អាមេរិក៖ អ៊ុយក្រែនដណ្ដើមទឹកដីដែលរុស្ស៊ីកាន់កាប់ក្រោយការឈ្លានពាន បាន ៥០ ភាគរយ
អាមេរិក៖ រដ្ឋមន្ត្រីការបរទេសអាមេរិកលោក អ៊ែនថូនី ប្ល៊ីងកែន បានឱ្យដឹងកាលពីថ្ងៃអាទិត្យថា មកទល់ពេលនេះ អ៊ុយក្រែនដណ្ដើមទឹកដីដែលរុស្ស៊ីកាន់កាប់ក្រោយបើកការឈ្លានពាន បាន ៥០ ភាគរយហើយ ប៉ុន្តែថា ក្រុងកៀវប្រឈមមុខនឹងការប្រយុទ្ធដ៏លំបាកស្វិតស្វាញ ក្នុងការដណ្ដើមមកវិញបន្ថែមទៀត។
លោក ប្ល៊ីងកែន បាននិយាយក្នុងបទសម្ភាសន៍ជាមួយបណ្ដាញទូរទស្សន៍ CNN កាលពីថ្ងៃអាទិត្យ យ៉ាងដូច្នេះថា ៖ «[អ៊ុយក្រែន]ដណ្ដើមទឹកដីមកវិញប្រហែល ៥០ ភាគរយ នៃទឹកដីដែលបាត់បង់ពីដំបូងហើយ»។ នេះបើតាមការស្រង់សម្ដីរបស់ទីភ្នាក់ងារសារព័ត៌មានរ៉យទ័រ។
លោកបន្តថា ៖ «វានៅតែជាជំហានដំបូងនៃប្រតិបត្តិការវាយបក។ វាពិតជាលំបាកណាស់។ វានឹងមិនសម្រេចនៅសប្តាហ៍ក្រោយ ឬពីរសប្តាហ៍ក្រោយទៀតនោះទេ។ ខ្ញុំគិតថានៅប៉ុន្មានខែទៅមុខទៀតឯណោះ»។
កាលពីចុងខែមុន ប្រធានាធិបតីអ៊ុយក្រែន លោក វ្ល៉ូឌីមៀរ ហ្សេលេនស្គី បាននិយាយថា វឌ្ឍនភាពនៃការវាយបកប្រឆាំងនឹងកងកម្លាំងរុស្ស៊ី យឺតយ៉ាវជាងការចង់បាន។
នាពេលនេះ អ៊ុយក្រែនបានដណ្តើមយកភូមិមួយចំនួននៅភាគខាងត្បូង និងទឹកដីជុំវិញទីក្រុង Bakhmut នៅភាគខាងកើត ប៉ុន្តែមិនទាន់មានការវាយប្រហារដ៏ធំប្រឆាំងនឹងខ្សែការពារសមរភូមិជួរមុខរបស់រុស្ស៊ីនៅឡើយទេ។
នៅពេលសួរថាតើអាមេរិកនឹងផ្ដល់យន្តហោះចម្បាំងធុន F-16 ទៅឱ្យអ៊ុយក្រែនឬអត់ លោក ប្ល៊ីងកែន និយាយថា លោកជឿថាអាមេរិកនឹងឱ្យ ហើយបន្តថា ៖ «ចំណុចសំខាន់ត្រង់ថា នៅពេលពួកគេ(អ៊ុយក្រែន)ទទួលបាន ពួកគេមានការបណ្ដុះបណ្ដាលត្រឹមត្រូវ អាចគ្រប់គ្រងយន្តហោះ និងប្រើប្រាស់វាតាមរបៀបដ៏ឆ្លាតវៃ»។
សូមបញ្ជាក់ថា សម្ព័ន្ធនៃប្រទេសលោកខាងលិចចំនួន១១ នឹងចាប់ផ្តើមបណ្តុះបណ្តាលអ្នកបើកយន្តហោះចម្បាំងអ៊ុយក្រែន ឱ្យបើកយន្តហោះចម្បាំង F-16 នៅខែសីហាក្នុងប្រទេសដាណឺម៉ាក និងក្នុងមជ្ឈមណ្ឌលហ្វឹកហ្វឺននៅរ៉ូម៉ានី។
កន្លងមក អ៊ុយក្រែនអំពាវនាវសុំយន្តហោះចម្បាំង F-16 ប៉ុន្តែទីប្រឹក្សាសន្តិសុខជាតិអាមេរិក លោក Jake Sullivan ធ្លាប់បាននិយាយកាលពីខែមុនថា មិនមានការសម្រេចចិត្តចុងក្រោយពីការបញ្ជូនយន្តហោះធុននេះឱ្យអ៊ុយក្រែននោះទេ។ មន្ត្រីអាមេរិកបានប៉ាន់ប្រមាណថា ខ្លួននឹងចំណាយពេលយ៉ាងហោចណាស់ ១៨ ខែសម្រាប់ការបណ្តុះបណ្តាល និងការបញ្ជូនយន្តហោះឱ្យក្រុងកៀវ៕
ប្រែសម្រួល៖ហួន ឌីណា ប្រភព៖ Ukraine has recaptured 50% of the territory that Russia seized, Blinken says
