ពិភពលោកបំបែកកំណត់ត្រាថ្មី លើសីតុណ្ហភាពប្រចាំថ្ងៃដ៏ក្ដៅបំផុតកាលពីថ្ងៃទី៣ ខែកក្កដា
អាមេរិក៖ ទិន្នន័យពីមជ្ឈមណ្ឌលជាតិសម្រាប់ការព្យាករណ៍ផ្នែកបរិស្ថានរបស់សហរដ្ឋអាមេរិក បានបង្ហាញថា ថ្ងៃទី ៣ ខែកក្កដាកន្លងទៅ គឺជាថ្ងៃដ៏ក្តៅបំផុតក្នុងកំណត់ត្រារបស់ពិភពលោក។ នេះបើតាមការរាយការណ៍របស់ទីភ្នាក់ងារសារព័ត៌មានរ៉យទ័រនៅថ្ងៃទី៥ ខែកក្កដា នេះ។
ទិន្នន័យបង្ហាញថា សីតុណ្ហភាពសកលជាមធ្យមបានឡើងដល់ ១៧,០១ អង្សាសេ ដែលលើសពីកំណត់ត្រា ក្នុងខែសីហា ឆ្នាំ ២០១៦ ដែលមានត្រឹម ១៦,៩២ អង្សាសេ ខណៈដែលពេលបច្ចុប្បន្ននេះ រលកកំដៅកំពុងវាយប្រហារជុំវិញពិភពលោក។
ក្នុងរយៈពេលប៉ុន្មានសប្តាហ៍ថ្មីៗនេះ សីតុណ្ហភាពនៅតំបន់ភាគខាងត្បូងសហរដ្ឋអាមេរិក បានហក់ឡើងខ្លាំង ខណៈនៅប្រទេសចិនឯណោះវិញ រលកកម្ដៅដ៏រ៉ាំរ៉ៃបានបន្តវាយប្រហារតាមតំបន់មួយចំនួន ក្នុងសីតុណ្ហភាពលើសពី ៣៥ អង្សារសេ។ ជាមួយគ្នានេះ សីតុណ្ហភាពនៅអាហ្រ្វិកខាងជើង បានហក់ឡើងដល់ជិត ៥០ អង្សាសេ។
សូម្បីតែនៅទ្វីបទឹកកកអង់តាក់ទិក ដែលកំពុងស្ថិតក្នុងរដូវរងារបស់ទ្វីបស្រាប់ សីតុណ្ហភាពក៏នៅតែខ្ពស់ខុសពីធម្មតា។ មូលដ្ឋានស្រាវជ្រាវ Vernadsky របស់អ៊ុយក្រែន ដែលស្ថិតនៅលើកោះArgentine Islands ក្នុងទ្វីបអង់តាក់ទិក ថ្មីៗនេះបានកត់ត្រាសីតុណ្ហភាពខ្ពស់ថ្មីប្រចាំខែកក្កដា រហូតដល់ ៨,៧ អង្សាសេ។
អ្នកវិទ្យាសាស្ត្រផ្នែកអាកាសធាតុ លោក Friederike Otto ដែលបម្រើការនៅវិទ្យាស្ថាន Grantham សម្រាប់ការប្រែប្រួលអាកាសធាតុ និងបរិស្ថានក្នុងមហាវិទ្យាល័យ Imperial College London បានថ្លែងប្រាប់រ៉យទ័រថា កំណត់ត្រាសីតុណ្ហភាពខ្ពស់ថ្មី «មិនមែនជាព្រឹត្តិការណ៍ដ៏សំខាន់មួយដែលយើងគួរតែអបអរសារទនោះទេ»។ លោកបន្តថា៖ «វាជាការកាត់ទោសប្រហារជីវិតសម្រាប់មនុស្ស និងប្រព័ន្ធអេកូឡូស៊ី»។
គួរគូសបញ្ជាក់ថា អ្នកវិទ្យាសាស្ត្របាននិយាយថា ការប្រែប្រួលអាកាសធាតុ បូករួមនឹងលំនាំបាតុភូតអ៊ែលនីណូ (El Nino) គឺជាកត្តាជំរុញ ធ្វើឱ្យកម្ដៅរបស់ផែនដីឈានដល់ចំណុចត្រាកាលពីថ្ងៃចន្ទ៕
ប្រែសម្រួល៖ហួន ឌីណា ប្រភព៖ World registers hottest day on record on Jul 3