ចិនលុបចោលដំណើរទស្សនកិច្ចរបស់ប្រធានគោលនយោបាយការបរទេសសហភាពអឺរ៉ុប
ប៉េកាំង៖ តាមការចុះផ្សាយរបស់ទីភ្នាក់ងារសារព័ត៌មានផ្សេងៗកាលពីថ្ងៃពុធ បានឱ្យដឹងថា ប្រទេសចិនបានលុបចោលដំណើរទស្សនកិច្ចរបស់ប្រធានគោលនយោបាយការបរទេសសហភាពអឺរ៉ុប លោក ចូសេប ប៊ររ៉ែល(Josep Borrell) ដែលគ្រោងនឹងធ្វើទស្សនកិច្ចទៅទីក្រុងប៉េកាំងនៅសប្តាហ៍ក្រោយ ។
មុនការលុបចោលនេះ ឯកអគ្គរដ្ឋទូតសហភាពអឺរ៉ុបប្រចាំនៅចិន លោក Jorge Toledo បានឱ្យដឹងថា លោក Josep Borrell និងអ្នកការទូតចិន រំពឹងថានឹងពិភាក្សាគ្នាអំពីពាណិជ្ជកម្ម សិទ្ធិមនុស្ស និងសង្គ្រាមនៅអ៊ុយក្រែន។
ជុំវិញការលុបចោលនេះ អ្នកនាំពាក្យសហភាពអឺរ៉ុប លោកស្រី Nabila Massrali បាននិយាយប្រាប់ទីភ្នាក់ងារសារព័ត៌មាន AP តាមរយៈសារអេឡិចត្រូនិកថា៖ «ជាអកុសល យើងទទួលបានដំណឹងពីសមភាគីចិនថា កាលបរិច្ឆេទដែលបានរំពឹងទុកនៅសប្តាហ៍ក្រោយ មិនអាចធ្វើទៅបានទេ ហើយឥឡូវនេះយើងត្រូវស្វែងរកជម្រើសជំនួស»។ លោកស្រីបន្ថែមថា៖ «ចិនជាអ្នកត្រូវប្រាប់មូលហេតុ។ យើងនឹងសម្របខ្លួន ហើយស្វែងរកកាលបរិច្ឆេទថ្មីជាមួយគ្នា»។
ចំណែកឯក្រសួងការបរទេសចិនឯណោះវិញ បាននិយាយថា ទីក្រុងប៉េកាំងយកចិត្តទុកដាក់ខ្ពស់ចំពោះទំនាក់ទំនងចិន-អឺរ៉ុប ហើយបានរក្សាការផ្លាស់ប្តូរជាមួយអឺរ៉ុបនៅគ្រប់កម្រិត និងក្នុងទិដ្ឋភាពផ្សេងៗ។ អ្នកនាំពាក្យក្រសួង លោក Wang Wenbing បាននិយាយក្នុងសន្និសីទសារព័ត៌មាននៅទីក្រុងប៉េកាំងថា លោក Borrell នឹងទទួលការស្វាគមន៍ចូលទៅចិន «ឱ្យបានឆាប់តាមដែលអាចធ្វើទៅបាន តាមភាពងាយស្រួលនៃភាគីទាំង២»។
គួរបញ្ជាក់ថា ការវិវត្តន៍ចុងក្រោយនេះកើតមានឡើងបន្ទាប់ពីសហភាពអឺរ៉ុបបានអនុម័តលើសំណើនាំចូលប្រភពវត្ថុធាតុដើមសំខាន់ៗពីប្រទេសផ្សេងៗក្រៅតែពីចិន ក្នុងកិច្ចប្រជុំកំពូលមួយកាលពីសប្ដាហ៍មុន។ យ៉ាងណាមិញ ប្លុកបាននិយាយថា ខ្លួនមិនចង់ងាកចេញពីចិនទាំងស្រុងនោះទេ។
នេះគឺជាលើកទី២ ហើយដំណើរទស្សនកិច្ចទៅទីក្រុងប៉េកាំងរបស់លោក Borrell ត្រូវបានលុបចោលនៅក្នុងឆ្នាំនេះ។ កាលពីខែមេសា ដំណើរទស្សនកិច្ចរបស់លោក ត្រូវបានពន្យារពេលដោយសារតែលោកធ្វើតេស្តវិជ្ជមានជំងឺកូវីដ១៩។
ក្នុងសុន្ទរកថាដែលរៀបចំសម្រាប់ទស្សនកិច្ចកាលពីខែមេសា លោក Borrell បាននិយាយថា សហភាពអឺរ៉ុបអាចជឿទុកចិត្តលើប្រទេសចិនបាន លុះត្រាតែប្រទេសនេះស្វែងរកសន្តិភាពនៅអ៊ុយក្រែនដែរ។ កន្លងមក ចិនតាំងខ្លួនជាអ្នកអព្យាក្រឹតជុំវិញសង្រ្គាមនៅអ៊ុយក្រែន ខណៈបន្តមិនថ្កោលទោសរុស្ស៊ី ហើយរៀបចំសមយុទ្ធយោធាជាមួយប្រទេសនេះ។ ក្រៅតែពីពាណិជ្ជកម្ម ចិនក៏មានបញ្ហាចម្រូងចម្រាស់ជាមួយប្លុកអឺរ៉ុប ជុំវិញបញ្ហាសិទ្ធិមនុស្សផងដែរ៕
ប្រែសម្រួលដោយ៖ ហួន ឌីណា
ប្រភព៖ China cancels visit from EU foreign policy chief Josep Borrell aljazeera.com/news/2023/7/5/china-cancels-visit-from-eu-minister-josep-borrel
