ខេត្តកំពង់ឆ្នាំង៖ រដ្ឋបាលស្រុកកំពង់ត្រឡាច ខេត្តកំពង់ឆ្នាំង បានស្នើឱ្យមន្ត្រីបញ្ឈប់យកដបប្លាស្ទិក ចូលសាលាស្រុកបន្តទៀត និងឱ្យប្រើប្រាស់កែវក្រដាស ឬបំពង់ច្រកទឹកសម្រាប់ប្រើប្រាស់ ជំនួសវិញ។ នៅក្នុងកិច្ចប្រជុំក្រុមប្រឹក្សាស្រុកកំពង់ត្រឡាច កាលពីថ្ងៃទី៣១ ខែតុលា ឆ្នាំ២០២៣ លោក វន ស៊ីផា អភិបាល ស្រុក បានបញ្ជាក់ថា រដ្ឋបាលស្រុក បានខិតខំបំពាក់ ជូនធុងចម្រោះ ទឹកស្អាត ចំនួន២គ្រឿង ជូនមន្រ្តីរដ្ឋបាលស្រុក សម្រាប់បរិភោគ មានទាំងទឹកក្តៅនិងទឹកត្រជាក់។

យោងតាមការបញ្ជាក់ពីលោកអភិបាលស្រុក ការចូលរួមកាត់ បន្ថយការប្រើប្រាស់ប្លាស្ទិក នៅក្នុងរដ្ឋបាលស្រុក គឺធ្វើឡើងដោយមាន ការណែនាំ ពីឯកឧត្តមអភិបាលខេត្តកំពង់ឆ្នាំង និងបន្ទាប់ពីរដ្ឋបាល ខេត្ត និងក្រសួងបរិស្ថាន បានចុះអនុស្សារណៈ លើកកិច្ចសហ ប្រ តិបត្តិការ ចូលរួមក្នុងយុទ្ធនាការកាត់បន្ថយការ ប្រើប្រាស់ប្លាស្ទិក និងការប្តេជ្ញាចិត្ត ”ថ្ងៃនេះ ខ្ញុំមិនប្រើថង់ប្លាស្ទិកទេ” កាលពីថ្ងៃទី៣០ ខែកញ្ញា ឆ្នាំ២០២៣ កន្លងមកនេះ នៅខេត្តកំពង់ឆ្នាំង។

សូមបញ្ជាក់ថា យុទ្ធនាការ «មិនប្រើប្រាស់ថង់ប្លាស្ទិក» ដែលបានដាក់ចេញ ក្រោមគំនិតផ្តួចផ្តើមរបស់ ឯកឧត្តមបណ្ឌិត អ៊ាង សុផល្លែត រដ្ឋមន្ត្រីក្រសួងបរិស្ថាន នៅថ្ងៃទី០១ ខែកញ្ញា កន្លងមក បានកំពុងអនុវត្តន៍យ៉ាងផុលផុសនៅតាមសាលារៀន វត្តអារាម និងតាមរោងចក្រសហគ្រាសនានានៅទូទាំងប្រទេស។

រហូតមកទល់ ថ្ងៃទី៣០ ខែតុលា ឆ្នាំ២០២៣ មានសាលារហូត ដល់ទៅជិត ៤០០០សាលា គ្រូបង្រៀនប្រមាណ ៧៧ម៉ឺននាក់ និងសិស្សចំនួនជាង ២លាននាក់ នៅទូទាំងប្រទេស បានប្រកាសប្តេជ្ញាចិត្ត ចូលរួមអនុវត្តន៍យុទ្ធនាការ «មិនប្រើប្រាស់ថង់ប្លាស្ទិក» យ៉ាងតិច ១ដង ក្នុងមួយសប្តាហ៍។ ជាមួយគ្នានេះ កម្មករ កម្មការិនីជាង ១ម៉ឺននាក់ នៅតាមបណ្តារោងចក្រសហគ្រាសចំនួន ២០ កន្លែង ព្រមទាំងមានអ្នកពាក់ព័ន្ធ ចំនួនជាង ១ម៉ឺនាក់ផ្សេងទៀត បានចូលរួមក្នុងយុទ្ធនាការនេះដែរ។

ឯកឧត្តមបណ្ឌិត អ៊ាង សុផល្លែត រដ្ឋមន្ត្រីក្រសួងបរិស្ថាន បានចាត់ទុកថា ការចូលរួមយ៉ាងផុលផុសពីសិស្សានុសិស្ស និងលោកគ្រូអ្នកគ្រូនៅតាមសាលារៀន និងអ្នកពាក់ព័ន្ធ ក្នុងយុទ្ធនាការកាត់បន្ថយការប្រើប្រាស់ស្ទិកនៅកម្ពុជា បានគ្របដណ្តប់លើប្រជាពលរដ្ឋប្រមាណ ៥០% នៃប្រជាជនសរុបនៅទូទាំងប្រទេស ដែលគឺជាក្តីសង្ឃឹម និងជាចរន្តដ៏ល្អមួយ ដើម្បីឈានឆ្ពោះទៅកាត់បន្ថយការប្រើប្រាស់ ថង់ប្លាស្ទិកនៅក្នុងសង្គមកម្ពុជា។

ឯកឧត្តមរដ្ឋមន្ត្រីក្រសួងបរិស្ថាន បានថ្លែងអំណរគុណ ចំពោះ ការចូលរួមក្នុងយុទ្ធនាការ និងបានគូសបញ្ជាក់ថា ការចូលរួមរបស់របស់ ថ្នាក់ដឹកនាំសាលា លោកគ្រូ អ្នកគ្រូ និងសិស្សានុសិស្ស ព្រមទាំងអ្នកពាក់ព័ន្ធផ្សេងទៀត នឹងជួយធ្វើឱ្យបរិស្ថានស្រស់ស្អាត គ្មានជាតិពុល ដែលជាទីមនោរម្យសម្រាប់ប្រទេសកម្ពុជា៕

ដោយ / គ្រី សម្បត្តិ