វៀតណាមបង្កើតច្បាប់មិនឱ្យមានបក្ខពួកគ្រួសារនិយមក្នុងនយោបាយ
ហាណូយ៖ការិយាល័យនយោបាយដែលជាស្ថាប័នធ្វើសេចក្តីសម្រេចចិត្តរបស់បក្សកុម្មុយនីស្តវៀតណាម បានហាមឃាត់សមាជិកក្នុងរង្វង់គ្រួសារ មិនឱ្យចូលកាន់តំណែងថ្នាក់ដឹកនាំកំពូលៗក្នុងពេលដំណាលគ្នាលើវិស័យចំនួន ១៣ ដើម្បីជាចំណាត់ការប្រឆាំងអំពើពុករលួយ។ នេះបើតាមការចុះផ្សាយរបស់កាសែត VnExpress។
ការកំណត់នេះ ធ្វើឡើងក្នុងសេចក្តីសម្រេចស្តីពីការគ្រប់គ្រងអំណាច និងការការពារអំពើពុករលួយ ដែលចុះហត្ថលេខាដោយលោកស្រី ទ្រុង ធី មៃ(Truong Thi Mai)សមាជិកអចិន្ត្រៃយ៍នៃលេខាធិការដ្ឋាន ដែលបានតំណាងឱ្យការិយាល័យនយោបាយកាលពីពេលថ្មីៗនេះ។
ក្នុងសេចក្តីសម្រេចនោះការិយាល័យនយោបាយបានទាមទារថា មនុស្សដែលមានទំនាក់ទំនងក្នុងរង្វង់គ្រួសារជាមួយគ្នា មិនត្រូវទទួលដំណែងជាអ្នកដឹកនាំក្នុងពេលដំណាលគ្នានៅក្នុងគណៈកម្មាធិការប្រតិបត្តិអចិន្ត្រៃយ៍ គណៈកម្មាធិការបុគ្គលិកបក្ស និងក្រុមប្រឹក្សាភិបាល ក្នុងចំណោមសមាជិកស្ថាប័នដទៃទៀតនោះទេ។
មនុស្សដែលមានទំនាក់ទំនងក្នុងរង្វង់គ្រួសារក៏មិនអាចក្លាយជាអ្នកដឹកនាំកំពូលលើវិស័យចំនួន ១៣ ក្នុងពេលដំណាលគ្នាដែរ ដែលរួមវិស័យធនាគារ ហិរញ្ញវត្ថុ ពន្ធដារ យោធា សន្តិសុខសាធារណៈ និងលទ្ធកម្មជាដើម។
ការកំណត់គូសបញ្ជាក់ថា ប្រសិនបើគ្មានបេក្ខជនសាកសមផ្សេងទៀតទេ ហើយអ្នកដែលមានទំនាក់ទំនងគ្រួសារមានភាពជឿជាក់ខ្ពស់ក្នុងការកាន់តំណែងណាមួយនោះ នោះគឺត្រូវតែមានការអនុម័តពីថ្នាក់ខ្ពស់ជាមុនសិន។
បើតាម VnExpress អ្នកដែលមានទំនាក់ទំនងក្នុងរង្វង់គ្រួសារ រួមមានប្តីប្រពន្ធ ឪពុកម្តាយ កូន (រួមទាំងកូនចិញ្ចឹម) បងប្អូនបង្កើត ក៏ដូចជាសមាជិកគ្រួសារទាំងខាងប្តី និងប្រពន្ធ។
ប្រសិនបើតំណែងណាមួយសម្រេចឡើងដោយមិនស្របតាមការកំណត់នេះ នោះនឹងចាត់ទុកថាជាការរំលោភបំពានអំណាច។ បុគ្គលិក និងមន្ត្រីរដ្ឋាភិបាលដែលបំពានបទប្បញ្ញត្តិនេះ អាចប្រឈមនឹងផលវិបាក រួមទាំងលទ្ធភាពនៃការបណ្តេញចេញពីការងារ ការបណ្តេញចេញពីបក្សកុម្មុយនិស្ត ឬការបញ្ចប់កិច្ចសន្យាការងាររបស់បុគ្គលដែលបំពាន៕
ប្រែសម្រួល៖ហួន ឌីណា
