ទុរេនសំឡូត ប្រមូលផលបានប្រហែលជាង ៣ ០០០តោនហើយ គិតត្រឹមដើមខែកក្កដា
បាត់ដំបង៖ មន្ទីរកសិកម្ម រុក្ខាប្រមាញ់និងនេសាទ ខេត្តបាត់ដំបង បានឱ្យដឹងថា ការប្រមូលផលទុរេនក្នុងឆ្នាំនេះដោយគិតត្រឹមដើមខែកក្កដា ទុរេនសំឡូត ប្រមូលផលបានប្រមាណជាង ៣ ០០០តោន ស្មើនឹងប្រមាណ៦០ភាគរយហើយ នៃផ្ទៃដីដាំទុរេនសរុប៤១៧ ហិកតានៅទូទាំងស្រុកសំឡូត។
លោក ហេង សិទ្ធិ មន្រ្តីជំនាញនៃមន្ទីរកសិកម្ម ខេត្តបាត់ដំបង បានប្រាប់ឱ្យដឹងនៅថ្ងៃទី២ ខែកក្កដា ថា ការប្រមូលផលទុរេនសំឡូតនៅឆ្នាំនេះ មិនសូវខុសពីឆ្នាំមុននោះទេទាំងផ្ទៃដីដាំដុះបរិមាណផល ដោយការប្រមូលទុនរេនជារៀងរាល់ឆ្នាំ មានបរិមាណជាង៥០០០តោន ។
ចំពោះតម្លៃវិញ លោក ហេង សិទ្ធិ បានបញ្ជាក់ថា តម្លៃទុរេនចន្លោះ ១៣ ០០០ រៀលទៅ ១៥ ០០០ រៀល សម្រាប់ទុរេនដឹកចេញពីចម្ការទៅតាមប្រភេទទុរេននីមួយ ហើយនៅខេត្តបាត់ដំបង មានតែស្រុកសំឡូតមួយប៉ុណ្ណោះ ដែលមានការដាំដុះទុរេន ដោយបច្ចុប្បន្នផ្ទៃដីដាំដុះទុរេនមានចំនួន ៥៤៦ ហិកតា ខណៈដែលផ្ទៃដីប្រមូលមានចំនួន៤១៧ហិកតា ដោយក្នុងមួយហិកតាអាចប្រមូលបានជាង១២តោន។
លោកមានប្រសាសន៍ថា ៖ «ជាទូទៅការប្រមូលផលទុរេនសំឡូត អាចនឹងបញ្ចប់នៅចុងខែកក្កដានេះ។ ការប្រែប្រួលនៃអាកាសធាតុ មិនមានផលប៉ះពាល់ខ្លាំងដល់ទុរេនទេ ព្រោះដំណាំទុរេនមិនដូចស្រូវនោះទេ។ សម្រាប់ពូជទុរេនវិញ ពពួកទុរេនពូជម៉ាន់ថងទឹកគោថ្លៃជាងគេ តែមិនសូវសម្បូរនោះទេ។ នៅដើមឆ្នាំនេះ ទុរេនមិនទាន់សម្បូរនៅឡើយទេ ទាល់ចុងខែ៦ ឬដើមខែ៧ ទើបសម្បូរច្រើន»។
លោក ណៃ ចន ប្រធានបណ្តុំអាជីវកម្មទុរេនសំឡូត ខេត្តបាត់ដំបង បានប្រាប់ឱ្យដឹងដូចគ្នាដែរថា ទិន្នផលទុរេន របស់សមាជិកនៃបណ្តុំអាជីវកម្មទុរេនសំឡូត នាឆ្នាំនេះ មិនសូវខុសពីឆ្នាំមុនប៉ុន្មាននោះទេ ដោយនៅក្នុងឃុំសំឡូតនេះ មានសមាជិកជាម្ចាស់ចំការចំនួនជិត២០ចម្ការ ហើយការប្រមូលផលក្នុងមួយឆ្នាំ ចន្លោះ៣០០ទៅ៤០០តោន។ មកទល់ពេលសមាជិកទាំងអស់ប្រមូលផលបានប្រហែលជាង៥០ភាគរយហើយ។
លោកបានបន្ថែមថា ទីផ្សារសំខាន់របស់ទុរេនសំឡូត គឺរាជធានីភ្នំពេញ ក្រៅពីនេះចែកចាយក្នុងខេត្តបាត់ដំបង និងមានខ្លះសម្រាប់អ្នកទេសចរ ដែលបានទៅទិញដល់ចម្ការ ក្នុងឃុំសំឡូតផ្ទាល់តែម្តង។
ចំពោះរឿងទីផ្សារនេះដែរ លោក ណៃ ចន បានប្រាប់ថា កន្លងទៅ បណ្តុំអាជីវកម្មទុរេនសំឡូតបានជួបជាមួយក្រុមហ៊ុនមួយចំនួន ដែលមានដូចជាក្រុមហ៊ុនថៃ ចិន និងខ្មែរ ដោយក្រុមហ៊ុនទាំងនោះ មានបំណងចង់នាំចូលទុរេនរបស់ស្រុកសំឡូតទាំងមូល ទៅលក់នៅទីផ្សារក្រៅប្រទេស ប៉ុន្តែនៅមានឧបសគ្គខ្លះដោយបរិមាណផ្គត់ផ្គង់ ដោយភាគីចិនបារម្ភខ្លាចខាងស្រុកសំឡូតផ្គត់ផ្គង់ មិនបានតាមកិច្ចសន្យា។
លោកបានបញ្ជាក់ថា ៖ «បណ្តុំអាជីវកម្មទុរេនសំឡូត តែងតែពិភាក្សាគ្នាជាមួយសមាជិកជាច្រើនដងទាក់ទងនឹងការនាំចេញទុរេនទៅប្រទេសចិននេះ ដោយកន្លងទៅខាងចិន តែសួរយើងថា តើយើងអាចផ្គត់ផ្គង់ទុរេនឱ្យគេក្នុងមួយឆ្នាំបានប៉ុន្មាន គេតម្រូវឱ្យយើងផ្តល់ទិន្នន័យលម្អិតឱ្យគេ»។
លោក ណៃ ចន បានបន្ថែមថា ខាងក្រុមហ៊ុននាំចេញ មានការពេញចិត្តណាស់ ចំពោះរសជាតិ និងគុណភាពនៃទុរេន របស់ខាងបណ្តុំអាជីវកម្មទុរេនសំឡុត ប៉ុន្តែខាងសមាជិកភាគច្រើនមានការព្រួយបារម្ភពីការចុះកិច្ចសន្យាហើយ មិនអាចផ្គត់ផ្គង់ឱ្យគេបានតាមកិច្ចសន្យា។ ម្យ៉ាងវិញចំពោះបរិមាណផ្គត់ផ្គង់ និងភូតគាមអនាម័យ ភាគីចិនទាមទារឱ្យធ្វើឱ្យបានល្អប្រសើរជាងនេះ ដែលនេះវាទាមទារឱ្យមានការចំណាយដើមទុនច្រើន ៕
ដោយ៖វណ្ណ សុជាតា
