​ភ្នំពេញ៖ ពុទ្ធិកសាកលវិទ្យាល័យព្រះសីហមុនីរាជា បានបង្កើតយុទ្ធនាការ «អំណានក្នុងសន្តិភាព៩ ០០០ ក្បាល»ដើម្បីតម្កល់ទុក​ក្នុង​បណ្ណាល័យតេជោសន្តិភាពនៃពុទ្ធិកសាកលវិទ្យាល័យព្រះសីហមុនីរាជា  ដោយ​ពុទ្ធិកបាន​អំពាវនាវ​ឱ្យ​មានការ​រួមគ្នាបរិច្ចាគសៀវភៅ​អានម្នាក់មួយក្បាល ដាក់បណ្ណាល័យដើម្បីសាងជាតិ ឱ្យខ្លាំង និងរុងរឿង។​

ការបង្កើតយុទ្ធនាការនេះ គឺ​ក្នុង​គោល​ដើម្បី​បំផុសគំនិតសមណនិស្សិត និស្សិតឱ្យស្រឡាញ់ការសិក្សារៀនសូ​ត្រ ស្រឡាញ់គតិបណ្ឌិត ​និង​ពិសេស​ឱ្យចេះ​គាំទ្រស្នាដៃនិពន្ធ ​និងការ​គោរពស្រឡាញ់គ្នា​ ដើម្បីរួមគ្នាអ​ភិវឌ្ឍប្រទេសជាតិ សាសនា និង​ព្រះមហាក្សត្រ។ ​

ទាក់ទងនឹង​ការបង្កើត​យុទ្ធនាការនេះ លោក ឈត ប៊ុនថន មន្ត្រីស្រាវជ្រាវផ្នែកទំនាក់ទំនង វប្បធម៌ អប់រំ និងទេសចរណ៍ នៃរាជបណ្ឌិត្យសភាកម្ពុជា នៅថ្ងៃទី២ ខែកក្កដា ​បាន​បង្ហាញការគាំទ្រ និង​ស្វាគមន៍ចំពោះយុទ្ធនាការ​អំណាននេះទោះបី​ក្នុងរូបភាពណាមួយក៏ដោយ ព្រោះវាបានផ្តល់ប្រយោជន៍ និងចំណេះដឹងដល់សិស្ស និស្សិតទូទៅ  ។  ​

លោក​បាន​ប្រាប់​ឱ្យដឹងថា ៖ «យុទ្ធនការនេះ គឺជាចំណុចចាប់ផ្តើមដ៏ល្អបំផុត ដោយសារតែមនុស្សមួយចំ​នួន នាពេលបច្ចុប្បន្ននេះ មិនសូវចាប់អារម្មណ៍លើការអានសៀវភៅនោះទេ ពួកគេចូលចិត្តអានតែខ្លឹមសារខ្លី ដែលគេបង្ហោះនៅតាមបណ្តាញសង្គម ដូចជាហ្វេសប៊ុកជាដើម»។

ទោះជាយ៉ាងណាលោក លោក ឈត ប៊ុនថន បាន​លើកឡើងដែរថា ​ការអានសារខ្លីៗ មិនមែនមានន័យថា អត់ប្រយោជន៍នោះទេ ប៉ុន្តែអ្នកអានមិនបានយល់ខ្លឹមសារទាំងមូលដូចអាននៅក្នុងសៀវភៅនោះទេ ខណៈនៅក្នុងសៀវភៅ គេសរសេរមានខ្លឹមសារពេញលេញ និងមានចំណេះដឹងច្រើន។

លោកថ្លែងថា ៖ «សម្រាប់ខ្ញុំ យុទ្ធនាការនេះ​ វាផ្តល់សារៈប្រយោជន៍ដល់អ្នកអានទូទៅ ហើយមានចំណេះដឹងច្រើន​ ដែលយើងអាចយកមកដោះស្រាយបញ្ហាសង្គមបាន»។

ដោយ៖គឹម យុត្ថារ៉ូ