ជម្លោះចោទប្រកាន់៖ឥណ្ឌាបណ្ដេញអ្នកការទូតកាណាដា
ញូវដេលី៖ ប្រទេសឥណ្ឌាបានបណ្តេញអ្នកការទូតកំពូលម្នាក់របស់កាណាដាកាលពីថ្ងៃអង្គារ ដោយបង្កើនភាពតានតឹងរវាងប្រទេសទាំងពីរជុំវិញការចោទប្រកាន់របស់កាណាដាដែលថា ឥណ្ឌាអាចជាប់ពាក់ព័ន្ធនឹងការបាញ់សម្លាប់មេដឹកនាំអ្នកកាន់សាសនាស៊ិក(Sikh) នៅជាយក្រុងវែងឃូវែរ កាលពីខែមិថុនា។ នេះបើតាមការរាយការណ៍របស់ទីភ្នាក់ងារសារព័ត៌មាន AP។
ឥណ្ឌា ដែលហៅការចោទប្រកាន់របស់កាណាដាថាជារឿងមិនសមហេតុផល បាននិយាយថា ការបណ្តេញចេញនេះបានកើតឡើងចំពេលមានការព្រួយបារម្ភកាន់តែខ្លាំងឡើង ចំពោះការជ្រៀតជ្រែករបស់អ្នកការទូតកាណាដាលើបញ្ហាផ្ទៃក្នុងរបស់ឥណ្ឌា និងការចូលរួមរបស់អ្នកការទូតទាំងនោះក្នុងសកម្មភាពប្រឆាំងឥណ្ឌា។ នេះបើយោងតាមសេចក្តីថ្លែងការណ៍ពីក្រសួងកិច្ចការបរទេស។
ទោះជាយ៉ាងណាក៏ដោយ នាយករដ្ឋមន្ត្រីកាណាដា លោក ចាស្ទីន ទ្រូដូ ហាក់ដូចជាព្យាយាមធ្វើឱ្យការប៉ះទង្គិចគ្នាការទូតចុះត្រជាក់ ដោយលោកប្រាប់អ្នកសារព័ត៌មានកាលពីថ្ងៃអង្គារថា ការសង្ស័យលើរដ្ឋាភិបាលឥណ្ឌា មិនមានជាការសម្លឹងរកការបង្កហេតុ ឬដើម្បីធ្វើឱ្យភាពតានតឹងកើនឡើងនោះទេ។
លោកថ្លែងថា ៖ «យើងគ្រាន់តែដាក់ចេញនូវការពិតដូចអ្វីដែលយើងយល់ពីរឿងទាំងនោះ ហើយយើងចង់ធ្វើការជាមួយរដ្ឋាភិបាលឥណ្ឌា ដើម្បីកំណត់អ្វីគ្រប់យ៉ាងឲ្យបានច្បាស់លាស់ និងធានាថា មានដំណើរការត្រឹមត្រូវ។ ឥណ្ឌា និងរដ្ឋាភិបាលឥណ្ឌា ចាំបាច់ត្រូវគិតពីបញ្ហានេះឱ្យបានហ្មត់ចត់បំផុត»។
គួររំឭកថា កាលពីថ្ងៃចន្ទ លោក ទ្រូដូ បាននិយាយថា ឥណ្ឌាអាចមានទំនាក់ទំនងជុំវិញឃាតកម្មលើលោក Hardeep Singh Nijjar ដែលជាមេដឹកនាំក្រុមអ្នកកាន់សាសនាស៊ិខ និងមានសញ្ជាតិកាណាដា កាលពីខែមិថុនា។ រដ្ឋាភិបាលឥណ្ឌាចាប់ទុកលោក Nijjar ថាជាភេរវករចំពោះការគាំទ្រក្រុមផ្ដាច់ខ្លួនរបស់អ្នកកាន់សាសនាស៊ិខក្នុងប្រទេសឥណ្ឌា។
មកទល់ពេលនេះ កាណាដា ដែលមានប្រជាជនអ្នកកាន់សាសនាស៊ិកជាង ៧៧០ ០០០ នាក់ មិនទាន់បានផ្តល់នូវភស្តុតាងណាមួយនៃការជាប់ពាក់ព័ន្ធរបស់រដ្ឋាភិបាលឥណ្ឌានៅឡើយទេ ប៉ុន្តែប្រសិនបើជាការពិត វានឹងបង្ហាញពីរបត់ដ៏សំខាន់មួយសម្រាប់ប្រទេសឥណ្ឌា។ ទោះបីជាយ៉ាងណាក៏ដោយ អស់រយៈពេលជាច្រើនឆ្នាំមកនេះ ឥណ្ឌាបានចោទប្រកាន់កាណាដា ថាផ្តល់សិទ្ធិសេរីភាពដល់ពួកបំបែកខ្លួនស៊ិខ រួមទាំងលោក Nijjar ផងដែរ៕
ប្រែសម្រួល៖ហួន ឌីណា ប្រភព៖ India expels Canadian diplomat, escalating tensions after Trudeau accuses India in Sikh’s killing
