កីឡាករ ណៃម៉ា រងការពិន័យ ៣, ៣ លានដុល្លារ ចំពោះការជីកបឹងក្នុងគេហដ្ឋានដ៏ស្ដុកស្ដម្ភរបស់ខ្លួនដោយគ្មានការអនុញ្ញាត
ប្រាស៊ីលីយ៉ា៖ អាជ្ញាធរប្រេស៊ីលបានឱ្យដឹងកាលពីថ្ងៃចន្ទទី៣ ខែកក្កដាថា រដ្ឋអាជ្ញារបស់ប្រទេសបានពិន័យកីឡាករបាល់ទាត់ដ៏ល្បីឈ្មោះ លោក ណៃម៉ា(Neymar) ចំនួន ៣,៣ លានដុល្លារ ចំពោះការជីកបឹងមួយនៅក្នុងបរិវេណគេហដ្ឋានដ៏ស្ដុកស្ដម្ភរបស់លោកនៅជាយរដ្ឋ រីយ៉ូ ដឺហ្សានេរ៉ូ ដោយគ្មានអាជ្ញាប័ណ្ណផ្នែកបរិស្ថាន។ នេះបើតាមការចុះផ្សាយរបស់ទីភ្នាក់ងារសារព័ត៌មាន AFP។
លេខាធិការដ្ឋានក្រុមប្រឹក្សាប្រេស៊ីលបាននិយាយនៅក្នុងសេចក្តីថ្លែងការណ៍ថាក្រុមប្រឹក្សាក្រុង Mangaratiba នៃរដ្ឋ រីយ៉ូ ដឺហ្សានេរ៉ូ បានចេញការផាកពិន័យចំនួនបួនចំពោះ «ការបំពានបរិស្ថានក្នុងការជីកបឹងសិប្បនិម្មិតមួយ នៅឯគេហដ្ឋានដ៏ស្ដុកស្ដម្ភរបស់កីឡាកររូបនេះ»។
ការបំពានទាំង៤នោះស្ថិតនៅក្នុងចំណោមការបំពានរាប់សិបដែលត្រូវបានរកឃើញ ដែលរួមមានការអនុវត្តការងារក្រោមការគ្រប់គ្រងបរិស្ថានដោយគ្មានការអនុញ្ញាត ការទប់ និងការបង្វែរទឹកទន្លេដោយគ្មានការអនុញ្ញាត និងការជីកយកដីដោយគ្មានការអនុញ្ញាតជាដើម។
រីឯ លោក Neymar មានរយៈពេល ២០ ថ្ងៃ ដើម្បីប្តឹងទៅឧទ្ធរណ៍ ខណៈការពិន័យដំបូងឡើងកំណត់ត្រឹមជិតមួយលានដុល្លារប៉ុណ្ណេះ។
គួរបញ្ជាក់ថា ការចេញការពិន័យនេះ ធ្វើឡើងបន្ទាប់ពីអាជ្ញាធរប្រេស៊ីលរកឃើញការរំលោភបរិស្ថានជាច្រើននៅទីអចលនទ្រព្យប្រណីតរបស់លោក Neymar ដែលមានកម្មករសំណង់កំពុងជីកបឹង និងបង្កើតឆ្នេរសិប្បនិម្មិត ក្រោយពីមានការរិះគន់នៅលើបណ្ដាញសង្គមចំពោះបញ្ហានេះ។
ក្រោយមក អាជ្ញាធរប្រេស៊ីលបានបិទទីតាំង និងបញ្ជាឱ្យបញ្ឈប់រាល់សកម្មភាពទាំងអស់ ប៉ុន្តែប្រព័ន្ធផ្សព្វផ្សាយប្រេស៊ីលបានរាយការណ៍ថា លោក Neymar បានរៀបចំពិធីជប់លៀង ហើយនាំគ្នាចុះងូតទឹកបឹងនៅទីនោះ។
ជុំវិញបញ្ហានេះ ការិយាល័យឆ្លើយតបរបស់ លោក Neymar ក្នុងប្រទេសប្រេស៊ីលមិនបានឆ្លើយតបទៅនឹងសំណើរបស់ AFP ដើម្បីសុំការអត្ថាធិប្បាយយ៉ាងណានោះទេ។
គួររំឭកថា លោក Neymar បានទិញគេហដ្ឋានដ៏ស្ដុកស្ដម្ភក្នុងក្រុង Mangaratiba ក្នុងឆ្នាំ ២០១៦។ យោងតាមប្រព័ន្ធផ្សព្វផ្សាយប្រេស៊ីលគេហដ្ឋានដ៏ស្ដុកស្ដម្ភនោះស្ថិតនៅលើផ្ទៃដី១០.០០០ម៉ែត្រការ៉េ ដោយមានទាំងកន្លែងផ្ទុកឧទ្ធម្ភាគចក្រ ស្ប៉ា និងកន្លែងហាត់ប្រាណ៕
ប្រែសម្រួល៖ហួន ឌីណា ប្រភព៖ Neymar fined US$3.3 million for building lake at mansion
