ក្រុមយុវជនខ្មែរជោគជ័យលើ «ឧបករណ៍វាស់ទឹកភ្លៀង» ចង់កែប្រែឧបករណ៍ខ្លួនឱ្យទៅជាផលិតផលឧស្សាហកម្ម
ភ្នំពេញ៖ នៅក្នុងការប្រកួត Mekong River Commission ឬ MRC Competition ក្រុមនិស្សិតមកពីវិទ្យាស្ថានបច្ចេកវិទ្យាកម្ពុជាបានបង្កើតឧបករណ៍វាស់ទឹកភ្លៀងដែលមានឈ្មោះថា «Spinning Bucket Rain Gauge»ដើម្បីចូលរួមប្រកួតប្រជែងដោយគំនិតនិងវិធីសាស្ត្រនេះទាញចេញពីចលនារហាត់ទឹកខ្មែរពីបុរាណ។
នៅក្នុងកម្មវិធីប្រកួតប្រជែងនេះក្រុមនិស្សិតនៃវិទ្យាស្ថានបច្ចេកវិទ្យាកម្ពុជា ឬTechno ទទួលបានជយលាភីលេខ១លើប្រភេទវិញ្ញាសាការបង្កើតឧបករណ៍វាស់ទឹកភ្លៀង ដែលការប្រកួតនេះបានប្រព្រឹត្តទៅនៅប្រទេសឡាវក្នុងកម្មវិធីសន្និសីទអន្តរជាតិនិងកិច្ចប្រជុំកំពូលរបស់គណៈកម្មការទន្លេមេគង្គ(4th MRC Summit) ដែលប្រព្រឹត្តទៅចាប់ពីថ្ងៃទី៣០ ខែមីនា ដល់ថ្ងៃទី៥ ខែមេសា ឆ្នាំ២០២៣។
កន្លងផុតទៅជាងបីខែសមាជិកម្នាក់នៃក្រុមមួយនេះចង់ឃើញឧបករណ៍របស់គេក្លាយជា ផលិតផលឧស្សាហកម្ម ដើម្បីប្រើប្រាស់ជាប្រយោជន៍ជាតិបាន។ យុវជន ជា ផេងអ៊ូ អ្នកតំណាង និងជាសមាជិកម្នាក់នៃក្រុមផលិតនេះ បានឱ្យដឹងថា ទាក់ទងនឹងការផលិត គឺក្រុមរបស់លោក រង់ចាំខាងក្រុមហ៊ុន ឬស្ថាប័នមកសហការជាមួយផ្ទាល់។
លោកបានឱ្យដឹងថា លោកនៅតែគិតពីសុឆន្ទៈរបស់ MRC ដោយសារគេបង្កើតកម្មវិធីនេះអស់ច្រើន រួមទាំងមានការចូលរួមពីប្រទេសតាមដងទន្លេមេគង្គ ដែលលោកគិតថាក្នុងការចូលរួមកម្មវិធីនេះគឺគេនឹងមិនទុកក្រុមលោកចោលទេ ម្យ៉ាងក្រុមរបស់លោកជាម្ចាស់ជយលាភី តែគ្រាន់តែមិនទាន់ដឹងពេលវេលាច្បាស់ ហើយក្នុងនោះក៏មានក្រុមហ៊ុនបរទេសពីរដែលគេបានចូលមកត្រួតពិនិត្យឧបករណ៍របស់លោកផងដែរ។
លោក ជា ផេងអ៊ូ បានរៀបរាប់ឱ្យដឹងថា ៖ «ខ្ញុំគិតថា ជាជាងការរង់ចាំម្ចាស់ជំនួយ ទៅថ្ងៃខាងមុខ ឬមិនយូរមិនឆាប់ទេ ខាងក្រសួង ខាងរដ្ឋាភិបាលគាត់នឹងរកក្រុមហ៊ុនក្នុងស្រុក ដើម្បីសិក្សាពីអាកាសធាតុនេះកាន់តែសុក្រិតជាងមុន។ ជាមួយនឹងហេដ្ឋារចនាសម្ព័ន្ធប៉ុណ្ណឹង ខ្ញុំគិតថា នឹងមានក្រុមហ៊ុនឯកជន ឬក៏ក្រសួងគាត់ នឹងខ្នះខ្នែងក្នុងការបង្កើតឧបករណ៍នេះទៅជាផលិតផលឧស្សហកម្ម ជាជាងយើងធ្វើជោគជ័យហើយ តែមិនមានក្រុមហ៊ុនណាដែលសហការដើម្បីបង្កើតជាផលិតផលដើម្បីប្រើប្រាស់បាន»។
យុវជនរូបនេះបានពន្យល់ថា ពីមុនការវាស់ទឹកភ្លៀងគឺមានវិធីសាស្ត្រវាស់ច្រើនយ៉ាង។ចំណែកឯឧបករណ៍វាស់កម្ពស់ទឹកភ្លៀង គឺបង្កើតមកក្នុងគោលបំណងដូចជាព្យាករណ៍អាកាសធាតុ បញ្ចៀសទឹកជំនន់ និងហេដ្ឋារចនាសម្ព័ន្ធ រំដោះទឹក។
ក្រោយទទួលបានជោគជ័យនៅក្នុងការប្រកួតប្រជែងនៅប្រទេសឡាវ យុវជនខាងលើក៏បានឱ្យដឹងថា ក្រសួងធនធានទឹកក៏បានផ្ដល់សញ្ញាវិជ្ជមានទៅក្រុមខ្លួនផងដែរ ដោយអនុញ្ញាតឱ្យទៅទស្សនាស្ថានីយហើយថ្ងៃខាងមុខ ឬឆាប់ៗខ្លួននឹងយកឱកាសមួយនេះដើម្បីចុះទៅ។
លោក ជា ផេងអ៊ូ និយាយថា ៖ « ឯកឧត្តមខាងធនធានទឹកក៏បានសួរ និងផ្ដល់យោបល់ល្អៗដល់ពួកខ្ញុំដែរ ដូចជាបញ្ហាដែលគាត់ជួបប្រទះនូវការវាស់កម្ពស់ទឹកភ្លៀងនៅស្ថានីយវានៅមានបញ្ហាជួបប្រទះ ហើយគាត់ក៏បានយល់ដឹងពីបច្ចេកវិទ្យាដែលយើងបានចែករំលែកទៅកាន់គាត់ៗ យល់ថាវាល្អ និងចង់ឃើញយើងផលិត ឆាប់ៗ»។
លោក ជា ផេងអ៊ូ បានឱ្យដឹងទៀតថា កាលយើងជាប់ជ័យលាភីហ្នឹង យើងក៏មានការរៀបចំស្តង់នៅវៀងចន្ទន៍ ប្រទេសឡាវ គេដាក់ស្តង់រយៈពេលបីថ្ងៃ ដើម្បីឱ្យក្រុមហ៊ុនឯកជន ជាមួយនឹងក្រសួងពាក់ព័ន្ធនានាមកសាកសួរ និងផ្ដោះផ្ដងយោបល់ពាក់ព័ន្ធនឹងបញ្ហាដែលគាត់ជួបប្រទះ ជាមួយនឹងដំណោះស្រាយ»។
ទាក់ទិនទៅនឹងបច្ឆេកទេសនៃឧបករណ៍វិញយុវជន ជា ផេងអ៊ូ បានរៀបរាប់ឱ្យដឹងត្រួសៗថា ជាទូទៅការបង្កើតគំនិតថ្មីវាពិបាកដែរ សម្រាប់ប្រទេសគេក៏ដូចគ្នាដែរ ដោយត្រូវធ្វើម៉េចឱ្យការវ៉ាស់ស្ទង់មានភាពសុក្រិត ប៉ុន្តែដំណោះស្រាយធំក៏គេនៅមិនទាន់ដោះស្រាយបានដូចគ្នា ដូចជាប្រើយូរទៅ តំណរទឹកដែលនៅជាប់គាំងក្នុងការជះទឹកចេញហ្នឹងវានៅជាប់ ហើយបើសិនជានៅកន្លែងណាដែលមានអាកាសធាតុពិបាកខ្លាំង គេប្រើដូចជារ៉ាដាវិញ។ ប៉ុន្តែឧបករណ៍នោះមានតម្លៃថ្លៃ មិនអាចដាក់តាមស្ថានីយ ឬក៏ដាក់ទូទាំងប្រទេសដើម្បីសិក្សាកម្ពស់ទឹកភ្លៀងនោះទេ។
លោក ផេងអ៊ូ បញ្ជាក់ថា ឧបករណ៍របស់ក្រុមលោកអាចជាដំណោះស្រាយសម្រាប់គ្រប់កាលៈទេសៈទាំង អស់ មិនថាអាកាសធាតុអាក្រក់ប៉ុណ្ណានោះទេ។
ជាមួយគ្នានេះ លោក ជា ផេងអ៊ូ បានថ្លែងឱ្យដឹងទៀតថា ឧបករណ៍វាស់ទឹកភ្លៀងនេះកើតចេញ ពីការសហការរវាង ដេប៉ាតឺម៉ង់អគ្គិសនី និងដេប៉ាតឺម៉ង់ធារាសាស្ត្រនៃវិទ្យាស្ថានបច្ចេកវិទ្យាកម្ពុជា (តិចណូ)។ ការផលិតឡើងនេះ ដើម្បីចូលរួមប្រកួតក្នុងកម្មវិធី Mekong River Commission ឬ MRC នៅប្រទេសឡាវក្នុងឆ្នាំ ២០២៣នេះ។
លោក ជា ផេងអ៊ូ និយាយថា ៖ «ពួកយើងបានចំណាយពេលធ្វើរយៈពេល ៣ខែ ដែលមានសមាជិកចំនួន ៤នាក់ ព្រមទាំងមានការដឹកនាំពីសាស្ត្រាចារ្យ។ ក្នុងការប្រកួតនេះដែរ យើងទទួលបានជ័យលាភីលេខ១ ក្នុងចំណោមប្រទេសចំនួនដែលមានកម្ពុជា ឡាវ ថៃ និងវៀតណាម»៕
ដោយ៖ស្រ៊ុន សិរីវឌ្ឍនៈ
