សេអ៊ូល៖ ប្រជាជនកូរ៉េខាងត្បូងទូទាំងប្រទេស ស្រាប់តែក្លាយជាមានអាយុក្មេងជាងមុនមួយឆ្នាំ ឬពីរឆ្នាំ ក្រោយការកែប្រែដោយលុបវិធីសាស្ត្ររាប់អាយុប្រពៃណីរបស់ប្រទេសឱ្យស្របតាមស្តង់ដារអន្តរជាតិ បានចូលជាធរមាន។

ច្បាប់ថ្មី​នេះ​ នឹង​លុប​ចោល​ប្រព័ន្ធ​ប្រពៃណី​មួយ​ដែលប្រទេសកូរ៉េធ្លាប់បាន​ចាត់​ទុក​រាល់ទារក​ដែលចាប់​កំណើតភ្លាមមានអាយុ ១ឆ្នាំ ឬ២ឆ្នាំ ​ឬគេហៅថា ជាការរាប់អាយុចាប់តាំងពីទារកនៅក្នុងពោះម្តាយ។ ច្បាប់ថ្មី នឹង​ប្តូរ​​មកការរាប់​អាយុក្រោយការចាប់កំណើតវិញ ដែលជាស្តង់ដារអន្តជាតិ។

ប្រធានាធិបតីកូរ៉េខាងត្បូងលោកយ៉ូន ស៊ូក យោល( Yoon Suk-yeol) បានជំរុញឱ្យមានការ​ផ្លាស់ប្តូរ​នេះយ៉ាងខ្លាំង ចាប់តាំងពីពេលដែលគាត់បានចូលកាន់តំណែងភ្លាម។ លោក​ប្រធានាធិបតីបាននិ​យាយថា វិធីសាស្ត្រ​រាប់​អាយុ​បែប​ប្រពៃណី​នេះគឺជា​ « រឿងមិនចាំបាច់សម្រាប់សង្គម និងខ្ចះខ្ចាយ​សេដ្ឋកិច្ច​​ជាតិ»។ ជាឧទាហរណ៍ វិវាទតែងកើតឡើងលើការបង់ប្រាក់ធានារ៉ាប់រង និងការកំណត់សិទ្ធិ​ទទួលបានកម្មវិធី​ជំនួយរបស់​រដ្ឋាភិបាល។

ជាមួយគ្នានេះ លោក Lee Wan-kyu រដ្ឋមន្ត្រីក្រសួងនីតិកម្មរបស់រដ្ឋាភិបាលបានប្រាប់សន្និសីទ

សារព័ត៌មាន​​​​មួយកាល​ពីថ្ងៃចន្ទថា៖ «យើងរំពឹងថាជម្លោះផ្លូវច្បាប់ ពាក្យបណ្តឹង និងការភ័ន្ត​ច្រឡំ​ក្នុងសង្គមនានាដែល បង្កឡើង​ដោយសាររបៀបគណនាអាយបុរាណនេះ​នឹងត្រូវបានកាត់​បន្ថយយ៉ាង​ខ្លាំង» ។

គួរជម្រាបថាប្រព័ន្ធរាប់បែបប្រពៃណីត្រូវបានគេប្រើយ៉ាងទូលំទូលាយនៅក្នុងសង្គមកូរ៉េ និងនៅ​កន្លែង​ធ្វើការ រាប់សតវត្សមកហើយ។ តាមការរាប់បុរាណនេះ ទារកទើបនឹងកើត នឹងត្រូវរាប់​ថាមានអាយុមទតឆ្នាំនិងពេលឈានចូលដល់ថ្ងៃទី ១មករា ទារកនោះនឹងត្រូវបូកបន្ថែមមួយឆ្នាំទៀត។ ជាឧទាហរណ៍ ទារក​ដែលកើតចំថ្ងៃ ៣១ ខែធ្នូ នឹងមានអាយុពីរឆ្នាំ ក្រោយកើតបានមួយថ្ងៃ។

ការផ្លាស់ប្តូរនេះ ទទួលបានការគាំទ្រពីសំណាក់ប្រជាជនកូរ៉េខាងត្បូងភាគច្រើន។ យោងតាមការស្ទង់​មតិដោយក្រុមហ៊ុនក្នុងស្រុក Hankook Research នៅក្នុងខែមករា ឆ្នាំ ២០២២ ប្រជាជនកូរ៉េខាងត្បូង ៣ នាក់ក្នុងចំណោម ៤ នាក់ក៏បានគាំទ្រ ចំពោះការកំណត់ស្តង់ដារថ្មីនេះ។

លោក Choi Hyun-ji អាយុ ២៧ ឆ្នាំជាបុគ្គលិកការិយាល័យនៅទីក្រុងសេអ៊ូលបាននិយាយថា៖ «ខ្ញុំហៀបនឹងឈានចូលអាយុ ៣០ ឆ្នាំនៅឆ្នាំក្រោយទៅហើយ (ក្រោមប្រព័ន្ធអាយុប្រពៃណីរបស់កូរ៉េ) ប៉ុន្តែឥឡូវនេះខ្ញុំមានពេលវេលាបន្ថែមទៀត ខ្ញុំចូលចិត្តវាល្អណាស់ដែល​មានអារម្មណ៍​ថាក្មេង​ជាងមុន»។

គួរបញ្ជាក់ថា វិធីសាស្រ្តរាប់អាយុបែបប្រពៃណីនេះ ក៏ត្រូវបានប្រើប្រាស់ដោយប្រទេស​អាស៊ីបូព៌ា​មួយចំនួនផងដែរ ប៉ុន្តែត្រូវបានប្រទេសទាំងនោះចាប់ផ្តើមបោះចោលជាបន្តបន្ទាប់។ ប្រទេសជប៉ុនបាន​ទទួលយកស្តង់ដារអន្តរជាតិនៅឆ្នាំ ១៩៥០ ហើយសូម្បី ប្រទេសកូរ៉េខាង​ជើងបាន​ក៏បាន​បោះបង់​វិធីសាស្ត្ររាប់អាយុបុរាណនេះក្នុងទសវត្សរ៍ឆ្នាំ ១៩៨០៕

ដោយៈ ស្រ៊ុន សិរីវឌ្ឍនៈ

ប្រភព៖ https://www.reuters.com/world/asia-pacific/south-koreans-become-year-or-two-younger-traditional-way-counting-age-scrapped-2023-06-28/