ការនាំចេញស្វាយចន្ទី របស់កម្ពុជា បានថយចុះជាង១២ភាគរយនៅឆមាសទី១ឆ្នាំ ២០២៣
ភ្នំពេញ៖ មន្រ្តីអ្នកនាំពាក្យនៃក្រសួងកសិកម្ម រុក្ខាប្រមាញ់ និងនេសាទបានឱ្យដឹងថា ចាប់ពីខែមករាដល់មិថុនា ឆ្នាំ២០២៣ នេះ ការនាំចេញគ្រាប់ស្វាយចន្ទីទៅក្រៅប្រទេស សម្រេចបានក្នុងបរិមាណជាង ៣៦៣ ១៧៣ តោន ។ ចំនួននេះមានការថយចុះ ១២,៦៧ភាគរយ បើធៀបនឹងរយៈពេលដូចគ្នាក្នុងឆ្នាំ២០២២។
កញ្ញា អ៊ឹម រចនា អ្នកនាំពាក្យនៃក្រសួងកសិកម្ម រុក្ខាប្រមាញ់ និងនេសាទ បានបញ្ជាក់ថា ការនាំចេញគ្រាប់ស្វាយចន្ទីថយចុះក្នុងមាសទី១ឆ្នាំនេះ ដោយសារស្ថានភាពមិនច្បាស់លាស់ខាងទីផ្សារ និងបញ្ហាបម្រែបម្រួលអាកាសធាតុនាំឱ្យប៉ះពាល់ដល់ទិន្នផល។ អ្នកនាំពាក្យដដែលបានបន្ថែមថា ៖ «មូលហេតុនៃការថយចុះនេះ ក៏បណ្តាលមកពីកត្តាមួយទៀតដែរ គឺបញ្ហាគុណភាពនៃដំណាំ ហើយការនាំចេញដោយគ្មានការស្នើសុំវិញ្ញាបនបត្រភូតគាមអនាម័យ (ការនាំចេញក្រៅផ្លូវការ) តាមច្រក របៀងទៅកាន់ប្រទេសវៀតណាម និងប្រទេសថៃ មួយចំនួនទៀតមិនមានការកត់ត្រា»។
បើតាមលោក អួន ស៊ីឡុត ប្រធានសមាគមស្វាយចន្ទីកម្ពុជា (ស.ស.ក) បានប្រាប់ឱ្យដឹងនៅថ្ងៃទី៩ ខែកក្កដាថា កត្តាដែលធ្វើឲ្យធ្លាក់ចុះដោយសារកសិករកាប់ស្វាយចន្ទីចោលអស់ប្រមាណ១០ម៉ឺនហិកតា ក្នុងរយៈពេល២ឆ្នាំចុងក្រោយនេះ។
លោកបានបន្ថែមថា បច្ចុប្បន្នភាពផ្ទៃដីក្រៅផ្លូវការ ប្រមូលដោយ ស.ស.ក សរុបផ្ទៃដីដាំដុះស្វាយចន្ទីទូទាំងប្រទេសមានចំនួន ៤៩៣ ០៨៧ ហិកតា ប៉ុន្តែសសក ប៉ាន់ប្រមាណថាមានចំនួនរហូតដល់ ៧០០ ០០០ហិកតា។ ដោយឡែកផ្ទៃដីស្វាយចន្ទីក្រៅតំបន់ សមាគមស្វាយចន្ទីកម្ពុជា ដែលថតដោយក្រុមហ៊ុន AGRITEKK TECHNOLOGIES មានចំនួន ១៣០ ៣៨៣ ហិកតា។
លោក អួន ស៊ីឡុត បានបញ្ជាក់ទៀតថា ៖ «ម្យ៉ាងវិញទៀត កសិករមានធនធានហាលគ្រាប់ទុកលក់នៅពេលគ្រាប់ឆៅឡើងថ្លៃចន្លោះពីខែសីហា និងខែតុលា ទើបគាត់សម្រេចចិត្តលក់ ខណៈដែលកសិករខ្លះទៀតមានតម្រូវការលក់ភ្លាមៗ ព្រោះត្រូវការទូទាត់ជាមួយខាងធនាគារ ឬគ្រឹះស្ថានហិរញ្ញវត្ថុជាដើម»។
លោកបានបន្ថែមថា ក្នុងឆ្នាំ២០២២កន្លងទៅ ទំហំទឹកប្រាក់ដែលបានចាក់បញ្ចូលទៅក្នុងសេដ្ឋកិច្ចជាតិ តាមរយៈការនាំចេញផលិតផលស្វាយចន្ទី មានប្រមាណ ១ ០៧៧ លានដុល្លារ ដែលជាចំនួនដ៏ច្រើនមួយបន្ទាប់ពីស្រូវអង្ករ ដែលនេះ បង្ហាញថា ការអភិវឌ្ឍន៍វិស័យស្វាយចន្ទី ពិតជាមានសារៈសំខាន់ណាស់ សម្រាប់កំណើនសេដ្ឋកិច្ចជាតិ។
លោកប្រាប់ថា ៖ «ដូច្នេះហើយ ទើបសសក បានខិតខំស្វះស្វែរកកិច្ចសហការពីដៃគូពាក់ព័ន្ធនានា ជាពិសេសផ្នែកហិរញ្ញ ប្បទាន ដើម្បីជំរុញការនាំចេញស្វាយចន្ទីនេះ។ កាលពីខែមិថុនា ឆ្នាំ២០២៣ យើងបានសហការជាមួយធនាគារ SME ដើម្បីការជំរុញលទ្ធភាពទទួលបានហិរញ្ញប្បទានសម្រាប់សហគ្រាសធុនតូច និងមធ្យម ដែលជាសមាជិកនៃសមាគម ស្វាយចន្ទីកម្ពុជា ក្នុងការទទួលបានអត្រាការប្រាក់ទាបជាងមុន»។
លោក អួន ស៊ីឡុត បានបន្ថែមដែរថា កិច្ចសហប្រតិបតិ្តការនេះ ជាគោលដៅយុទ្ធសាស្រ្តដែលធនាគារបានកំណត់ ដើម្បីគាំទ្រដល់ការរីកចម្រើននៃវិស័យស្វាយចន្ទីនៅក្នុងប្រទេសកម្ពុជា។
«យើងជឿជាក់យ៉ាងមុតមាំថា ការចុះអនុស្សរណៈនៃការយោគយល់គ្នានេះ គឺជាផ្នែកមួយក្នុងដោះស្រាយបញ្ហាប្រឈមក្នុងខ្សែចង្វាក់ផលិតកម្មស្វាយចន្ទី ក៏ដូចជាជួយលើកកម្ពស់វិស័យឧស្សាហកម្មកែច្នៃស្វាយចន្ទីនៅកម្ពុជា ឲ្យកាន់តែប្រសើរឡើងថែមមួយកម្រិតទៀត»។ នេះបើតាមលោក ស៊ីឡុត បញ្ជាក់បន្ថែម។
បើតាមលោក អួន ស៊ីឡុត ប្រសិនបើរាជរដ្ឋាភិបាលចង់ជំរុញឱ្យវិស័យស្វាយចន្ទីដើរបាន កាន់តែលឿន រាជរដ្ឋាភិបាលត្រូវលើកទឹកចិត្តវិនិយោគិនក្នុងស្រុក ដែលមានទុនច្រើនធ្វើការវិនិយោគលើការកែច្នៃដើម្បីនាំចេញ ជាជាងរង់ចាំវិនិយោគិនបរទេស៕
ដោយ៖វណ្ណ សុជាតា
![](https://asset.ams.com.kh/central/media/2023/07/photo_2023-07-10_09-47-17-1024x682.jpg)
![](https://asset.ams.com.kh/central/media/2023/07/photo_2023-07-10_10-10-08-1024x682.jpg)