អាមេរិក និងកូរ៉េខាងត្បូង ផ្ដោតលើការគំរាមកំហែង ក្នុងជំនួបរវាងរដ្ឋមន្រ្តីការពារជាតិនៃប្រទេសទាំងពីរ
សេអ៊ូល៖រដ្ឋមន្ត្រីការពារជាតិនៃប្រទេសកូរ៉េខាងត្បូង និងសហរដ្ឋអាមេរិកជួបប្រជុំគ្នានៅថ្ងៃចន្ទនេះសម្រាប់កិច្ចពិភាក្សាផ្នែកសន្តិសុខ ដោយរំពឹងថានឹងផ្តោតលើការរួមគ្នាប្រឆាំងនឹងការគំរាមកំហែងពីកូរ៉េខាងជើង រួមទាំងតាមរយៈការអនុវត្តយុទ្ធសាស្ត្របន្ថែមការទប់ទល់។ នេះបើតាមការរាយការណ៍របស់ទីភ្នាក់ងារសារព័ត៌មានរ៉យទ័រ។
យុទ្ធសាស្ត្របន្ថែមការទប់ទល់ ដែលសហរដ្ឋអាមេរិកនឹងប្រើប្រាស់ធនធានយោធាជាយុទ្ធសាស្ត្ររួមទាំងធនធាននុយក្លេអ៊ែរ ដើម្បីការពារសម្ព័ន្ធមិត្តរបស់ខ្លួន កាន់តែមានសារសំខាន់ នៅពេលដែលកូរ៉េខាងជើង បន្តទៅមុខជាមួយនឹងកម្មវិធីមីស៊ីលផ្លោង និងនុយក្លេអ៊ែររបស់ខ្លួន។
រដ្ឋមន្ត្រីការពារជាតិកូរ៉េខាងត្បូង លោក ស៊ីន វុន ស៊ិក(Shin Won-sik )បានស្វាគមន៍សមភាគីអាមេរិក លោក Lloyd Austin សម្រាប់កិច្ចប្រជុំប្រឹក្សាសន្តិសុខប្រចាំឆ្នាំ (SCM) ដោយអ្នកទាំងពីររំពឹងថានឹងពិនិត្យមើលផែនការសម្រាប់អនាគតនៃសម្ព័ន្ធភាពផងដែរ។
នាពេលនេះ សង្គ្រាមអ៊ីស្រាអែល-ហាម៉ាស់ និងការឈ្លានពានរបស់រុស្ស៊ីលើអ៊ុយក្រែនដែលកំពុងបន្ត បានបន្ថែមបន្ទុកលើកិច្ចប្រជុំ ចំពេលទីក្រុងព្យុងយ៉ាងមានកិច្ចសហប្រតិបត្តិការយោធាកាន់តែខ្លាំងឡើងជាមួយទីក្រុងមូស្គូ និងកង្វក់ពាក់ព័ន្ធនឹងការគាំទ្ររបស់កូរ៉េខាងជើងចំពោះក្រុមសកម្មប្រយុទ្ធហាម៉ាស់។
កាលពីថ្ងៃអាទិត្យ ប្រធានាធិបតីកូរ៉េខាងត្បូង លោក យូន ស៊កយល បាននិយាយពេលជួបជុំទទួលទានអាហារពេលល្ងាចក្នុងនាមជាម្ចាស់ផ្ទះ សម្រាប់ក្រុមមន្រ្តីពីប្រទេសផ្សេងៗដែលចូលរួមកិច្ចប្រជុំ SCM ថា សម្ព័ន្ធមិត្តត្រូវតែត្រៀមខ្លួនសម្រាប់ការបង្កហេតុណាមួយពីកូរ៉េខាងជើង រួមទាំង «ការវាយប្រហារដ៏គួរឱ្យភ្ញាក់ផ្អើលបែបហាម៉ាស់»។
បន្ថែមពីនេះទៀត ការិយាល័យរបស់ លោក យូន បាននិយាយក្នុងពិធីទទួល លោក Austin ថា រដ្ឋមន្រ្តីការពារជាតិអាមេរិករូបនេះ បានអះអាងសារជាថ្មីថា អាមេរិកមានការប្តេជ្ញាចិត្តប្រើគ្រប់សមត្ថភាពយោធារបស់ខ្លួនដើម្បីការពារកូរ៉េខាងត្បូង។
ជាមួយគ្នានេះផងដែរ ក៏មានសេចក្ដីរាយការណ៍នៅថ្ងៃចន្ទថា រដ្ឋមន្ត្រីការពារជាតិនៃប្រទេសទាំងពីរ រំពឹងថានឹងពិភាក្សាថាតើកិច្ចព្រមព្រៀងយោធារវាងកូរ៉េទាំង២ដែលសម្រេចឡើងក្នុងឆ្នាំ ២០១៨ គួរតែត្រូវបានផ្អាកដែរឬអត់។ រដ្ឋាភិបាលរបស់លោក យូន កន្លងមក បានលើកឡើងពីកិច្ចព្រមព្រៀងនេះថាជាការរារាំងដល់ការឆ្លើយតបខាងយោធាដ៏មានប្រសិទ្ធភាពចំពោះកូរ៉េខាងជើង។
គួរបញ្ជាក់ថា កិច្ចព្រមព្រៀងរវាងមេដឹកនាំកូរ៉េខាងជើងលោក គីម ជុងអ៊ុន និងអតីតប្រធានាធិបតីកូរ៉េខាងត្បូងនាពេលនោះ លោក មូន ចេអ៊ីន អំពាវនាវឱ្យបញ្ឈប់រាល់សកម្មភាពអរិភាព បង្កើតតំបន់គ្មានការហោះហើរជុំវិញព្រំដែន និងលុបបំបាត់មីន និងប៉ុស្តិ៍យាមក្នុងតំបន់គ្មានយោធា។
គេមើលឃើញថា ជំនួបរវាង លោក Austin និងលោក Shin នាពេលនេះ កើតឡើងក្រោយក្រុងព្យុងយ៉ាង រងការចោទប្រកាន់ថាបានដឹកជញ្ជូនអាវុធទៅឱ្យរុស្ស៊ី ជាថ្នូរនឹងការគាំទ្រផ្នែកបច្ចេកវិទ្យាយោធា ដើម្បីជួយដល់កម្មវិធីអាវុធរបស់កូរ៉េខាងជើង៕
ប្រែសម្រួល៖ហួន ឌីណា
ប្រភព៖ North Korea threat to be focus of Austin’s security talks in Seoul
