គណបក្សចលនាឆ្ពោះមុខ និងភឿថៃ ដែលនាំមមុខក្នុងការបោះឆ្នោត សម្រេចបានកិច្ចព្រមព្រៀងលើតំណែងប្រធានសភាបន្ទាប់
ថៃ៖ គណបក្សធំៗពីរដែលនាំមុខគេក្នុងការបោះឆ្នោតថៃ រួមមានគណបក្សចលនាឆ្ពោះទៅមុខ (MFP) និងគណបក្សភឿថៃ កាលពីថ្ងៃទី៣ ខែកក្កដា បានព្រមព្រៀងគ្នាលើការតែងតាំងសមាជិកជាន់ខ្ពស់នៃក្រុមបក្សនយោបាយចម្រុះរបស់ខ្លួន ជាប្រធានសភាតំណាងបន្ទាប់។
ការសម្រេចនេះ ដែលធ្វើឡើងតាមរយៈការបោះឆ្នោតសភា ត្រូវបានប្រកាសឡើងនៅក្នុងសន្និសីទសារព័ត៌មានរួមគ្នាមួយក្រោយការបើករដ្ឋសភា កាលពីល្ងាចថ្ងៃចន្ទ។ នេះបើតាមការចុះផ្សាយរបស់សារព័ត៌មាន CNA ។
បេក្ខជននាយករដ្ឋមន្រ្តីនាំមុខ និងមេដឹកនាំនៃគណបក្ស MFP លោក ភីតា លីមចារ៉នរ៉ាត បានថ្លែងយ៉ាងដូច្នេះថា ៖ «យើងនឹងស្នើតែងតាំងលោក Wan Muhamad Noor Matha ជាប្រធានសភាតំណាងរាស្រ្ត ដោយមានសមាជិកសភាមកពីគណបក្ស MFP ជាអនុប្រធានទី១ និងសមាជិកសភាមកពីគណបក្សភឿថៃ ជាអនុប្រធានទី២»។
លោក Wan Noor វ័យ ៧៩ ឆ្នាំ ដែលធ្លាប់ដឹកនាំក្រសួងជាច្រើនក្នុងរដ្ឋាភិបាលមុនៗ និងជាប្រធានសភាចន្លោះឆ្នាំ ១៩៩៦ និង ២០០០ បច្ចុប្បន្នគឺជាមេដឹកនាំនៃគណបក្សប្រាឆាឆាត (Prachachat) ដែលបានចូលរួមក្រុមសម្ព័ន្ធជាមួយគណបក្ស MFP និងភឿថៃ ដើម្បីបង្កើតសម្ព័ន្ធភាពចម្រុះដែលមានសមាជិកចំនួន ៨ គណបក្ស ក្រោយការបោះឆ្នោតកាលពីថ្ងៃទី១៤ ខែឧសភា។
យោងទៅតាមលោក ភីតា កិច្ចព្រមព្រៀងស្តីពីការសំណើតែងតាំងត្រូវបានធ្វើឡើង ដើម្បីសម្រេចបាននូវឯកភាពក្នុងចំណោមគណបក្សចម្រុះទាំង៨ ក្នុងការបង្កើតរដ្ឋាភិបាលបន្ទាប់ដែលមានលោកជានាយករដ្ឋមន្ត្រី។
លោកបន្ថែមថា បេក្ខជនដែលស្នើឡើងទាំង៣នាក់ បានត្រៀមខ្លួនរួចជាស្រេចដើម្បីជំរុញរបៀបវារៈ ដែលនឹងនាំមកនូវតម្លាភាព ការត្រួតពិនិត្យ និងតុល្យភាព និងប្រសិទ្ធភាពដល់ប្រព័ន្ធសភាថៃ ខណៈធានាថា សភាជារបស់ប្រជាជនថៃ។
ទោះបីជាបែបនេះក៏ដោយ ក៏គួរបញ្ជាក់ថា រហូតមកទល់ពេលនេះ តំណែងនាយករដ្ឋមន្រ្តីបន្ទាប់កំពុងស្ថិតនៅក្នុងភាពស្រពិចស្រពិលនៅឡើយ ដោយហេតុថា ក្រោមរដ្ឋធម្មនុញ្ញថៃ លោក ភីតា និងសម្ព័ន្ធនេះ ត្រូវការសំឡេងគាំទ្រយ៉ាងតិច ៣៧៦ សំឡេង ពីសភាទាំង២របស់ប្រទេស ដើម្បីក្លាយជានាយករដ្ឋមន្រ្តី និងបង្កើតរដ្ឋាភិបាលថ្មី ខណៈសម្ព័ន្ធគណបក្សនយោបាយទាំង៨ អាចផ្ដល់សំឡេងគាំទ្រពីសមាជិកសភា ត្រឹមតែ ៣១៣ សំឡេងប៉ុណ្ណោះ៕
ប្រែសម្រួល៖ហួន ឌីណា ប្រភព៖ Thai election winner and major ally reach agreement on House Speaker
