រដ្ឋមន្ត្រីការបរទេសអាមេរិក៖ គ្មានកិច្ចព្រមព្រៀងនុយក្លេអ៊ែរស្ថិតនៅក្រោមការចរចាជាមួយអ៊ីរ៉ង់នោះទេ
អាមេរិក៖ រដ្ឋមន្ត្រីការបរទេសអាមេរិក លោក អ៊ែនថូនី ប្ល៊ីងកែន( Blinken) បានថ្លែងកាលពីថ្ងៃពុធទី ២៨ ខែមិថុនា ថា គ្មានកិច្ចព្រមព្រៀងនុយក្លេអ៊ែរថ្មី ដែលកំពុងស្ថិតនៅក្រោមការចរចាជាមួយអ៊ីរ៉ង់នោះទេ បន្ទាប់ពីទំនាក់ទំនងការទូតថ្មីរវាងសត្រូវទាំង២ក្លាយជាស្ងប់ស្ងាត់។ នេះបើតាមការរាយការណ៍របស់ទីភ្នាក់ងារសារព័ត៌មាន AFP។
លោក ប្លីនកេន(Blinken) បានថ្លែងនៅឯក្រុមប្រឹក្សាទំនាក់ទំនងការបរទេសនៅទីក្រុងញូវយ៉កថា៖ «គ្មានកិច្ចព្រមព្រៀងណាមួយនោះទេ បើទោះបីជាយើងបន្តមានឆន្ទៈក្នុងការស្វែងរកផ្លូវការទូតក៏ដោយ»។ លោកបានអំពាវនាវឱ្យអ៊ីរ៉ង់ជ្រើសរើស «មិនចាត់វិធានការដែលបង្កើនភាពតានតឹង» ជាមួយសហរដ្ឋអាមេរិក និងនៅមជ្ឈិមបូព៌ា ដោយនិយាយថា សកម្មភាពអ៊ីរ៉ង់នឹងបង្ហាញឱ្យឃើញការជ្រើសរើសបែបនោះ។
គួររំឭកថា ប្រធានាធិបតីអាមេរិក លោក ចូ បៃដិន បានចូលកាន់ដំណែង ដោយសង្ឃឹមថានឹងស្វែងរកការស្ដារឡើងវិញនៃកិច្ចព្រមព្រៀងនុយក្លេអ៊ែរឆ្នាំ២០១៥ជាមួយប្រទេសអ៊ីរ៉ង់ដែលត្រូវបានអតីតប្រធានាធិបតី ដូណាល់ ត្រាំ ដកខ្លួនចេញ។ ទោះបីជាមានកិច្ចខិតខំប្រឹងប្រែង កិច្ចចរចាដែលសម្របសម្រួលដោយសហភាពអឺរ៉ុបបានដួលរលំជាច្រើនជុំ ហើយភាពចលាចលក្នុងប្រទេសអ៊ីរ៉ង់កាលពីឆ្នាំមុន បានធ្វើឱ្យទីក្រុងវ៉ាស៊ីនតោនស្ទាក់ស្ទើរកាន់តែខ្លាំងឡើង ក្នុងការសម្រេចឡើងវិញនូវកិច្ចព្រមព្រៀងជាមួយប្រទេសនេះ។
ចំណែកក្រុមអ្នកការទូតនិយាយថា កិច្ចពិភាក្សាដោយប្រយោលបានបន្តដោយស្ងប់ស្ងាត់ក្នុងរយៈពេលប៉ុន្មានខែថ្មីៗនេះ ដោយមានប្រទេសអូម៉ង់ជាអ្នកសម្របសម្រួល ដែលផ្តោតជាសំខាន់លើស្ថានភាពអ្នកទោសអាមេរិកនៅអ៊ីរ៉ង់។
កន្លងមក កិច្ចពិភាក្សាស្តីពីការស្ដារឡើងវិញនូវកិច្ចព្រមព្រៀងនុយក្លេអ៊ែរអ៊ីរ៉ង់ ត្រូវបរាជ័យជុំវិញវិវាទលើវិសាលភាពនៃការបន្ធូរបន្ថយការដាក់ទណ្ឌកម្មរបស់អាមេរិកលើអ៊ីរ៉ង់ និងការទាមទារផ្សេងៗឱ្យប្រទេសអ៊ីរ៉ង់ ដែលចាត់ទុកកម្មវិធីនុយក្លេអ៊ែររបស់ខ្លួនក្នុងន័យ «សន្តិភាព» គោរពតាម។
លោក ប្ល៊ីងកែន បាននិយាយកាលពីថ្ងៃពុធដដែលថា រដ្ឋបាល បៃដិន បានខិតខំប្រឹងប្រែងដោយស្មោះត្រង់ជាមួយមហាអំណាចអឺរ៉ុបក៏ដូចជាគូប្រជែងចិននិងរុស្ស៊ី ដើម្បីនាំយកកិច្ចព្រមព្រៀងមកវិញនៅពេលវេលាសមស្រប៕
ប្រែសម្រួលដោយ៖ ហួន ឌីណា ប្រភព៖ Blinken says no nuclear deal on table with Iran
