយន្ដតាមលក្ខណៈបច្ចេកទេសជាដើម។
លោក ហេង សុផាន់ណារិទ្ធ បញ្ជាក់ថា ៖ «ទោះបី ជាការអប់រំផ្សព្វផ្សាយច្បាប់ស្ដីពីចរាចរណ៍ផ្លូវគោកនេះ មិនអាចជួយឱ្យបងប្អូនជៀសផុតពីករណីគ្រោះថ្នាក់ចរាចរណ៍បានទាំងស្រុងក៏ពិតមែន ប៉ុន្តែក៏ជាចំណែកមួយ ដើម្បីបញ្រ្ជាបឱ្យអ្នកបើកបររថយន្ដដឹកកម្មករ និងកម្មករទាំងអស់ បើកបរដោយមានទំនួលខុសត្រូវខ្ពស់ក្នុងពេលបើកបរ ហើយត្រូវចេះទទួលខុសត្រូវលើវាសនាខ្លួនឯង និងត្រូវស្រឡាញ់អាយុជីវិតអ្នកដទៃ ឱ្យដូចជីវិតខ្លួនឯង»។
ក្នុងឱកាសចុះមូលដ្ឋានដើម្បីសួរសុខទុក្ខប្រជាពលរដ្ឋក្នុងឃុំពានី ស្រុកកំពង់ត្រឡាច ខេត្តកំពង់ឆ្នាំង នាថ្ងៃទី២៨ ខែមិថុនា សម្ដេចចៅហ្វាវាំង គង់ សំអុល ប្រធានក្រុមការងារគណបក្សចុះមូលដ្ឋានខេត្តកំពង់ឆ្នាំង ក៏បានចូលសួរសុខទុក្ខ និងឧបត្ថម្ភថវិកាកម្មករ កម្មការិនីរោងចក្រដែលរងគ្រោះថ្នាក់ចរាចរណ៍ កំពុងសម្រាកព្យាបាលនៅមន្ទីរពេទ្យបង្អែកស្រុកកំពង់ត្រឡាចផងដែរ៕ ដោយ៖ គឹម យុត្ថារ៉ូ
