លោក ពូទីន និងមេដឹកនាំបេឡារូស នឹងជួបប្រជុំគ្នា បន្ទាប់ពីរុស្ស៊ីព្រមានប្រឆាំងនឹងការឈ្លានពានបេឡារូស
មូស្គូ៖វិមានក្រឹមឡាំងបានឱ្យដឹងថា ប្រធានាធិបតីរុស្ស៊ីលោក វ្ល៉ាឌីមៀ ពូទីន និងមេដឹកនាំបេឡារូស លោក អាឡិចសាន់ឌ័រ លូកាសិនកូ (Alexander Lukashenko) នឹងជួបប្រជុំគ្នានៅថ្ងៃអាទិត្យនេះ ២ ថ្ងៃបន្ទាប់ពីក្រុងមូស្គូបានព្រមានថា ការឈ្លានពានណាមួយប្រឆាំងនឹងបេឡារូសដែលជាសម្ព័ន្ធមិត្តប្ដូរផ្ដាច់របស់ខ្លួន គឺស្មើនឹងការឈ្លានពានរុស្ស៊ីផ្ទាល់។ នេះបើតាមការរាយការណ៍របស់ទីភ្នាក់ងារសារព័ត៌មានរ៉យទ័រ។
ជំនួបនេះក៏ធ្វើឡើងផងដែរបន្ទាប់ពីសមាជិកណាតូប៉ូឡូញកាលពីសប្ដាហ៍មុន បានដាក់ចល័តអង្គភាពយោធានៅជិតព្រំដែនបេឡារូស ដើម្បីជាការឆ្លើយតបនឹងប្រតិបត្តិការហ្វឹកហាត់កងកម្លាំងពិសេសបេឡារូសពីសំណាក់ទាហានស៊ីឈ្នួលវ៉ាក់ណែក្បែរព្រំដែន។ ក្រោយការណ៍នេះ លោក ពូទីន ប្រតិកម្មថា ទីក្រុងមូស្គូនឹងប្រើគ្រប់មធ្យោបាយដែលខ្លួនមាន ដើម្បីឆ្លើយតបទៅនឹងអរិភាពណាមួយប្រឆាំងនឹងបេឡេរូស។
វិមានក្រឹមឡាំងបាននិយាយថា លោក លូកាសិនកូ នាពេលនេះកំពុងបំពេញទស្សនកិច្ចការងារនៅប្រទេសរុស្ស៊ី ហើយនឹងពិភាក្សាជាមួយលោក ពូទីន អំពីការវិវត្តន៍បន្ថែមទៀតនៃ «ភាពជាដៃគូយុទ្ធសាស្ត្រ» រវាងប្រទេសទាំង២។
គួរបញ្ជាក់ថា ទោះបីជាមិនបញ្ជូនកងទ័ពឱ្យជួយរុស្ស៊ីក្នុងការឈ្លានពានអ៊ុយក្រែនក្ដី លោក លូកាសិនកូ ដែលជាសម្ព័ន្ធមិត្តប្ដូរផ្ដាច់របស់លោក ពូទីន បានអនុញ្ញាតឱ្យរុស្ស៊ីប្រើទឹកដីបេឡេរូស ដើម្បីធ្វើការឈ្លានពានអ៊ុយក្រែនពីភាគខាងជើងនៅចុងខែកុម្ភៈឆ្នាំ ២០២២។
ចាប់តាំងពីពេលនោះមក ប្រទេសទាំង២បានធ្វើសមយុទ្ធហ្វឹកហ្វឺនយោធារួមគ្នាជាច្រើនដង ហើយកាលពីខែមិថុនា លោក លូកាសិនកូ បានអនុញ្ញាតឱ្យប្រទេសរបស់លោកប្រើប្រាស់ជាមូលដ្ឋានសម្រាប់ដាក់អាវុធនុយក្លេអ៊ែររបស់រុស្ស៊ីទៀតផង ដែលការណ៍នេះរងការថ្កោលទោសធ្ងន់ធ្ងរពីលោកខាងលិច៕
ប្រែសម្រួល៖ហួន ឌីណា
