មានករណីផ្ទុះហ្គាសនៅហាងសាច់អាំងមួយកន្លែងនៅប្រទេសចិន
ប៉េកាំង៖ ក្រុមមន្ត្រីបានប្រាប់ឱ្យដឹងថា ករណីផ្ទុះធុងហ្គាសនៅភោជនីយដ្ឋានមួយកន្លែងក្នុងខេត្ត Jiangsu ភាគខាងកើតប្រទេសចិនបានសម្លាប់មនុស្សម្នាក់និងរងរបួសម្នាក់ផ្សេងទៀតកាលពីថ្ងៃទី១៧ ខែកក្កដា ។
វីដេអូឃ្លីបមួយបានបង្ហោះតាមប្រព័ន្ធអ៊ីនធឺណិត បានបង្ហាញឱ្យឃើញពីស្ថានភាពហាងមួយចំនួនដែលត្រូវបានបំផ្លាញនៅក្នុងអគារពាណិជ្ជកម្ម ខណៈដែលមនុស្សម្នាក់ត្រូវបានក្រុមអ្នកជួយសង្គ្រោះជម្លៀសចេញពីកន្លែងកើតហេតុ ហើយកម្ទេចកម្ទី និងដើមឈើដែលរងការខូចខាតបានរាយប៉ាយពេញផ្លូវ។ ម្ចាស់ភោជនីយដ្ឋានត្រូវបានប៉ូលិសឃាត់ខ្លួន និងដំណើរការស៊ើបអង្កេត។
គួររំឭកដែរថា កាលពីខែមិថុនា ករណីផ្ទុះហ្គាសនៅភោជនីយដ្ឋានមួយបានសម្លាប់មនុស្ស ៣១ នាក់នៅតំបន់ Ningxia ភាគពាយ័ព្យ ដែលជាការបំផ្ទុះដ៏រន្ធត់បំផុតមួយក្នុងប៉ុន្មានឆ្នាំថ្មីៗនេះ ដែលបានជំរុញឱ្យប្រធានាធិបតីចិន លោក ស៊ី ជីនភីង(Xi Jinping) ចាត់វិធានការឱ្យមន្ត្រីដោះស្រាយបញ្ហាហានិភ័យសុវត្ថិភាពនៅទូទាំងប្រទេសផងដែរ។
ក្រៅពីនេះ ក៏មានការផ្ទុះនៅភោជនីយដ្ឋានពីរផ្សេងទៀតបានកើតឡើងក្នុងរយៈពេលមិនដល់មួយសប្តាហ៍ផង រួមមានមួយនៅខេត្ត Gansu ដែលបានធ្វើឱ្យមនុស្សពីរនាក់រងរបួស។
បន្ទាប់ពីហេតុការផ្ទុះកាលពីថ្ងៃចន្ទ នៅលើបណ្ដាញសង្គមពេញនិយមចិន Weibo ក៏មានការបង្ហាញជាការព្រួយបារម្ភ និងរិះគន់ផងដែរ។
អ្នកប្រើប្រាស់បណ្តាញសង្គមម្នាក់បានបង្ហោះថា ៖ «តើយើងមិនបានរៀនមេរៀនរបស់យើងទេ?»។ ប្រជាពលរដ្ឋម្នាក់ទៀតបាននិយាយដែរថា ៖ «អ្នកដែលបើកហាងសាច់អាំងទាំងអស់គួរតែធ្វើការត្រួតពិនិត្យដោយខ្លួនឯង»។
គ្រោះថ្នាក់ដោយសារការផ្ទុះហ្គាស និងសារធាតុគីមី មិនមែនជារឿងចម្លែកទេនៅក្នុងប្រទេសចិននោះទេ បើទោះជាមានការប្រឹងប្រែងជាច្រើនឆ្នាំដើម្បីពង្រឹងសុវត្ថិភាពក៏ដោយ៕
ប្រែសម្រួល៖នី ស្រីពៅ
ប្រភព៖ China cooking gas explosion kills one at barbecue restaurant
