ក្រសួងការងារកំណត់យកថ្ងៃទី ២៨ ខែកញ្ញាជាថ្ងៃបញ្ចប់កិច្ចប្រជុំចចារកំណត់ប្រាក់ឈ្នួលអប្បបរមារបស់កម្មករនិយោជិតសម្រាប់ឆ្នាំ២០២៤
ភ្នំពេញ៖ នៅក្នុងកិច្ចប្រជុំក្រុមប្រឹក្សាជាតិប្រាក់ឈ្នួលអប្បបរមាលើកទី៤ ស្តីពីការកំណត់ប្រាក់ឈ្នួលអប្បបរមាផ្នែកវាយនភណ្ឌ កាត់ដេរ និងផលិតផលិតផលធ្វើដំណើរនិងកាបូប សម្រាប់ឆ្នាំ២០២៤ តំណាងភាគីកម្មករនិយោជិតនៅតែបន្តរក្សាជំហរតួលេខ២១៥ ដុល្លារ និងតំណាងភាគីនិយោជករក្សាជំហរ២០១ដុល្លារដដែល ។ភាគីទាំងអស់បានឯកភាពនឹងពន្លឿនបញ្ចប់ការពិភាក្សាចុងក្រោយត្រឹមថ្ងៃទី២៨ ខែកញ្ញាខាងមុខ។
ក្រោយកិច្ចប្រជុំនៅថ្ងៃទី១១ ខែកញ្ញា ឆ្នាំ២០២៣ ឯកឧត្តម ហេង សួរ រដ្ឋមន្រ្តីក្រសួងការងារនិងបណ្តុះបណ្តាលវិជ្ជាជីវៈ បានថ្លែងប្រាប់អ្នកសារព័ត៌មានថា ភាគីនីមួយៗ នឹងធ្វើការសម្របសម្រួលផ្ទៃក្នុងរៀងខ្លួនម្តងទៀត ដើម្បីរកឱ្យបាននូវគោលជំហរផ្លូវការរបស់ខ្លួន ដោយនឹងពិនិត្យ និងលើកសំណូមពរដាច់ដោយឡែករៀងខ្លួន ដើម្បីយកមកជូនក្រុមប្រឹក្សាជាតិប្រាក់ឈ្នួលអប្បបរមាដើម្បីដោះស្រាយ នៅថ្ងៃទី១៨ ខែកញ្ញាខាងមុខនេះ។
![](https://asset.ams.com.kh/central/media/2023/09/photo_2023-09-11_15-58-49-1024x682.jpg)
ចំពោះភាពខុសគ្នាច្រើន នៃកំណត់តួលេខរវាងតំណាងកម្មករនយោជិត និងតំណាងនិយោជកនេះដែរ ត្រូវបានឯកឧត្តម ហេង សួរ អះអាងថា ការលើកឡើងនៃតួលេខប្រាក់ឈ្នួលរបស់ភាគីទាំងពីរ អាស្រ័យលើលក្ខណៈវិនិច្ឆ័យទាំង៧ ស្តីពីស្ថានភាពសេដ្ឋកិច្ច និងសង្គម ដោយភាគីខាងកម្មករនិយោជិតផ្អែកបញ្ហាអតិផរណា ខណៈខាងនិយោជក គិតទៅលើភាពប្រកួតប្រជែង តម្រូវការ និងបញ្ហាប្រឈម ក្នុងវិស័យនេះ។
ឯកឧត្តមបានបញ្ជាក់ថា ៖ «ឆ្នាំនេះមិនមានប្រទេសណាដែលដំឡើងប្រាក់ឈ្នួលអប្បបរមានោះទេ ។អ៊ីចឹងនៅពេលគេអត់ដំឡើងហើយយើងដំឡើង ភាគីនិយោជកគេបារម្ភថា អ្នកបញ្ជាទិញអាចបង្វែការបញ្ជាទិញទៅប្រទេសដទៃផ្សេងទៀត ពីព្រោះប្រទេសយើងកំណត់ប្រាក់ឈ្នួលអប្បបរមាជាដុល្លារ»។
![](https://asset.ams.com.kh/central/media/2023/09/photo_2023-09-11_15-58-51-1024x682.jpg)
«ប្រទេសផ្សេងមិនបានពិចារណាលើការដំឡើងហើយ លុយរបស់គេចុះថោក ។ដូចនេះនៅពេលដែលលុយចុះថោក ធ្វើឱ្យប្រាក់ឈ្នួលគេជាដុល្លារកាន់តែទាបទៀត ។ឆ្នាំនេះ ប្រទេសគេមិនចចារ វាជាសម្ពាធមួយដែលធំដែរ ព្រោះថាកម្ពុជា មិនមែនជាប្រទេសតែមួយគត់ដែលផលិត នៅក្នុងវិស័យកាត់ដេរនោះទេ»។ នេះជាការបញ្ជាក់បន្ថែមពីឯកឧត្តម ហេង សួរ។
ទោះជាយ៉ាងណាក៏ដោយឯកឧត្តមថា ភាគីរាជរដ្ឋាភិបាល នឹងខិតខំសម្របសម្រួលដល់ភាគីទាំងសងខាង ដែលធ្វើយ៉ាងឱ្យការចចារឈានដល់ចំណុចរួមមួយ ក្នុងករណីដែលមិនអាចរកចំណុចរួមឃើញ នឹងមានការបោះឆ្នោតសម្រេចតែម្តង។
លោក ណាង សុធី តំណាងភាគីនិយោជក បានប្រាប់ឱ្យដឹងដែរថា ជាជំហរ ខាងនិយោជក ឈានដល់ការដំឡើងបន្តិចគឺ២០១,៥ដុល្លារ ដោយសំណូមពរសុំឱ្យខាងសហជីពឯកភាព។ ប៉ុន្តែខាងសហជីពមិនឯកភាព ទើបក្រុមប្រឹក្សាជាតិប្រាក់ឈ្នួលអប្បបរមាសម្រេចថាយកតួលេខចាស់២០១ ដុល្លារវិញ និងឱ្យភាគីទាំងពីរទៅប្រជុំផ្ទៃក្នុង នឹងកំណត់តួលេខបន្តទៀត សម្រាប់ពិភាក្សាថ្ងៃទី១៨ ខែកញ្ញាខាងមុខនេះ។
![](https://asset.ams.com.kh/central/media/2023/09/photo_2023-09-11_15-58-55-1024x683.jpg)
លោក សុធី បានថ្លែងបែបនេះថា ៖ «ខាងនិយោជកមានការជឿជាក់លើរាជរដ្ឋាភិបាល ចំពោះការសម្របសម្រួលយកតួលេខមួយដែលមានភាពសមរម្យ ដោយថ្ងៃទី១៨ ខែកញ្ញាខាងមុខ នឹងមានការកំណត់តួលេខចុងក្រោយ ហើយថ្ងៃទី២៨ នឹងបោះឆ្នោត យកតួលេខផ្លូវការ ក្រោយមកនឹងសុំគោលការណ៍សម្រេចចុងក្រោយពីរាជរដ្ឋាភិបាល»។
ចំណែកលោក គឹម ចាន់សំណាង ភាគីសហជីពតំណាងកម្មករនិយោជិក វិញក៏បានលើកឡើងដែរថា ភាគីនិយោជិក នឹងបន្តជួបប្រជុំពិភាក្សាគ្នា ដើម្បីកំណត់តួលេខណាមួយដែលអាចទទួលយកបានទាំងអស់គ្នានាកិច្ចប្រជុំខាងមុខទៀត។
លោកថា ៖ «ការប្រជុំបន្តរបស់យើងលើកក្រោយ អាចនឹងមានការប្រែប្រួលចំពោះតួលេខ ដោយសារយើងត្រូវការពិភាក្សាលម្អិតជាមួយសហជីពយើង ដែលមានសមាជិក១៧នាក់ ក្នុងចំណោមនេះមានមតិខ្លះមិនទាន់បានចូលជាធ្លុងមួយនៅឡើយ។ ដូច្នេះយើងនឹងពិភាក្សាគ្នាលម្អិតបន្តទៀត»។
បើតាមរដ្ឋមន្រ្តីក្រសួងការងារ នាវេទិការាជរដ្ឋាភិបាល ជាមួយវិស័យឯកជន នៅខែវិច្ឆកា ឆ្នាំ២០២៣ខាងមុខនេះ សម្ដេចមហាបវរ ហ៊ុន សែន នាយករដ្ឋមន្រ្តីកម្ពុជានឹងពិនិត្យមើល និងកែសម្រួលលើបរិយាកាសធុរកិច្ចនៅកម្ពុជា ដើម្បីឱ្យការវិនិយោគនិងប្រតិបត្តិការអាជីវកម្មកាន់តែមានភាពអំណោយ៕
![](https://asset.ams.com.kh/central/media/2023/09/photo_2023-09-11_15-58-57-1024x683.jpg)
ដោយ៖វណ្ណ សុជាតា