ក្រុមហ៊ុនមួយរបស់ជប៉ុន មានបំណងវិនិយោគក្នុងខេត្តរតនគិរី លើគម្រោងភ្លើងបំភ្លឺផ្លូវសាធារណៈវៃឆ្លាត
រតនគីរី៖ តំណាងក្រុមហ៊ុន Mine bee Mitsumi របស់ជប៉ុន បានជួបពិភាក្សាជាមួយអភិបាលខេត្តរតនគិរី ពីស្ថានភាពនៃការប្រើប្រាស់អំពូល Smart City ដែលនឹងមានបំណងចង់វិនិយោគលើគម្រោងភ្លើងបំភ្លឺផ្លូវសាធារណៈវៃឆ្លាត ដើម្បីចូលរួមចំណែកបន្ថែមទៀតដល់ការអភិវឌ្ឍខេត្តភាគឦសានមួយនេះ។
ក្នុងជំនួបពិភាក្សាការងារគ្នានេះបានធ្វើឡើងកាលពីថ្ងៃទី៤ខែកក្កដារវាងឯកឧត្តម ញ៉ែម សំអឿន អភិបាលខេត្តរតនគិរី ជាមួយនឹងតំណាងក្រុមហ៊ុន Mine bee Mitsumi ដែលដឹកនាំដោយលោក អា អូគី។
យោងតាមមន្ទីរព័ត៌មានខេត្តរតនគិរី បានឱ្យដឹងថា ក្នុងកិច្ចពិភាក្សានេះ លោក អា អូគី បានលើកឡើងពីវិសាលភាពនៃប្រតិបត្តិការអាជីវកម្មរបស់ក្រុមហ៊ុននៅក្នុងប្រទេសជប៉ុនទាក់ទងនឹងការវិនិយោគលើគម្រោងភ្លើងបំភ្លឺផ្លូវសាធារណៈវៃឆ្លាត(Smart LED) និងមានបំណងចង់វិនិយោគលើវិស័យនេះនៅក្នុងខេត្តរតនគិរី ខណៈដែលលោកក៏បានសម្តែងនូវសុឆន្ទៈក្នុងការសហប្រតិបត្តិការជាមួយរដ្ឋបាលខេត្តរតនគិរី ដើម្បីចូលរួមចំណែកបន្ថែមទៀតដល់ការអភិវឌ្ឍខេត្តភាគឦសានមួយនេះ។
ជាការឆ្លើយតបឯកឧត្តម ញ៉ែម សំអឿន បានលើកឡើងថា អាជ្ញាធរខេត្តពិតជាស្វាគមន៍ចំពោះក្រុមហ៊ុនជប៉ុន ដែលមានបំណងចង់វិនិយោគលើគម្រោងភ្លើងបំភ្លឺផ្លូវសាធារណៈវៃឆ្លាតក្នុងខេត្តនេះ ពីព្រោះខេត្តរតនគិរីជាខេត្តដែលមានសក្តានុពលទាំងធនធានធម្មជាតិ និងទាំងវប្បធម៌ ប្រពៃណីរបស់ជនជាតិដើមភាគតិច។
ឯកឧត្តមថ្លែងថា ៖ «រដ្ឋបាលខេត្តសូមគាំទ្រ និងការប្តេជ្ញាចិត្តយ៉ាងមុតមាំ ដើម្បីស្វាគមន៍ និងជួយសម្រួលដល់ក្រុមហ៊ុនរបស់ជប៉ុនដែលមានបំណងមកវិនិយោគនៅក្នុងខេត្តរតនគិរីយើងផងដែរ»។
ជុំវិញរឿងនេះ លោក ហូ វណ្ណឌី ទីប្រឹក្សាសមាគមទេសចរណ៍កម្ពុជា បានប្រាប់ឱ្យដឹងថា លោកជឿជាក់ថា ក្រុមហ៊ុននេះមានទស្សនវិស័យឆ្ងាយណាស់ ពីព្រោះកន្លងមកការវិនិយោគរបស់ក្រុមហ៊ុនជប៉ុនដែលធ្វើជាលើកដំបូងគេក្នុងវិស័យទេសចរណ៍មានការរីកចម្រើនខ្លាំង គឺពួកគាត់បានវិនិយោគនៅក្នុងខេត្តសៀមរាបផងដែរ។
លោកបន្តថា ដូច្នេះហើយ ប្រសិនជាពួកគាត់ផ្ដោតសំខាន់ទៅខាងខេត្តភាគឥសាន្តនៃប្រទេសកម្ពុជា ទៅលើវិស័យណាមួយក៏ដោយ លោកថាប្រាកដជាតំបន់ទាំងនោះនៃភាគឦសានប្រទេស អាចនឹងធ្វើឱ្យវិស័យទេសចរណ៍ងើបឡើងខ្លាំង។
លោក ហូ វណ្ណឌី បញ្ជាក់ថា ៖ «ការវិនិយោគរបស់ជប៉ុនមកលើខេត្តរតនគិរី ដែលជាខេត្តភាគឦសានប្រទេស យើងជឿកជាក់ថា គាត់នឹងផ្ដល់នូវមេរៀនល្អៗ ជាពិសេសការរក្សានូវប្រពៃណី វប្បធម៌ជនជាតិដើម ហើយក្រៅពីនេះ គាត់ក៏អាចនឹងមានការវិនិយោគទៅលើតំបន់ទាក់ទាញ ដែលជាកន្លែងទេសចរណ៍ធម្មជាតិផងដែរ»។
លោកបានបន្ថែមថា ការវិនិយោគរបស់ក្រុមហ៊ុនជប៉ុនភាគច្រើន ក៏ផ្តោតទៅលើរឿងគុណធម៌ មិនមែនគិតតែរឿងផលចំណេញពីកម្ពុជានោះទេ ហេតុនេះហើយប្រជាពលរដ្ឋមូលដ្ឋានដែលស្ថិតក្នុងគម្រោងវិនិយោគរបស់ពួកគាត់ គឺតែងតែទទួលនូវអ្វីដែលជាខ្នាតគំរូដ៏ល្អមួយរបស់ប្រទេសជប៉ុន៕
ដោយ៖ជា សុខនី