ហ្សាការតា៖ទីផ្សារសត្វដ៏ល្បីល្បាញមួយរបស់ប្រទេសឥណ្ឌូនេស៊ីបានបញ្ចប់ការលក់សាច់សុនខ(ឆ្កែ) និងឆ្មាបន្ទាប់ពី​ទទួលរងសម្ពាធពីក្រុមសកម្មជនអស់ជាច្រើនឆ្នាំក្នុងការបញ្ឈប់ការជួញដូរ និងសត្វឃាតដ៏ឃោរឃៅនេះ​។​

សាច់ឆ្កែ និងសាច់ឆ្មា តែងតែមាននៅក្នុងបញ្ជីមុខម្ហូប រួមជាមួយនឹងសត្វប្រចៀវ កណ្តុរ ពស់ និងស្វានៅឯផ្សារ Tomohon Extreme នៅលើកោះ Sulawesi ដែលត្រូវបាន​គេស្គាល់ថាជា អាហារដ៏មិនសមរម្យរ​ហូតដល់ការហាមឃាត់នៅថ្ងៃសុក្រ ទី២១ ខែកក្កដានេះ។​

ក្រុមលើកកម្ពស់សិទ្ធិសត្វ Humane Society International (HSI) បាននិយាយនៅក្នុងសេចក្តីថ្លែងកា​រណ៍​មួយកាលពីថ្ងៃសុក្រថា រាល់ផ្សារណាដែលមិនបានព្រមព្រៀងគ្នាកន្លងមក គឺជាផ្សារដែលត្រូវកាត់បន្ថ​យ និងបញ្ឈប់ការជួញដូរសាច់សត្វឆ្មា និងសត្វឆ្កែមុនគេ។​

ការហាមប្រាមនេះគឺជា «កិច្ចព្រមព្រៀងជាប្រវត្តិសាស្ត្រមួយ ដែលជួយសង្គ្រោះសត្វរាប់ពាន់ក្បាលពីការបំ​ផ្លិចបំផ្លាញ និងសម្លាប់សត្វ សម្រាប់ធ្វើជាអាហាររបស់មនុស្ស»។ ឥណ្ឌូណេស៊ីនៅតែជាប្រទេសមួយក្នុងចំ​ណោមប្រទេសមួយចំនួននៅលើពិភពលោកដែលនៅតែអនុញ្ញាតឱ្យលក់សាច់ឆ្កែ និងឆ្មា ដោយសារតែមូ​លហេតុប្រពៃណី និងវប្បធម៌ក្នុងស្រុក។​

ក្រុមដដែល​បាននិយាយនៅក្នុងសេចក្តីថ្លែងការណ៍ទៀត​ថា អាជីវករលក់សាច់ឆ្កែនិងឆ្មាចំនួនប្រាំមួយនាក់ដែលនៅសល់បានចុះហត្ថលេខាលើកិច្ចព្រមព្រៀងដើម្បីបញ្ឈប់ការលក់ ហើយអភិបាលក្រុង Tomohon ក៏បានចុះហត្ថលេខាអនុម័តលើច្បាប់ហាមឃាត់ការជួញដូរនាពេលអនាគតនៅលើទីផ្សារផងដែរ។​

លោកស្រី Lola Webber នាយកយុទ្ធនាការរបស់ HSI ក្នុងការបញ្ចប់ការជួញដូរសាច់ឆ្កែបាននិយាយថា ៖ «ឥទ្ធិព​ល​នឹងកាន់តែទូលំទូលាយ រួមមានការបិទអាជីវកម្មដែលជាបណ្តាញដ៏ធំរបស់អ្នកជួញដូរ បញ្ហាចោរលួចឆ្កែ និងអ្នកធ្វើសត្វឃាតទៀតផង»។

លោកស្រីបន្តថា ៖ «យើងសង្ឃឹមថា កិច្ចព្រមព្រៀងដែលមិនធ្លាប់មានពីមុនមកនេះនឹងអាចកំណត់ស្តង់ដា​របាន»។

ក្រុមអ្នកលើកកម្ពស់សិទ្ធិសត្វបានបន្ថែមថា កិច្ចព្រមព្រៀងនេះមានសក្តានុពលអាចជួយសង្គ្រោះជីវិតកូនឆ្កែរាប់ពាន់ក្បាលនៅលើកោះនេះ ដែលកូនឆ្កែ​មានរហូតដល់ ១៣០ ០០០ ក្បាលត្រូវបានសម្លាប់ជារៀងរា​ល់ឆ្នាំ។​

ទីផ្សារនេះត្រូវបានគេររិះគន់យ៉ាងខ្លាំងពីសំណាកក់សកម្មជនចំពោះវិធីសម្លាប់សត្វដូចជា ការវាយដំ ការព្យួរក និងការផ្លុំរោមសត្វខណៈពេលដែលពួកវានៅមានជីវិត។​

ការអំពាវនាវទាំងនោះបានកើនឡើងបន្ទាប់ពីមានការផ្ទុះឡើងនៃមេរោគឆ្លងកាលពីឆ្នាំ២០២០ ដែលទា​ក់ទ​ងទៅនឹងទីផ្សារលក់សាច់ស្រស់នៅទីក្រុង Wuhan ប្រទេសចិន បានបង្កការភ័យខ្លាចដល់ទីផ្សារផ្សេងទៀ​តដែលជាកន្លែងមេរោគអាចឆ្លងពីសត្វទៅកាន់ខ្លួនមនុស្សបាន។​

HSI និង​ក្រុម​លើកកម្ពស់សិទ្ធិរបស់​ឥណ្ឌូណេស៊ី​ក៏​កំពុង​ព្យាយាម​បញ្ឈប់​រាល់ការ​ធ្វើ​អាជីវកម្មសត្វ​ផង​ដែរ​ដើម្បី​ការពារ​ការ​រីក​រាល​ដាល​នៃ​មេរោគ​ឆ្កែឆ្កួត។​

លោក Elvianus Pongoh អ្នកលក់ម្នាក់នៅ Tomohon អស់រយៈពេល ២៥ឆ្នាំបាននិយាយថា នេះជាពេលវេលាគឺត្រឹមត្រូវណាស់ក្នុងការបញ្ចប់ការជួញដូរ។​

គាត់បាននិយាយនៅក្នុងសេចក្តីប្រកាសព័ត៌មានរបស់ HSI ថាដែរថា ៖ «ខ្ញុំប្រហែលជាសម្លាប់សត្វឆ្កែរាប់ពាន់ក្បាលហើយ។ ​​ពេលកន្លងមកដល់ឥឡូវនេះ ខ្ញុំឃើញនូវភាពភ័យខ្លាចនៅក្នុងភ្នែករបស់ពួកវា… នៅពេ​លដែលខ្ញុំនឹកឃើញពីវា ខ្ញុំពិបាកចិត្តណាស់»។​

លោកនិយាយ​ថា ៖ «ខ្ញុំយល់ថាការហាមឃាត់នេះគឺជាវិធីល្អបំផុតសម្រាប់សត្វ ហើយក៏ល្អបំផុតដើម្បីការពារសាធារណៈជនផងដែរ»៕ ​

ប្រែសម្រួល៖នី ស្រីពៅ

ប្រភព៖ CNA