ទីក្រុងបាងកក ដាក់ដំណើរការ ម៉ូតូសង្គ្រោះបន្ទាន់ ដំបូងបង្អស់របស់ខ្លួនចំនួន ៥០គ្រឿង
ថៃ៖ រដ្ឋបាលក្រុងបាងកក (BMA) បានដាក់ឱ្យដំណើរការនូវម៉ូតូសង្គ្រោះបន្ទាន់ ដំបូងរបស់ខ្លួនដោយមានម៉ូតូសរុបចំនួន ៥០គ្រឿង ដើម្បីផ្តល់សេវាសង្គ្រោះជីវិតបន្ទាន់នៅក្នុងសង្កាត់ទាំង ៥០ ក្នុងទីក្រុងបាងកក នៃព្រះរាជាណាចក្រថៃ។
ម៉ូតូសង្គ្រោះបន្ទាន់ទាំង ៥០ គ្រឿងមានបំពាក់ទៅដោយឧបករណ៍សង្គ្រោះជីវិត។ ចំណែកអ្នកបើកបរគឺសុទ្ធតែជាបុគ្គលដែលបានទទួលការបណ្តុះបណ្តាលពិសេសពីមន្ទីរពេទ្យមុនពេលត្រូវបានដាក់ពង្រាយតាមគោលដៅនានាក្នុងទីក្រុង។
ការសង្គ្រោះដោយម៉ូតូ គឺអាចបញ្ចៀសនូវការកកស្ទះ លើដងផ្លូវដ៏មមាញឹក និងអាចបម្រើដល់ទីតាំង ផ្លូវតូចៗដែលរថយន្តសង្គ្រោះកង់បួនពិបាកទៅដល់ ឬត្រូវចំណាយពេលយូរ។
ម៉ូតូសង្គ្រោះបន្ទាន់ ចំនួន ៥០គ្រឿងដំបូងនេះ ត្រូវបានសម្ពោធជាផ្លូវការនៅឯពិព័រណ៍ BMA ឆ្នាំ២០២៣ របស់ថៃកាលពីថ្ងៃទី១៥ខែកក្កដា កន្លងទៅថ្មីៗនេះ ក្រោមវត្តមានអភិបាលក្រុងបាងកក លោកចាតចា ស៊ីតទីភូន(Chadchart Sittipunt)។
អភិបាលក្រុងបាងកក បាននិយាយថា ៖ «ម៉ូតូគឺជាមធ្យោបាយដែលមានល្បឿនលឿនក្នុងការផ្តល់ជំនួយដើម្បីសង្គ្រោះជីវិតដ៏មានសក្តានុពលដល់ជនរងគ្រោះនៅក្នុងទីក្រុង។ នៅពេលដែលមានអាសន្នកើតឡើងក្រុម ម៉ូតូសង្គ្រោះបន្ទាន់ នឹងអាចទៅដល់កន្លែងកើតហេតុ ឬទៅដល់ទីតាំងអ្នកជំងឺក្នុងរយៈពេល ៨នាទី និងអាចជួយសង្គ្រោះជីវិតពួកគេបាន»។
លោក Chadchart បានបន្តថា ក្រុងបាងកកក៏មានគម្រោងបន្ថែម ម៉ូតូសង្គ្រោះបន្ទាន់ ឱ្យដល់ ២០០ ទៅ ៣០០ គ្រឿង។ លោកថា ការកកស្ទះចរាចរណ៍ និងផ្លូវតូចចង្អៀត គឺជាផលវិបាកសម្រាប់រថយន្តសង្គ្រោះបន្ទាន់ ដើម្បីទៅដល់អ្នកជំងឺធ្ងន់ធ្ងរទាន់ពេលវេលា ដូច្នេះហើយ គម្រោង ម៉ូតូសង្គ្រោះបន្ទាន់ ត្រូវបានដាក់ឱ្យដំណើរការក្រោម «ឧត្តមភាពទាំងប្រាំបួន» របស់ក្រុងបាងកក ដើម្បីលើកកម្ពស់គុណភាពជីវិត។
ម៉ូតូសង្គ្រោះបន្ទាន់ ៥០ គ្រឿងដំបូងនេះ ត្រូវបានដាក់ពង្រាយទៅកាន់មន្ទីរពេទ្យនានាក្នុងទីក្រុងបាងកក ដោយមានការបែងចែងជា ៧តំបន់។
គម្រោងដ៏ថ្មីសន្លាងនេះ ត្រូវបានគាំទ្រដោយបណ្តាញក្រុមម៉ូតូស្ម័គ្រចិត្តមួយនៅប្រទេសថៃគឺ Motorlance Thailand ដែលជាក្រុមជម្រុញឱ្យការប្រើប្រាស់ម៉ូតូសម្រាប់ការសង្គ្រោះបន្ទាន់ កើតឡើង។
យោងតាមសារព័ត៌មានក្នុងស្រុករបស់ថៃបានឱ្យដឹងថា ក្រុមអ្នកបើកបរ ម៉ូតូ-សង្គ្រោះបន្ទាន់ ត្រូវបានបំពាក់ដោយឧបករណ៍មួយដែលអនុញ្ញាត្តឱ្យពួកគេ វិនិច្ឆ័យរោគបឋមបាន។ ក្នុងករណីធ្ងន់ធ្ងរ ពួកគេថែមទាំងអាចបញ្ជូនព័ត៌មានត្រឡប់ទៅមជ្ឈមណ្ឌលគាំទ្រវេជ្ជសាស្ត្រទីក្រុង (UMSC) នៃវិទ្យាស្ថានជាតិតាមរយៈកាមេរ៉ា ដើម្បីរៀបចំថ្នាំសម្រាប់ការសង្គ្រោះបន្ទាន់ឱ្យបានទាន់ពេលវេលា។
ជាមួយគ្នានេះ ក្រុមគ្រូពេទ្យ UMSC ក៏អាចផ្តល់ការណែនាំត្រលប់មកវិញអំពីការសង្គ្រោះអាយុជីវិត និងកំណត់ថាតើអ្នកជំងឺគួរតែទទួលបានចំនួនពីរថយន្តសង្គ្រោះប្រភេទណាក្រោយការសង្គ្រោះបឋម៕
ប្រែសម្រួល៖ស្រ៊ុន សិរីវឌ្ឍនៈ
ប្រភព៖ Two-wheeled angels: Bangkok launches first fleet of motorbike-ambulances
