មនុស្សបីនាក់ រងរបួសដោយសារការវាយប្រហារដោយកាំបិទនៅលើរថភ្លើងនៅជប៉ុន
តូក្យូ៖ មនុស្សយ៉ាងហោចណាស់បីនាក់បានរងរបួសក្នុងការវាយប្រហារដោយកាំបិតលើរថភ្លើងនៅភាគខាងលិចប្រទេសជប៉ុនកាលពីថ្ងៃអាទិត្យ ដោយប៉ូលិសបាននិយាយថា ពួកគេបានចាប់ខ្លួនបុរសម្នាក់ជាខ្មាន់កាំបិត។
លោក តេត្សូយ៉ា សាកាហ្គាមី (Tetsuya Sakagami) មកពីនាយកដ្ឋានពន្លត់អគ្គិភ័យនៅក្បែរនោះបានប្រាប់ភ្នាក់ងារព័ត៌មាន AFP ថា ជនរងគ្រោះទាំង៣នោះ រួមមានទាំងបុរសអ្នកបម្រើភ្ញៀវលើរថភ្លើងម្នាក់ និងបុរសអ្នកដំណើរពីររូបទៀត។ ពួកគេត្រូវបានបញ្ជូនអ្នកទាំងបីទៅមន្ទីរពេទ្យ ប៉ុន្តែគ្រោះថ្នាក់មិនធ្ងន់ធ្ងរដល់អាយុជីវិតនោះទេ។
ប៉ូលិសក្នុងតំបន់បានប្រាប់ AFP ថា ជនសង្ស័យជាបុរសអាយុ ៣៧ ឆ្នាំ បានប្រដាប់ដោយកាំបិតចុងស្រួចចំនួន ៣ ពេលលោកត្រូវបានចាប់ខ្លួននៅស្ថានីយ Rinku Town ក្នុងក្រុង Izumisano នៃតំបន់ Osaka ដែលជាតំបន់កើតហេតុ។
ប៉ូលិសបាននិយាយថា បុរសជាខ្មាន់កាំបិតត្រូវបានចាប់ខ្លួនពីបទប៉ុនប៉ងមនុស្សឃាត ហើយបានសារភាពរួចហើយថា ខ្លួនជាអ្នកធ្វើការវាយប្រហារកាលពីព្រឹកថ្ងៃអាទិត្យ។ ប៉ូលិសនៅតែបន្តស៊ើបអង្កេតមូលហេតុនៃការវាយប្រហារចុងក្រោយនេះ។
គួរបញ្ជាក់ថា ឧក្រិដ្ឋកម្មហិង្សាបែបនេះកម្រកើតមាននៅជប៉ុនណាស់ ខណៈប្រទេសនេះមានអត្រាឃាតកម្មទាប ហើយច្បាប់កាំភ្លើងក៏តឹងរ៉ឹងដែរ។ យ៉ាងណាមិញ វាតែងតែកើតឡើងម្ដងម្កាល មិនថាដោយកាំបិត ឬកាំភ្លើង រួមមានទាំងករណីធ្វើឃាតអតីតនាយករដ្ឋមន្ត្រីជប៉ុន លោក Shinzo Abe កាលពីឆ្នាំមុន៕
ប្រែសម្រួល៖ហួន ឌីណា ប្រភព៖ Three hurt in Japan train stabbing attack
