អង់គ្លេសផ្ដល់ការគាំទ្រជាសាច់ប្រាក់ សំដៅធ្វើឱ្យវិស័យកសិកម្មប្រទេសនីហ្សេរីយ៉ាមានភាពធន់នឹងអាកាសធាតុ
ឡុងដ៍៖ រដ្ឋមន្ត្រីការបរទេសអង់គ្លេសលោក James Cleverly នឹងរៀបចំកញ្ចប់ជំនួយថ្មីដើម្បីធ្វើឱ្យវិស័យកសិកម្មរ បស់ប្រទេសនីហ្សេរីយ៉ាកាន់តែមានភាពធន់នឹងអាកាសធាតុ។ ការរៀបចំនេះនឹងធ្វើឡើងក្នុងកំលុងពេលនៃការធ្វើដំណើរទស្សនកិច្ចទៅកាន់ប្រទេសអាហ្វ្រិក។
បើតាមសេចក្ដីប្រកាសព័ត៌មានរបស់រដ្ឋាភិបាលអង់គ្លេសថ្ងៃទី១ ខែសីហា លោក James Cleverly បានធ្វើដំណើរទៅដល់ប្រទេសនីហ្សេរីយ៉ាដោយសុវត្ថិភាព ហើយនឹងបន្តដំណើរទស្សនកិច្ចរបស់លោកនៅអាហ្វ្រិករយៈពេលបួនថ្ងៃទៀត។
ចំណែកកញ្ចប់ជំនួយនេះរួមមាន កិច្ចសន្យាជាទឹកប្រាក់ចំនួន ៥៥ លានផោន (ប្រហាក់ប្រហែលនឹង៧០លានដុល្លារ) ដើម្បីជួយផ្លាស់ប្តូរសេដ្ឋកិច្ចជនបទរបស់ប្រទេសនីហ្សេរីយ៉ា និងជំនួយចំនួន ២,៩លានផោន (ប្រមាណជា ៣, ៧លានដុល្លារ) ដើម្បីគាំទ្រប្រជាជនជាងបួនលាននាក់ក្នុងការទទួលយក និងពង្រីកការអនុវត្តកសិកម្មប្រកបដោយនិរន្តរភាព។
លោក Cleverly បាននិយាយថា ៖ «ពួកយើងកំពុងរួមគ្នាផ្តោតលើអនាគត តាមរយៈការដាក់ចេញនូវវិធានការបៃតងស្អាត ទាំងក្នុងវិស័យកសិកម្ម និងការអភិវឌ្ឍហេដ្ឋារចនាសម្ព័ន្ធ ដើម្បីបង្កើតដំណោះស្រាយធន់នឹងអាកាសធាតុសម្រាប់បញ្ហាដែលយើងទាំងអស់គ្នាកំពុងប្រឈមមុខនាពេលបច្ចុប្បន្ន ហើយនឹងប្រឈមមុខកាន់តែខ្លាំងឡើងនៅក្នុងប៉ុន្មានឆ្នាំខាងមុខនេះ»។
បើតាមសេចក្ដីថ្លែងការណ៍របស់រដ្ឋាភិបាលអង់គ្លេសដដែលបានឱ្យដឹងថា លោក Cleverly នឹងទស្សនាមជ្ឈមណ្ឌលពាណិជ្ជកម្មរបស់ប្រទេសនីហ្សេរីយ៉ាឈ្មោះ Lagos នៅថ្ងៃអង្គារ និងរដ្ឋធានី Abuja របស់ប្រទេសអាហ្រ្វិកមួយនេះ នៅថ្ងៃពុធ។
ជាមួយគ្នានេះរដ្ឋាភិបាលអង់គ្លេសបានសង្កត់ធ្ងន់ថា មូលនិធិថ្មីនេះនឹងជំរុញផលិតភាព ក៏ដូចជាភាពធន់នៅក្នុងវិស័យកសិកម្មរបស់ប្រទេសអាហ្វ្រិកខាងលិច ឆ្លើយតបទៅនឹងផលប៉ះពាល់នៃការប្រែប្រួលអាកាសធាតុ ជួយអភិវឌ្ឍន៏ដំណាំដែលធន់នឹងកម្ដៅ ទឹកជំនន់ និងបង្កើនជីវជាតិដីឡើងវិញ។
គួរបញ្ជាក់ថា ប្រជាជនភាគច្រើនក្នុងទ្វីបអាហ្រ្វិក រស់នៅក្នុងតំបន់ជនបទ ហើយដែលសេដ្ឋកិច្ចរបស់ពួកគេច្រើនជាងពីរភាគបីនៃប្រជាជនសរុប គឺពឹងផ្អែកលើការធ្វើកសិកម្ម។ ពួកគេក៏ជាក្រុមមនុស្សដែលរងផលប៉ះពាល់ខ្លាំងចេញពីការប្រែប្រួលអាកាសធាតុ ជាពិសេសគ្រោះរាំងស្ងួត និងទឹកជំនន់ ដែលបណ្តាលឱ្យមានការបំផ្លិចបំផ្លាញដល់ជីវភាពរស់នៅផងដែរ។
កាលពីឆ្នាំកន្លងទៅនេះ មនុស្សជាង ៦០០ នាក់បានបាត់បង់ជីវិត និងយ៉ាងហោចណាស់មួយលាននាក់បានផ្លាស់ទីលំនៅក្នុងប្រទេសនីហ្សេរីយ៉ា បន្ទាប់ពីទឹកជំនន់ដ៏អាក្រក់បំផុតដែលមិនធ្លាប់កើតឡើងក្នុងរយៈពេលមួយទសវត្សរ៍ចុងក្រោយ។
បើតាមក្រុមជំនួយអន្តរជាតិកាលពីពេលនោះ ទឹកជំនន់បានបោកបក់បំផ្លាញដំណាំ និងបានធ្វើឱ្យកាន់តែមានភាពធ្ងន់ធ្ងរឡើងនូវវិបត្តិស្បៀងអាហារនៅក្នុងប្រទេស ដែលបណ្ដាលឱ្យមនុស្សរាប់លាននាក់ធ្លាក់ចូលទៅក្នុងភាពក្រីក្រ កង្វះស្បៀងអាហារក្នុងរយៈពេលបីឆ្នាំចុងក្រោយនេះ៕
ប្រែសម្រួល៖កែវ បុស្បា
ប្រភព៖ UK sets out support to make Nigeria’s agriculture sector more climate- resilient
