ស្រី្តវ័យក្មេងម្នាក់ជ្រើសយករបរចិញ្ចឹមសត្វជន្លេន ដើម្បីទាញយកចំណូលបានគួរសម
ស្វាយរៀង៖ ជន្លេនជាល្មូនមួយប្រភេទរស់នៅក្នុងដីរវើកៗគួរឱ្យញញើត។ តែជន្លេនក៏ជាសត្វម្យ៉ាងដែលសំបូរទៅដោយប្រូតេអ៊ីនខ្ពស់ និងមានប្រយោជន៍ច្រើនយ៉ាងសម្រាប់ដីកសិកម្ម ជាពិសេសសម្រាប់ធ្វើជាចំណីដល់សត្វមាន់ ទា ជ្រូក និងកង្កែបជាដើម។
ជាមួយគ្នានេះ របរចិញ្ចឹមជន្លេន ក៏ជាការងារមួយងាយស្រួល មិនមានការចំណាយកម្លាំង និងពេលវេលាច្រើនក្នុងការចិញ្ចឹមទេ ហើយការចិញ្ចឹមជន្លេននេះកសិករអាចទាញប្រយោជន៍ពីវាបានច្រើន ពោលទាំងសម្រាប់កសិកម្ម និងអាចទាញចំណូលពីវាបានតាមរយៈការលក់ពូជជន្លេនផងដែរ។
ជាក់ស្តែងនៅខេត្តស្វាយរៀងកសិករជាស្ត្រីមួយរូប អាចទាញចំណូលបានសមរម្យពីមុខរបរចិញ្ចឹមជន្លេននៅផ្ទះរបស់ខ្លួន និងមានគម្រោងពង្រីកការចិញ្ចឹមបន្ថែមទៀតផង ដ្បិតអីកញ្ញាយល់ឃើញថាវាផ្តល់អត្ថប្រយោជន៍ជាច្រើនដល់ការងារកសិកម្មរបស់ខ្លួនជារួម។
កញ្ញា ហួង មាលា វ័យ ៣២ឆ្នាំ បានចាប់ផ្តើមមុខរបរចិញ្ចឹមជន្លេននៅចុងឆ្នាំ ២០២០ តែម្នាក់ឯងគត់ និងមានម្ដាយជាអ្នកជួយរៀបចំសម្រាប់លក់ពូជ។ បច្ចុប្បន្ននេះទីតាំងចិញ្ចឹមជន្លេនរបស់កញ្ញា ហួង មាលា មានកានជន្លេនប្រមាណជិត ២០០ឯណោះ ខណៈការពង្រីកការចិញ្ចឹមនឹងត្រូវពង្រីកឆាប់ៗ។
កញ្ញា ហួង មាលា បានឱ្យដឹងថាមូលហេតុនៃការចាប់ផ្តើមចិញ្ចឹមដំបូងគឺដោយសារកញ្ញាយល់ថា ដីក្នុងខេត្តរបស់ខ្លួនមិនសូវមានជីវជាតិដូចខេត្តដទៃទើបកញ្ញាស្វែងយល់ និងស្រាវជ្រាវឃើញកែប្រែដីមួយបែបគឺការចិញ្ចឹមជន្លេន។ម្យ៉ាងការចិញ្ចឹមជន្លេននេះគឺដើម្បីបម្រើឱ្យការចិញ្ចឹមសត្វរបស់ក្រុមគ្រួសារកញ្ញាផង។
គ្រាន់តែជាមនុស្សដែលស្រលាញ់កសិកម្ម ហើយមិនមែនជាជំនាញកសិកម្ម និងថែមទាំងមិនធ្លាប់បានសិក្សាជ្រៅជ្រះ តែកូនអ្នកខេត្តស្វាយរៀងរូបនេះជម្នះការហាមឃាត់ និងព្យាយាមរៀនសូត្រពីអ្នកលក់ពូជជន្លេនផង និងរៀនដោយខ្លួនឯងតាមអ៊ីនធឺណិតផង។
កញ្ញាបានឱ្យដឹងថា៖ «ខ្ញុំឈប់ពីការងារគឺដោយសារតែវិបត្តិកូវីដ១៩ ហើយខ្ញុំងាកមកធ្វើកិច្ចការកសិកម្មនេះទាំងគ្មានអ្នកគាំទ្រឡើយ។ ក្រុមគ្រួសារមិនចង់ឱ្យធ្វើព្រោះខ្លាចពិបាក តែខ្ញុំនៅតែជម្នះព្រោះដោយសារតែការស្រលាញ់កសិកម្មតាំងពីក្មេងមកម្ល៉េះ»។
ជុំវិញបច្ចេកទេសចិញ្ចឹមនេះ កញ្ញា ហួង មាលា និយាយថា ដំបូងខ្លួនចាប់ផ្តើមដោយការសាកសួរទៅកាន់អ្នកលក់ពូជ ហើយបានដាក់ចិញ្ចឹមដាក់ក្នុងអាងពេលដំបូង។ បន្ទាប់កញ្ញា ព្យាយាមរៀនពីនេះពីនោះមើលយូធូប(Youtube)និងពិសោធន៍ដោយខ្លួនឯងពីមួយខែទៅមួយខែ ក៏ទទួលបានលទ្ធផលល្អប្រសើរ។
ជុំវិញរបរចិញ្ចឹមជន្លេននេះទៀតសោត កញ្ញា មាលា និយាយថាវាមានភាពងាយស្រួល និងពិបាកក្នុងការថែទាំឡើយ។កញ្ញាបញ្ជាក់ថា កាន់តែចិញ្ចឹមគឺកាន់តែអាចមើលឃើញពីប្រយោជន៍របស់វាច្រើនឡើងៗ និងកាន់តែងាយស្រួល ដ្បិតអីកញ្ញាខ្លួនឯងផ្ទាល់កាន់តែជំនាញខ្ពស់ជាមួយនឹងសត្វប្រភេទនេះ ពោលគឺដាក់ទុនទៅទទួលបានផល មិនខាតដើម ហើយកាន់តែចង់ពង្រីកមុខរបរនេះឱ្យកាន់តែធំ។
បច្ចុប្បន្ននេះ ជន្លេនពូជរបស់កញ្ញា ហួង មាលា អាចលក់បានក្នុងតម្លៃមួយគីឡូ មួយម៉ឺនរៀល ដែលនេះគិតទាំងដី និងចំណីរបស់វាទៅជាមួយផងដែរ។
ទាក់ទិនទៅនឹងការលក់នេះដែរ កញ្ញា ហួង មាលា បានឱ្យដឹងថា ជាមធ្យមក្នុងមួយខែ ទីតាំងរបស់កញ្ញា អាចលក់ពូជជន្លេនបានក្នុងរង្វង់ជាង ១០០គីឡូក្រាម និងអាចប្រែប្រួលឡើងចុះ ទៅតាមការផ្សព្វផ្សាយលក់របស់កញ្ញាផ្ទាល់នៅតាមបណ្ដាញសង្គមហ្វេសប៊ុក ឬតាមម៉ូយរបស់ខ្លួន។
ក្រោយឃើញភាពកាក់កប កសិករចិញ្ចឹមជន្លេននៅខេត្តស្វាយរៀងរូបនេះ បានបង្ហើបឱ្យដឹងថា ខ្លួនមានគម្រោងពង្រីកបន្ថែមចំនួនមួយទ្រុងទៀត ដែលអាចដាក់ចិញ្ចឹមជន្លេនបានប្រហែលជា ១០០កានបន្ថែមទៀត។
ជាមួយគ្នានេះដែរ កញ្ញាក៏មានការលើកទឹក ពិសេសទៅដល់កសិករ និងអ្នកស្រឡាញ់វិស័យកសិកម្មឱ្យងាកមកចាប់អារម្មណ៍នឹងជន្លេន ដោយហេតុថាវាមានអត្ថប្រយោជន៍ច្រើន និងកាត់បន្ថយការចំណាយរបស់កសិករ។
កញ្ញា ហួង មាលា បានបញ្ជាក់ថា៖ «ខ្ញុំចង់សំណូមពរទៅដល់បងប្អូនដែលគាត់ធ្វើកសិកម្ម មិនថាជាខ្នាតតូច ឬធំនោះទេ និយាយរួមគឺថាជន្លេន មានសក្ដានុពលខ្លាំងមែនទែនសម្រាប់វិស័យកសិកម្ម ទៅលើជីកំប៉ុស និងចំណីសត្វ។ ការចិញ្ចឹមសត្វយកត្រូវការចំណី ហើយដំណាំត្រូវការដីដែលមានគុណភាពល្អ ទាំងនេះគឺសត្វជន្លេនអាចជួយបានទាំងអស់ និយាយឱ្យខ្លីគឺវាវិលជុំ និងចំណាយតិចបំផុត»៕ ដោយៈ ស្រ៊ុន សិរីវឌ្ឍនៈ
