​កៀវ៖ ប្រធានាធិបតី​កូរ៉េ​ខាង​ត្បូង​ លោក​ យូន ស៊កយល​ សន្សា​ផ្ដល់​ជំនួយ​ ១៥០ លាន​ដុល្លារ​ទៅ​អ៊ុយក្រែន​ក្នុង​ទស្សនកិច្ច​ដ៏​គួរ​ឱ្យ​ភ្ញាក់​ផ្អើល​​ទៅ​កាន់​ប្រទេស​នេះ​ដែល​ជា​ការ​បង្ហាញ​ការ​គាំទ្រ​ចំពោះ​ក្រុង​កៀវ​ ប្រឆាំង​នឹង​កា​រ​ឈ្លាន​ពាន​របស់​រុស្ស៊ី​។  ​

​ការិយាល័យ​របស់​លោក​ យូន​ បាន​ឱ្យ​ដឹង​កាល​ពី​ថ្ងៃ​សៅរ៍​ថា​ លោក​បាន​ធ្វើ​ដំណើរ​ទៅ​អ៊ុយក្រែន​ជាមួយ​ភ​រិយា​ គឺ​លោក​ស្រី​ Kim Keon-hee ​បន្ទាប់​ពី​​កិច្ច​ប្រជុំ​កំពូល​អង្គការ​ណាតូ​នៅ​ប្រទេស​លីទុយអានី​។ ​នេះ​គឺ​ជា​ដំ​ណើរ​ទស្សនកិច្ច​លើក​ដំបូង​បំផុត​របស់​លោក​ចាប់​តាំង​ពី​រុស្ស៊ី​បើក​ការ​ឈ្លាន​ពានអ៊ុយក្រែន​​ទូទាំង​ប្រទេ​ស​​នៅ​ចុង​ខែ​កុម្ភៈ​ឆ្នាំ​មុន​មក​។

ក្នុង​ជំនួប​ជាមួយ​ប្រធានាធិបតី​អ៊ុយក្រែន​លោក​ វ្ល៉ូឌីមៀរ ហ្សេលេនស្គី​ លោកប្រធានាធិបតី​ យូន​ បាន​​សន្យា​​ដើម្បី​ «​ពង្រីក​ទំហំ​»​ នៃ​ជំនួយ​យោធា​​ធុន​ស្រាល​​ដល់​អ៊ុយក្រែន​ដោយ​បន្ថែម​ថា កូរ៉េខាង​ត្បូង​នឹង​​បង្កើន​ជំនួយ​​មនុស្ស​​ធម៌​​ដល់​ ១៥០ លាន​ដុល្លារ​ក្នុង​ឆ្នាំ​ ២០២៣​ ពី​ ១០០ លាន​ដុល្លារ​កាល​ពី​ឆ្នាំ​មុន​។  ​

​លោក​ យូន​ ក៏​បាន​និយាយ​ផង​ដែរ​ថា​ លោក​ និង​​លោក​ ហ្សេលេនស្គី​ បាន​​យល់​ព្រម​លើ​កិច្ច​សហ​ប្រតិបត្តិការ​លើ​កិច្ច​ខិត​ខំ​ប្រឹង​ប្រែង​កសាងអ៊ុយក្រែន​ឡើង​វិញ​ពេល​សង្រ្គាម​បញ្ចប់​។ ​​លើស​ពី​នេះ​ ប្រទេស​កូរ៉េ​ខាង​ត្បូង​ ក៏​នឹង​ចាប់​ផ្តើម​មូលនិធិ​អាហារូបករណ៍​ ដាក់​ឈ្មោះ​តាម​លោក​ យូន និង​លោក​ ហ្សេលេនស្គី​ ដើម្បី​​ពង្រីក​ការ​គាំទ្រ​ដល់​និស្សិត​អ៊ុយក្រែន​នៅ​ប្រទេស​កូរ៉េ​ខាង​ត្បូង​ផង​ដែរ​។​

ចំណែក​ឯ​លោក​ ហ្សេលេនស្គី​ វិញ​ បាន​​ថ្លែង​អំណរ​គុណ​ដល់​កូរ៉េខាង​ត្បូង​ ​សម្រាប់​ «​ការ​គាំទ្រ​យ៉ាង​ម៉ឹង​ម៉ាត់​ចំពោះ​អធិបតេយ្យ​ភាព​ និង​បូរណភាព​ទឹក​ដី​របស់​អ៊ុយក្រែន​»​ និង​​ជំនួយ​ផ្នែក​នយោបាយ ​សន្តិសុខ​ សេដ្ឋកិច្ច ​និង​មនុស្ស​ធម៌​ដ៏​សំខាន់​ ចាប់​តាំង​ពី​ការ​ឈ្លាន​ពាន​ចាប់​ផ្ដើម​មក​​។

​លោក​ ហ្សេលេនស្គី បាន​និយាយ​ថា ​៖ «​ថ្ងៃ​នេះ ​ក្នុង​ដំណើរ​ទស្សនកិច្ច​លើក​ដំបូង​របស់​ប្រធានាធិបតី​កូរ៉េ​ខាង​ត្បូងមក​​កាន់​​អ៊ុយក្រែន​ ជា​​ប្រវត្តិ​សាស្រ្ត​នៃ​ទំនាក់​ទំន​ង​របស់​យើង​ យើង​បាន​និយាយ​ពី​អ្វី​គ្រប់​យ៉ាង​ដែល​មាន​សារៈ​សំខាន់​សម្រាប់​មនុស្ស​​ ក្នុង​​ការ​ឆ្ពោះ​ទៅ​រក​ការ​រស់​នៅ​ដែល​​ធម្មតា​ និង​ប្រកប​ដោយ​សុវត្ថិភា​ព​»។

គួរ​បញ្ជាក់​ថា​ នា​ពេល​កន្លង​មក​ ​​កូរ៉េ​ខាង​ត្បូង​ ដែល​ជា​​សម្ព័ន្ធមិត្ត​របស់​សហរដ្ឋ​អាមេរិក​ បាន​ប្រឈម​មុខ​នឹង​សម្ពាធ​​ឱ្យ​ផ្តល់ជំនួយ​សព្វាវុធ​​អាវុធ​ដល់​អ៊ុយក្រែន ​​ខណៈ​រដ្ឋ​បាល​លោក​ យូន​ ប្រកាន់​ជំហរ​លើ​ការ​ផ្ដល់​ជំនួ​យ​មនុស្ស​ធម៌​ និង​ហិរញ្ញវត្ថុ​ ដោយ​​ប្រយ័ត្ន​ប្រយែង​ពី​ឥទ្ធិពល​របស់​រុស្ស៊ី​​ទៅ​លើ​រដ្ឋ​នុយក្លេអ៊ែរ​កូរ៉េ​ខាង​ជើង​។​

​ថ្មី​ៗ​នេះ​ លោក​ យូន​ បាន​និយាយ​​ថា​​ រដ្ឋបាល​​របស់​​លោក​​កំពុង​រៀប​ចំ​បញ្ជូន​ឧបករណ៍​ និង​រថយន្ត​សង្គ្រោះ​សម្រាប់​ការ​ដោះ​មីន​ តាម​សំណើរ​បស់​អ៊ុយក្រែន​ ហើយ​នឹង​ចូល​រួម​ជាមួយស្ថាប័នផ្ដល់​​​មូលនិធិ​​សម្រាប់​អ៊ុយក្រែន​ របស់​អង្គការ​ណាតូ​៕

ប្រែសម្រួល៖ហួន ឌីណា

ប្រភព​៖ South Korea’s Yoon promises $150m aid after Zelenskyy talks  https://www.aljazeera.com/news/2023/7/15/south-koreas-president-yoon-in-ukraine-to-meet-zelenskyy