ប៉ូលិសហុងកុង ចាប់ខ្លួនបុរសបួននាក់ពីបទបានជួយសកម្មជនបរទេសប្រឆាំងរដ្ឋាភិបាល
ហុងកុង៖ ក្រុមប៉ូលិសសន្តិសុខជាតិហុងកុងកាលពីថ្ងៃទី ៥ ខែកក្កដានេះ បានឃាត់ខ្លួនបុគ្គលបួននាក់ពីបទសង្ស័យថាបានជួយក្រុមប្រឆាំងដែលមានមូលដ្ឋាននៅក្រៅប្រទេស និងការលើកកម្ពស់ឯករាជ្យពីប្រទេសចិន។ការឃាត់ខ្លួននេះ ធ្វើឡើងក្រោយពេលពីរថ្ងៃបន្ទាប់ពីតុលាការចេញដីកា ។
នាយកដ្ឋានសន្តិសុខជាតិនៃប៉ូលិសហុងកុង បាននិយាយនៅក្នុងសេចក្តីថ្លែងការណ៍មួយថា៖«បុរសទាំងបួននាក់ត្រូវបានគេសង្ស័យថាបានទទួលជំនួយពីក្រុមហ៊ុន បណ្ដាញសង្គម និងកម្មវិធីទូរសព្ទដើម្បីគាំទ្រមនុស្សដែលបានភៀសខ្លួនទៅក្រៅប្រទេស ហើយបន្តធ្វើសកម្មភាពដែលបង្កគ្រោះថ្នាក់ដល់សន្តិសុខជាតិ»។
បុរសទាំងនេះត្រូវបានគេសង្ស័យថាបានបំពានច្បាប់សន្តិសុខជាតិ ដែលទីក្រុងប៉េកាំងបានដាក់លើទីក្រុងហុងកុងក្នុងឆ្នាំ២០២០ ដែលជាលទ្ធផលនៃរលកនៃក្រុមអ្នកតវ៉ាលទ្ធិប្រជាធិបតេយ្យ។នេះបើយោងតាមសេចក្តីថ្លែងការណ៍របស់ប៉ូលិសបានគូសបញ្ជាក់ពី «ការសង្ស័យនៃការសមគំនិតក្នុងការឃុបឃិតជាមួយកងកម្លាំងបរទេស និងធ្វើសកម្មភាពក្នុងចេតនាបំបះបោរ»។
បើតាមសេចក្ដីថ្លែងការណ៍ដដែលនេះ «ពួកគេក៏ត្រូវបានគេសង្ស័យថា បានផ្សព្វផ្សាយសារបង្ហោះម្តងហើយម្តងទៀតក្នុងចេតនាបំបះបំបោរនៅលើវេទិកាប្រព័ន្ធផ្សព្វផ្សាយសង្គម រួមទាំងខ្លឹមសារដែលញុះញង់ឱ្យមានការស្អប់ខ្ពើមចំពោះអាជ្ញាធរកណ្តាល (ចិន) និងរដ្ឋាភិបាលនៃតំបន់រដ្ឋបាលពិសេសហុងកុង និងបានតស៊ូមតិ “ឯករាជ្យភាពហុងកុង” ។
ប៉ូលិសបានអះអាងថា ពួកគេបានធ្វើការឆែកឆេរតាមដីការបស់តុលាការលើលំនៅឋាន និងកន្លែងធ្វើការរបស់ជនជាប់ចោទ ហើយបានប្រមូលយកឯកសារពាក់ព័ន្ធមួយចំនួន និងឧបករណ៍ទំនាក់ទំនងអេឡិចត្រូនិកផងដែរ។ ចំពោះប្រាក់រង្វាន់វិញ រដ្ឋាភិបាលបានផ្តល់ប្រាក់រង្វាន់ចំនួន ១លានដុល្លារហុងកុង ស្មើនឹង(127,829.83 ដុល្លារអាមេរិក) សម្រាប់ដំណឹងនីមួយៗ ដែលអាចឈានទៅរកការចាប់ខ្លួនសកម្មជនបរទេសទាំងប្រាំបីនាក់បាន។
ក្រុមសកម្មជនបរទេសមានទីតាំងក្នុងប្រទេសមួយចំនួន រួមមាន សហរដ្ឋអាមេរិក ចក្រភពអង់គ្លេស និងអូស្ត្រាលី៕
ប្រែសម្រួល៖ នី ស្រីពៅ
