អាមេរិកចោទរុស្ស៊ីពីបទធ្វើការបំភិតបំភ័យ បន្ទាប់ពីអតីតបុគ្គលិកស្ថានកុងស៊ុលរងការចោទប្រកាន់ពីបទចារកម្ម
អាមេរិក៖ សហរដ្ឋអាមេរិកកាលពីថ្ងៃចន្ទ បានចោទប្រកាន់ទីក្រុងមូស្គូពីបទប៉ុនប៉ងធ្វើការបំភិតបំភ័យ និងបៀតបៀនបុគ្គលិកអាមេរិក បន្ទាប់ពីភ្នាក់ងារព័ត៌មានរដ្ឋរុស្ស៊ីរាយការណ៍ថា អតីតបុគ្គលិកស្ថានកុងស៊ុលអាមេរិកម្នាក់រងការចោទប្រកាន់ពីសេវាសន្តិសុខរុស្ស៊ី ពីបទប្រមូលព័ត៌មានអំពីសង្គ្រាមនៅអ៊ុយក្រែន និងបញ្ហាផ្សេងទៀតឱ្យក្រុងវ៉ាស៊ីនតោន។ នេះបើតាមការរាយការណ៍របស់ទីភ្នាក់ងារព័ត៌មានរ៉យទ័រ។
ទីភ្នាក់ងារសារព័ត៌មានរដ្ឋរុស្ស៊ី តាស(TASS) បានដកស្រង់សម្ដីសេវាសន្តិសុខសហព័ន្ធរុស្ស៊ី (FSB) ដែលនិយាយថា លោក Robert Shonov ជាជនជាតិរុស្ស៊ី បានបញ្ជូនព័ត៌មានទៅកាន់បុគ្គលិកស្ថានទូតអាមេរិកនៅទីក្រុងមូស្គូ អំពីរបៀបដែលយុទ្ធនាការយោធារបស់រុស្ស៊ី កំពុងជះឥទ្ធិពលដល់ការមិនសប្បាយចិត្តខាងនយោបាយនៅមុនការបោះឆ្នោតប្រធានាធិបតីរុស្ស៊ីឆ្នាំ ២០២៤។
FSB បាននិយាយថា ខ្លួនគ្រោងនឹងសាកសួរបុគ្គលិកស្ថានទូតអាមេរិកដែលមានទំនាក់ទំនងជាមួយលោក Shonov ដែលត្រូវអាជ្ញាធរចាប់ខ្លួនតាំងពីខែឧសភា។
ជុំវិញបញ្ហាចុងក្រោយនេះអ្នកនាំពាក្យក្រសួងការបរទេសអាមេរិក លោក Matthew Miller បានលើកឡើងម្តងទៀតនូវជំហររបស់សហរដ្ឋអាមេរិកថា ការចោទប្រកាន់ប្រឆាំងនឹងលោក Shonov គឺគ្មានមូលដ្ឋានច្បាស់លាស់ទាំងស្រុង។
លោក Miller និយាយក្នុងសេចក្តីថ្លែងការណ៍ថា ៖ «ការកំណត់គោលដៅរបស់រុស្ស៊ីលើ លោក Shonov ក្រោមលក្ខន្តិកៈ «កិច្ចសហប្រតិបត្តិការសម្ងាត់» គ្រាន់តែបង្ហាញពីសកម្មភាពគាបសង្កត់កាន់តែខ្លាំងឡើងដែលរដ្ឋាភិបាលរុស្ស៊ីកំពុងធ្វើប្រឆាំងនឹងពលរដ្ឋរបស់ខ្លួនតែប៉ុណ្ណេះ»។
គួរបញ្ជាក់ថា លោក Shonov បម្រើការឱ្យអគ្គកុងស៊ុលអាមេរិកនៅទីក្រុងចុងបូព៌ារបស់រុស្ស៊ី វ្ល៉ាឌីវ៉ូស្តុក អស់រយៈពេល ២៥ ឆ្នាំ រហូតមកដល់ឆ្នាំ ២០២១ នៅពេលដែលរុស្ស៊ីបញ្ឈប់បុគ្គលិកក្នុងស្រុកពីការបម្រើការឱ្យបេសកកម្មការទូតអាមេរិក។
ក្រៅពីនេះ លោក Miller បន្ថែមថា ទីក្រុងវ៉ាស៊ីនតោនបានដឹងថា FSB ក៏បានកោះហៅអ្នកការទូត២នាក់ ដែលធ្វើការនៅ ស្ថានទូតអាមេរិកនៅទីក្រុងមូស្គូ ពាក់ព័ន្ធនឹងករណីនេះផងដែរ។
អ្នកនាំពាក្យក្រសួងការបរទេសអាមេរិក និយាយថា៖ «យើងប្រឆាំងយ៉ាងខ្លាំង ចំពោះការប៉ុនប៉ងរបស់សេវាសន្តិសុខរុស្ស៊ី ក៏ដូចជាប្រព័ន្ធផ្សព្វផ្សាយរដ្ឋរុស្ស៊ី ក្នុងការបំភិតបំភ័យ និងបៀតបៀនបុគ្គលិករបស់យើង»។
យ៉ាងណាមិញ ស្ថានទូតរុស្ស៊ីនៅទីក្រុងវ៉ាស៊ីនតោន មិនបានឆ្លើយតបភ្លាមៗចំពោះការណ៍នេះទេ៕ ប្រែសម្រួល៖ ហួន ឌីណា
