​ភ្នំពេញ៖ ក្រសួងអប់រំ យុវជន និងកីឡា បាន​​លើកឡើង​នាចុង​ខែមិថុនា​កន្លងទៅ​​ដោយបានបញ្ជាក់ថា កម្មវិធីសមមូលអប់រំកម្រិតមូលដ្ឋានតាមអ៊ីនធឺណិត ប៊ីប( BEEP)ដែលជាផ្នែកមួយនៃ​កម្មវិធីការងារនិងមុខរបរសមរម្យសម្រាប់យុវជននៅកម្ពុជា កំពុងស្ថិ​តក្នុងដំណាក់កាលពង្រីកវិសាលភាព ដើម្បីសម្រេចបាននូវការផ្សព្វផ្សាយទូ​ទាំងប្រទេស និងឈានដល់ក្រុមគោលដៅថ្មីនៃអ្ន​កទទួលផល។

ក្រសួងអប់រំបានបង្ហាញថា ដើម្បីឆ្លើយតបនឹងបញ្ហាការបោះបង់ការសិក្សា អង្គការយូណេស្កូ រួមជាមួយក្រសួងការងារ និងប​ណ្តុះបណ្តាលវិជា្ជជីវៈនិងក្រសួងអប់រំ យុវជន និងកីឡា បានបើកដាក់ឱ្យដំណើរការកម្មវិធីសមមូលអប់រំកម្រិតមូលដ្ឋានតា​មអ៊ីនធឺណិត(ប៊ីប)ដើម្បីផ្ដល់ជាស្ពានដល់យុជនដែលបោះបង់ការសិក្សាឱ្យចូលការបណ្ដុះបណ្តាលជំនាញនិងមានឱ​កាស ទទួលបានការងារសមរម្យ ដែលពួកគេអាចរួមចំណែកយ៉ាងមានអត្ថន័យ និងដើរតួនាទីក្នុងអនាគតនៃសេដ្ឋកិច្ច និ​ងសង្គមកម្ពុជា។

ក្រសួងបញ្ជាក់ទៀតថា តាមរយៈកម្មវិធីប៊ីប យុវជនដែលនៅក្រៅសាលាត្រូវបានផ្ដល់ឱកាសដើម្បីសិក្សាមុខវិជ្ជាផ្សេងៗដូច ជាសហគ្រិនភាព ជំនាញឌីជីថល ជំនាញនៅកន្លែងធ្វើការ និងជំនាញសតវត្សទី ២១ ដែលត្រៀមឱ្យពួកគេចូល សិក្សាក្នុងកម្មវិធីបណ្តុះបណ្តាលជំនាញផ្លូវការ។ នៅពេលបញ្ចប់ការសិក្សាតាមកម្មវិធីប៊ីប អ្នកសិក្សានឹងទទួលបាន វិញ្ញាបនបត្រស្មើនឹងថ្នាក់ទី៩ ដែលទទួលស្គាល់ដោយក្រសួងអប់រំ យុជន និងកីឡា និងក្រសួងការងារនិងបណ្តុះប ណ្តាលវិជ្ជាជីវៈ។

នៅក្នុងដំណើរទស្សនកិច្ចសិក្សាជំនាញ នៅខេត្តបាត់ដំបង កាលពីពេលថ្មីៗនេះ លោក ចឹក លីម អគ្គនាយករងយុវជននៃក្រ​សួងអប់រំ យុវជន និងកីឡា បានលើកឡើងថា ដំណើរទស្សនកិច្ចសិក្សារជំនាញផ្តល់ឱកាសដ៏ល្អដល់អ្នក សិក្សាប៊ីបជាច្រើ​ននៅ ក្នុងខេត្តបាត់ដំបង និងយុវជនដែលមកពីសហគមន៍ជនបទក្នុងខេត្តកំពង់ឆ្នាំង។

តាមរយៈក្រសួង​អប់រំ លោកបានលើកឡើងថា ៖ «វាជាកន្លែងដែលយុវជននៅក្រៅសាលាបង្កើតទំនុកចិត្តលើខ្លួនឯង និងស្វែ​ងយល់​ពីឱកាសអភិវឌ្ឍជំនាញរបស់ពួកគេ»។

លោក ចឹក លីម បានបន្តថា ​​ការគាំទ្រផ្នែកហិរញ្ញវត្ថុពីទីភ្នាក់ងារស្វីសសម្រាប់ការអភិវឌ្ឍ និងកិច្ចសហប្រតិបត្តិការ (SDC) ក្នុ​ងដំណាក់កាលទីពីរនៃកម្មវិធីការងារ និងមុខរបរសមរម្យសម្រាប់យុវជននៅកម្ពុជា (DEY III) ប៊ីប គឺជាកម្មវិធីសមមូល តែ​មួយគត់​ក្នុងប្រទេសកម្ពុជា ដែលត្រូវបានទទួលស្គាល់រួមគ្នាដោយ ក្រសួងអប់រំ យុវជន និងកីឡា និងក្រសួងការងារ និងប​ណ្តុះបណ្តាលវិជ្ជាជីវៈ។

​ទាក់ទងនឹង​កម្មវិធីនេះដែរ ក្រសួងការងារ និងបណ្តុះបណ្តាលវិជ្ជាជីវៈ បានរៀបចំសិក្ខាសាលាពិគ្រោះយោបល់ថ្នាក់ជាតិ ស្តីពី «ការរៀបចំកម្មវិធីមុខរបរ និងការងារសមរម្យសម្រាប់យុវជននៅកម្ពុជា ដំណាក់កាលទី៣ (DEY III)» ជាមួយ​​វិស័យឯកជន សហជីពកម្មករ សង្គមស៊ីវិល អង្គការដៃគូ​ និងតំណាងយុវជន  ដើម្បីប្រមូលធាតុចូលពីភាគីពាក់ព័ន្ធដើម្បីរៀបចំឯ​កសារកម្មវិធី (Project Document) នៃកម្មវិធីមុខរបរ និងការងារសមរម្យសម្រាប់យុវជននៅកម្ពុជា ដំណាក់កាលទី៣ ដែ​លនឹងត្រូវអនុវត្តចាប់ពីខែមករា ឆ្នាំ២០២៤ ដល់ខែធ្នូ ឆ្នាំ២០២៨។

នាឱកាសនោះឯកឧត្តម សោម ចំណាន រដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវៈ បានលើកឡើងថា ក្នុងការអភិវឌ្ឍវិស័យអប់រំបណ្តុះបណ្តាលបច្ចេកទេស និងវិជ្ជាជីវៈ(TVET)  និងការអនុវត្តគម្រោងកម្មវិធីមុខរបរ និងការងារសមរ​ម្យសម្រាប់យុវជននៅកម្ពុជាទាំងពីរដំណាក់កាលកន្លងមក ទទួលបានសមិទ្ធិផលគួរឱ្យកត់សម្គាល់។​

លោក ប៉ិច បូឡែន ប្រធានសហព័ន្ធសេវាអប់រំនៅកម្ពុជា និងអគ្គនាយកបណ្តាញគ្រឹះស្ថានអប់រំនិងបណ្តុះបណ្តាល Westline Education Group បានប្រាប់ឱ្យដឹងនៅថ្ងៃទី​២ ខែកក្កដាថា រាជរដ្ឋាភិបាលកម្ពុជា បានចាត់ទុកការអភិវឌ្ឍយុវជ​នជាអាទិភាពមួយ ដើម្បីកសាងធនធានមនុស្ស ដែលបំពាក់​ដោយជំនាញបច្ចេកទេស និងវិជ្ជាជីវៈត្រឹមត្រូវ សម្រាប់បំ​ពេ​ញ​តម្រូវការទីផ្សារការងារដែលកំពុងវិវត្ត។

ទោះជាយ៉ាងណាក៏ដោយ លោកលើកឡើងថា តាមរបាយការណ៍របស់ក្រសួងអប់រំ អត្រាបោះបង់ការសិក្សាខ្ពស់ជាបន្តបន្ទាប់ ​ពិសេសនៅកម្រិតមធ្យមសិក្សាបឋមភូមិ មានន័យថា យុវជនមួយភាគធំកំពុងស្ថិតនៅក្រៅប្រព័ន្ធអប់រំផ្លូវការ ហើយមិនមានលក្ខណៈសម្បត្តិគ្រប់គ្រាន់សម្រាប់ចុះឈ្មោះចូល រៀនក្នុងការអប់រំបន្ថែម និងការអភិវឌ្ឍជំនាញនៅតាមវិទ្យាស្ថានអប់រំ បណ្ដុះបណ្ដាលបច្ចេកទេសនិង វិជ្ជាជីវៈ និង វិទ្យាល័យចំណេះទូទៅ និងបច្ចេកទេស។

លោក ប៉ិច បូឡែន បញ្ជាក់ថា ៖ «ក្នុងនាមវិស័យអប់រំឯកជន យើងមើលឃើញថា កម្មវិធីមុខរបរ និងការងារសមរម្យសម្រាប់យុវជននៅកម្ពុជា បានរួមចំណែកជាមួយរាជរដ្ឋាភិបាល ក្នុងការ សម្រេចបានគោលដៅយុទ្ធសាស្ត្រនៃការធ្វើបរិវត្តកម្មប្រព័ន្ធTVET ប្រកបដោយគុណភាព»៕

ដោយ៖វណ្ណ សុជាតា