ភ្នំពេញ៖​ ប្រមុខរដ្ឋាភិបាលកម្ពុជាសម្ដេចតេជោ ហ៊ុន សែន នាយករដ្ឋមន្រ្តីកម្ពុជាបាន​បន្តអំពាវនាវដល់សមាជិកអង្គការណាតូ(​NATO)និងសម្ព័ន្ធមិត្តសហរដ្ឋអាមេរិក ជួយទប់ស្កាត់កុំឱ្យមានការប្រើប្រាស់គ្រាប់បែកចង្កោមក្នុងសមរភូមិសង្គ្រាមរុស្ស៊ី-អ៊ុយក្រែន បន្ទាប់ពីអ៊ុយក្រែនបានទទួលជំនួយគ្រាប់បែកនេះរាប់សិបម៉ឺនក្នុងកញ្ចប់ជំនួ​យយោធាដែលទីក្រុងវ៉ាស៊ីនតោនផ្តល់ឱ្យ​កាលពីចុងសប្តាហ៍មុននេះ។​

សម្ដេចតេជោ ហ៊ុន​ សែន បាន​អំពាវនាវបែបនេះ តាមរយៈសារនៅលើបណ្តាញសង្គម ធ្វីតធ័រ(Twitter) ផ្លូវការរបស់សម្ដេចនា​យប់ថ្ងៃទី១០ ខែកក្កដា ដែលសម្ដេចបាន​ទទូចឱ្យមានការហាមឃាត់លើការប្រើប្រាស់គ្រាប់បែកចង្កោមពីរវង្វង់សម្ព័ន្ធអាមេរិក ​ពិសេសពីសមាជិកអង្គការណាតូផ្ទាល់ ដែលប្រទេសខ្លះជាសមាជិកនៃអនុសញ្ញាទីក្រុ​ងអូស្លូដែលហាមប្រាមការ​ប្រើប្រាស់គ្រាប់បែកចង្កោមនេះក្នុងសឹកសង្គ្រាមតទៅទៀត។​

សម្ដេចតេជោ ហ៊ុន សែន បាន​បញ្ជាក់​ថា ៖ «ក្នុងនាមប្រមុខរាជរដ្ឋាភិបាលកម្ពុជា ខ្ញុំសូមបន្តអំពាវនាវដល់ប្រទេសជាសមាជិកអ​ង្គការ NATO និងជាប្រទេស​សម្ព័ន្ធមិត្តអាមេរិកមួយចំនួន ដូចជាចក្រភពអង់គ្លេស អេស្ប៉ាញ អាល្លឺម៉ង់ កាណាដា ដែលសុទ្ធសឹងតែជាប្រទេសហត្ថលេខីនៃអនុសញ្ញាហាមឃាត់គ្រាប់បែកចង្កោម សូមមានភាពទទួលខុសត្រូវ និងចូលរួមទប់ស្កាត់ឱ្យខានតែបាន ទៅដល់ប្រធានាធិបតីអាមេរិក ចូ បៃដិន និងប្រ​ធានាធិបតីអ៊ុយក្រែន កុំឱ្យប្រើប្រាស់អាវុធដ៏កាចសាហាវនេះ»។​

សូម​បញ្ជាក់ថា កាលពីថ្ងៃទី៩ ខែកក្កដាកន្លងទៅសម្ដេចតេជោ ហ៊ុន សែន នាយករដ្ឋមន្ត្រីកម្ពុជាក៏បានអំពាវនាវដល់ប្រធានាធិបតីអា​មេរិកចូ បៃឌិន(Joe Biden) និងប្រធានាធិបតីអ៊ុយក្រែន លោក វ៉ូឡូឌីមៀ ហ្ស៉ីលែនស្គី (Volodymyr Zelensky) ឱ្យពិចារណាមិនប្រើប្រាស់គ្រាប់បែកចង្កោមនេះដែរ។សម្ដេចតេជោបានបង្ហាញហេតុផលថា​ ដើម្បីបង្ការហានិភ័យដល់ប្រជាជនអ៊ុយក្រែនក្នុងរយៈពេលវែង ខណៈកម្ពុជាបាននិងកំពុងរងគ្រោះពីឥទ្ធិពលគ្រាប់បែកនេះអស់រយៈពេលជាងកន្លះសតវត្សរ៍ទៅហើយ បន្យល់ពីសង្គ្រាមត្រជាក់កាលពីដើមទសវត្សរ៍ឆ្នាំ១៩៧០។​

ពាក់ព័ន្ធនឹងបញ្ហានេះ លោក​ យង់ ពៅ អគ្គលេខាធិការនៃរាជបណ្ឌិត្យសភាកម្ពុជា និងជាអ្នកតាមដានភូ​មិសាស្រ្តនយោបាយអន្តរជាតិមួយរូបក៏បាន​លើកឡើងដែរ​ថា ការបន្តអំពាវនាវហើយអំពាវនាវទៀតរ​បស់កម្ពុជា ដោយសារ​ប្រទេសកម្ពុជា​​ធ្លាប់រងគ្រោះ និងកំពុងរងគ្រោះពីសំណល់យុទ្ធភណ្ឌមិនទាន់ផ្ទុះ គ្រាប់​បែកចង្កោម គ្រាប់មីន ដែលផលិតដោយប្រទេស​មហាអំណាច។

លោកបានបន្តថា នេះ​ជាសារនយោបាយមួយ​ដល់អន្តរជាតិ និងជាពិសេសប្រទេសអ៊ុយក្រែន ដែលការសម្រេចចិត្តប្រើប្រាស់គ្រាប់បែកចង្កោមនឹងបំផ្លាញភាពសុខសាន្តរបស់ប្រទេសយូរអង្វែង។​

លោក យង់ ពៅ បាន​បន្តថា ៖ «ខ្ញុំយល់ថា ការអំពាវនាវរបស់សម្ដេចតេជោនាយករដ្ឋមន្ត្រីកម្ពុជា តិចឬច្រើនមានឥទ្ធិព​ល ជាសារនយោបាយក្នុងកម្រិតអន្តរជាតិ ទោះបីជាមហាអំណាច និងអ៊ុយក្រែនផ្ទាល់មិនស្តាប់ក៏ដោយចុះ ក៏ប៉ុន្តែជាសារប្រាប់ពិភពលោកថា កម្ពុជាកំពុងតែឈឺចាប់ និងរងគ្រោះ ហើយមិនចង់ឱ្យប្រទេសដទៃទៀតរ​ងគ្រោះដូចកម្ពុជា ហើយឱ្យ​អន្តរជាតិពិចារណាជាមួយគ្នា»។​

លោកបាន​បន្ថែមទៀត​ថា ខណៈពេលនេះ​ប្រទេសអ៊ុយក្រែន​ និងរុស្ស៊ីបានប្រើប្រាស់គ្រាប់មីន និងយុទ្ធភ​ណ្ឌមិនទាន់ផ្ទុះ ដែលភាគច្រើនមាន​នៅលើទឹកដីអ៊ុយក្រែន ហើយបើអ៊ុយក្រែនសម្រេចប្រើប្រាស់គ្រា​ប់បែ​កចង្កោមទៀត នោះនឹងធ្វើឱ្យ​អ៊ុយក្រែនជួបផលបំបាករយៈពេលវែង ​ពិសេសនៅដំណាក់កាលរាវរកយុទ្ធភ​ណ្ឌមិនទាន់ផ្ទុះក្រោយចប់សង្គ្រាម ដែលជាផលលំបាកដល់​ប្រជាជនអ៊ុយក្រែនក្នុងការប្រើប្រាស់​ដីធ្លី។​

ទាក់ទងនឹង​គ្រាប់បែកចង្កោមនេះដែរ ​ឯកឧត្តមទេសរដ្ឋមន្រ្តី លី ធុជ អនុប្រធានទី១ នៃអាជ្ញាធរមីនកម្ពុជា កាលពីថ្ងៃទី១០ ខែកក្កដា ក៏បាន​​ប្រកាសគាំទ្រលើសេចក្តីអំពាវនាវរបស់សម្ដេចតេជោ ហ៊ុន សែន ក្នុងនាមជាសហគមន៍សកម្មភាពមីន និងប្រទេសដែល​រងគ្រោះដោយសារគ្រាប់បែកចង្កោមនេះ​ផងដែរ។​​

លោកបានសរសេរលើបណ្តាញសង្គមហ្វេសប៊ុកលោកថា ​ការសម្រេចចិត្តក្នុងការប្រើប្រាស់គ្រាប់បែកចង្កោ​មក្នុងសង្រ្គាម នឹងបង្កការបំផ្លិចបំផ្លាញ និងបង្កវិនាសកម្មយ៉ាងធ្ងន់ធ្ងរដល់ប្រជាពលរដ្ឋស្លូតត្រង់ និងជនស៊ីវិលទាំងក្នុងសង្រ្គាម និងក្រោយសង្រ្គាម។

ឯកឧត្តម លី ធុជ បញ្ជាក់ថា ៖ «ការប្រើប្រាស់គ្រាប់បែកចង្កោមក្នុងការកំចាត់គ្នាទៅវិញទៅមក គ្រាន់តែរយៈពេលខ្លី ប៉ុន្តែការដោះស្រាយគឺប្រើប្រាស់រយៈពេលវែង ចំណាយធនធានច្រើន និងតែងតែបង្កការគ្រោះថ្នា​ក់ជាប្រចាំ ជាពិសេសកុមារា​កុមារី ក៏ដូចជាបង្កឲ្យមានវិបត្តិសង្គមធ្ងន់ធ្ងរផងដែរ»។​​

សូម​ជម្រាប​ថា អនុសញ្ញាទីក្រុងអូស្លូ ជាអនុសញ្ញាអន្តរជាតិមួយ ដែលហាមប្រាមមិនឲ្យមានប្រើប្រាស់គ្រា​ប់បែកចង្កោមនេះតទៅទៀតនៅក្នុងសមរភូមិសង្គ្រាមដែលមានប្រទេសចំនួន ១២៣ប្រទេសបានចូលរួម ក្នុងនោះប្រទេស ១១១ ជាសមាជិក និងប្រទេសជារដ្ឋហត្ថាលេខីចំនួន ១២។ ទោះជាយ៉ាងណា ប្រទេសមហាអំណាចមួយចំនួន ក្នុងនោះរួមមាន រុស្ស៊ី និងសហរដ្ឋអាមេរិកមិនបានចុះហត្ថលេខាលើអនុសញ្ញាអន្តរជាតិមួយនេះឡើយ៕ ដោយ៖សំបាន ច័ន្ទដារ៉ា