អង់គ្លេសចាប់ខ្លួនជនជាតិប៊ុលហ្គារីបីនាក់ ពាក់ព័ន្ធនឹងការស៊ើបការណ៍សម្ងាត់ឱ្យរុស្ស៊ី
ឡុងដ៍៖ ប៉ូលិសក្រុងឡុងដ៍បាននិយាយថា ខ្លួនចាប់ខ្លួនពលរដ្ឋប៊ុលហ្គារីនាក់រស់នៅចក្រភពអង់គ្លេសកាលពីខែកុម្ភៈ ក្រោមការសង្ស័យនៃបទល្មើសចារកម្មឱ្យរុស្ស៊ី និងការកាន់កាប់ឯកសារអត្តសញ្ញាណមិនពិត។
ប៉ូលិសក្រុងបានបញ្ជាក់កាលពីថ្ងៃអង្គារថា អ្នកទាំង៣នោះ រួមមានលោក Orlin Roussev អាយុ ៤៥ ឆ្នាំ លោក Bizer Dzhambazov អាយុ ៤២ ឆ្នាំ និងនាង Katrin Ivanova អាយុ ៣២ ឆ្នាំ ដែលត្រូវបានឃុំខ្លួនចាប់តាំងពីចាប់ខ្លួនមក។
បណ្ដាញព័ត៌មានអង់គ្លេស BBC និងប្រព័ន្ធផ្សព្វផ្សាយអង់គ្លេសផ្សេងទៀត បានរាយការណ៍ថា អ្នកទាំងបី ត្រូវបានគេសង្ស័យថាបានធ្វើការឱ្យសេវាសន្តិសុខរុស្ស៊ី។ អ្នកទាំងបី ក៏រងការចោទប្រកាន់ផងដែរថា កាន់កាប់ឯកសារក្លែងក្លាយ ក្នុងចំណោមឯកសារសម្គាល់អត្តសញ្ញាណចំនួន ៣៤ ដែលពួកគេមាន។
BBC បានរាយការណ៍ថា ឯកសារទាំងនោះរួមមានលិខិតឆ្លងដែន និងអត្តសញ្ញាណប័ណ្ណ មានមកពីចក្រភពអង់គ្លេស ប៊ុលហ្គារី បារាំង អ៊ីតាលី អេស្ប៉ាញ ក្រូអាត ស្លូវេនី ក្រិក និងសាធារណរដ្ឋឆេក។ BBC បន្តថា អ្នកទាំង៣ ត្រូវបានឃុំខ្លួនដោយអង្គភាពស៊ើបអង្កេតប្រឆាំងភេរវកម្ម នៃប៉ូលិសក្រុងឡុងដ៍ ដែលធ្វើការលើបញ្ហាចារកម្ម ហើយនឹងត្រូវឆ្លើយសំណួរប៉ូលិសនៅខែកញ្ញាខាងមុខនេះ ប៉ុន្តែមិនទាន់កំណត់ពេលជាក់លាក់។
បើតាមគេហទំព័រព័ត៌មានអនឡាញ Balkan Insight ជនសង្ស័យម្នាក់ក្នុងចំណោមជនសង្ស័យទាំង៣នាក់ មានប្រវត្តិទាក់ទងពាណិជ្ជកម្មជាមួយរុស្ស៊ី ហើយពីមុនមានតួនាទីជាទីប្រឹក្សានៅក្រសួងថាមពលប៊ុលហ្គារីពីឆ្នាំ ២០០៨-២០០៩ ពោលគឺនៅចន្លោះឆ្នាំ ដែលក្រសួងថាមពលប៊ុលហ្គារីដឹកនាំដោយរដ្ឋមន្រ្តីដែលគាំទ្ររុស្ស៊ី។
គេហទំព័រព័ត៌មានដដែល បានរាយការណ៍ថា ក្រសួងថាមពលប៊ុលហ្គារីបានរងឥទ្ធិពលពីរុស្ស៊ី ខណៈការជ្រៀតជ្រែករបស់រុស្ស៊ីនៅក្នុងនយោបាយប៊ុលហ្គារី «ជាប្រធានបទក្តៅយូរមកហើយ»។ Balkan Insight បានបន្ថែមថា អ្នកការទូតរុស្ស៊ីជាង ១០០ នាក់ ត្រូវបានបណ្តេញចេញពីប្រទេសប៊ុលហ្គារី ក្នុងរយៈពេលប៉ុន្មានឆ្នាំថ្មីៗនេះ ជុំវិញការចោទប្រកាន់ពីបទចារកម្ម ហើយជនជាតិប៊ុលហ្គារីមួយចំនួនត្រូវបានចាប់ខ្លួនពីបទសហការលើការណ៍ទាំងនោះ៕
ប្រែសម្រួល៖ហួន ឌីណា
ប្រភព៖ Three Bulgarians arrested in UK linked to suspected Russian espionage
