ហាណូយ៖ រដ្ឋមន្ត្រីក្រសួងរតនាគារអាមេរិក លោកស្រី Janet Yellen ក្នុងជំនួបជាមួយប្រធានរដ្ឋសភាវៀតណាម នៅទីក្រុងហាណូយបានលើកឡើងថា អាមេរិកវាយតម្លៃខ្ពស់ចំពោះភាពជាដៃគូលើគ្រប់ជ្រុងជ្រោយជាមួយវៀតណាម ហើយនឹងបន្តអភិវឌ្ឍភាពជាដៃគូនេះ។

រដ្ឋមន្ត្រីក្រសួងរតនាគារអាមេរិក លោកស្រី Janet Yellen បានបញ្ជាក់នៅក្នុងជំនួបជាមួយប្រធានរដ្ឋសភាវៀតណាម លោក Vuong Dinh Hue នៅទីក្រុងហាណូយ ប្រទេសវៀតណាម កាលពីថ្ងៃទី ២១ ខែកក្កដា ថា អាមេរិកវាយតម្លៃខ្ពស់ចំពោះភាពជាដៃគូលើគ្រប់ជ្រុងជ្រោយជាមួយវៀតណាម ហើយនឹងបន្តអភិវឌ្ឍ។

ក្នុងដំណើរទស្សនកិច្ចនៅវៀតណាម នាឱកាសនោះ លោកស្រី Yellen បាននិយាយថា លោកស្រីជឿជាក់ថា វៀតណាមនឹងសម្រេចបាននូវគោលដៅអភិវឌ្ឍន៍របស់ខ្លួនដោយជោគជ័យ ហើយថា សហរដ្ឋអាមេរិកមានបំណងចង់រួមចំណែកក្នុងដំណើរការនេះ។

ប្រធានរដ្ឋសភាវៀតណាមបានអះអាងថា ក្នុងគោលនយោបាយការបរទេសរបស់វៀតណាម ឯករាជ្យភាព ភាពខ្លួនទីពឹងខ្លួន សន្តិភាព មិត្តភាព កិច្ចសហប្រតិបត្តិការ និងការអភិវឌ្ឍន៍ អាមេរិកគឺជាដៃគូដ៏សំខាន់។ លោកបានអះអាងនូវការគាំទ្រដល់ការពង្រឹងទំនាក់ទំនងទ្វេភាគីដែលមានស្ថិរភាព និងយូរអង្វែង ដើម្បីផលប្រយោជន៍នៃប្រទេសទាំងពីរ ក៏ដូចជាសន្តិភាព មិត្តភាព និងកិច្ចសហប្រតិបត្តិការក្នុងតំបន់ និងពិភពលោក។

លោក Vuong Dinh Hue បានស្នើភាគីទាំងពីរជំរុញទំនាក់ទំនងលើបណ្តាញបក្ស រដ្ឋសភា និងការផ្លាស់ប្តូរប្រជាជនទៅប្រជាជន។ ពង្រឹងកិច្ចសហប្រតិបត្តិការសភា ការផ្លាស់ប្តូរគណៈប្រតិភូជាន់ខ្ពស់; និងបង្កើតយន្តការសម្រាប់កិច្ចសហការផ្នែកនីតិប្បញ្ញត្តិស្របនឹងទំនាក់ទំនងទ្វេភាគី។

លោកបានជំរុញឱ្យប្រទេសទាំងពីរសម្របសម្រួល ដើម្បីបង្កើតយន្តការសហប្រតិបត្តិការទ្វេភាគី និងពហុភាគីថ្មី និងមានប្រសិទ្ធភាពជាងក្នុងវិស័យពាណិជ្ជកម្ម និងការវិនិយោគ។

លោកបាននិយាយថា វៀតណាមមិនបន្តគោលនយោបាយអតិរេកពាណិជ្ជកម្មជាមួយអាមេរិកទេ ដោយបានគូសបញ្ជាក់ពីការកែលម្អជាបន្តបន្ទាប់ របស់ប្រទេសអាស៊ីអាគ្នេយ៍នៃប្រព័ន្ធច្បាប់ និងបរិយាកាសវិនិយោគដើម្បីបង្កើតលក្ខខណ្ឌអំណោយផល សម្រាប់ប្រតិបត្តិការរយៈពេលវែង និងជោគជ័យរបស់សហគ្រាសអាមេរិក៕ ប្រភពពី Vietnamnews ប្រែសម្រួល៖ សារ៉ាត