អ្នកជំនួញនៅក្រុងហូជីមិញ ប្រឈមជាប់ពន្ធនាគារអស់មួយជីវិត ពាក់ព័ន្ធបទឆបោកផ្នែកវេជ្ជសាស្រ្ត ក្នុងសម័យកូវីដ ១៩
ហាណូយ៖ នាយកក្រុមហ៊ុន HBC International Trading (HBC) ដែលមានមូលដ្ឋាននៅទីក្រុងហូជីមិញ ឈ្មោះ Bui Quang Hai រងការចោទប្រកាន់ពីបទឆបោកផ្នែកវេជ្ជសាស្រ្ត ដើម្បីកិបកេងប្រាក់ជាង ៣,២ លានដុល្លារអាមេរិកពីដៃគូជំនួយបរទេសចំនួន៣ ក្នុងអំឡុងពេលជំងឺកូវីដ១៩កំពុងរីករាលដាលខ្លាំង។ នេះបើតាមការចុះផ្សាយរបស់កាសែត VnEpress ។
រដ្ឋអាជ្ញាក្រុងហូជីមិញ បានឱ្យដឹងនៅថ្ងៃពុធថា លោក Hai បានទាញយកអត្ថប្រយោជន៍ពីកង្វះខាតឧបករណ៍វេជ្ជសាស្ត្រជាសកលក្នុងអំឡុងជំងឺកូវីដរាតត្បាតនៅពាក់កណ្តាលឆ្នាំ ២០២០។
លោកបានចុះហត្ថលេខាលើកិច្ចសន្យាដែលមានតម្លៃ ៦,៣៥ លានដុល្លារ ដើម្បីផ្តល់ស្រោមដៃវេជ្ជសាស្រ្តដល់ក្រុមហ៊ុនហុងកុង PDP ។ ក្រុមហ៊ុនបានផ្ទេរប្រាក់ជាង ១,៩ លានដុល្លារជាប្រាក់កក់ និង ២១០ ០០០ ដុល្លារ ជាថ្លៃកិច្ចសន្យា មុនពេលកិច្ចសន្យាត្រូវបានលុបចោល។ ប៉ុន្តែ HBC មិនបានប្រគល់ប្រាក់វិញទេ។
នៅក្នុងខែវិច្ឆិកា ឆ្នាំ ២០២០ លោក Hai បានចុះកិច្ចសន្យាស្រដៀងគ្នានេះ ដើម្បីផ្ដល់ស្រោមដៃពេទ្យ ហើយបានទទួលប្រាក់ចំនួន ៥១២ ០០០ ដុល្លារ ពីក្រុមជប៉ុន និងប្រាក់ ៦០៧ ០០០ ដុល្លារពីក្រុមហ៊ុនអាមេរិកមួយ។ ប៉ុន្តែក្រុមហ៊ុនរបស់លោក Hai មិនដែលផលិតទិញ ឬចែកចាយស្រោមដៃដូចដែលបានសន្យានោះឡើយ។
បើតាមកាសែត VnExpress រាល់បទចោទប្រកាន់ទាំអស់នេះ អាចឱ្យលោក Hai ត្រូវប្រឈមមុខនឹងការកាត់ទោសជាប់ពន្ធនាគារអស់មួយជីវិត។
ក្នុងអំឡុងពេលស៊ើបអង្កេត លោក Hai បានអះអាងថា លោកគ្រាន់តែជានាយកក្រុមហ៊ុននៅលើក្រដាសស្នាមប៉ុណ្ណោះ ហើយថាបុរសម្នាក់ទៀតឈ្មោះ Do Trung Duong បានចេញបញ្ជាទាំងអស់។ នាពេលនេះ ការស៊ើបអង្កេតលើតួនាទីរបស់ លោក Duong ក្នងសំណុំរឿងឧក្រិដ្ឋកម្មនេះ កំពុងបន្ត៕
ប្រែសម្រួលដោយ៖ ហួន ឌីណា
ប្រភព៖ HCMC businessman charged for $3.2M Covid medical scam https://e.vnexpress.net/news/news/hcmc-businessman-charged-for-3-2m-covid-medical-scam-4625590.html
