ភ្នំពេញ៖រដ្ឋមន្រី្តក្រសួងសាធារណការ និងដឹកជញ្ជូនឡាវ បានស្នើដល់ភាគីកម្ពុជា ឱ្យ​ពិនិត្យពិចារណាទៅលើការបង្កើនកា​រតភ្ជាប់ហេដ្ឋារចនាសម្ព័ន្ធ និងបង្កើនការកែលម្អច្រករបៀងដឹកជញ្ជូន ដើម្បីបង្កើនលំ​ហូរទំនិញ និងទេស​ចរណ៍ទ្វេភាគីឱ្យកាន់តែប្រសើរឡើងថែមទៀត។ ​

ការស្នើនេះ បានធ្វើឡើងតាមរយៈជំនួបពិភាក្សាការងារទ្វេភាគី នាប្រទេសឡាវ ជាមួយឯកឧត្តម ប៉េង ពោធិ៍នា រដ្ឋមន្ដ្រីក្រសួងសាធារណការ និងដឹកជញ្ជូនកម្ពុជា កាលចុងសប្តាហ៍មុន។

ប្រភពក្រសួងសាធារណការនិងដឹកជញ្ជូននៅថ្ងៃទី១៣ ខែវិច្ឆិកា ឆ្នាំ២០២៣បានឱ្យដឹងថា ជំនួបពិភាក្សានេះ ក្នុងគោលបំណងពង្រឹង និងពង្រីកកិច្ចសហប្រតិ​បត្តិការលើវិស័យដឹកជញ្ជូនរវាងប្រទេសកម្ពុជា និងឡាវដែលជាប្រទេសមានភូមិផងរបងជាប់គ្នា។​នាឱកាសនោះឯកឧត្តម ង៉ាមប៉ាសុង ម៉ុងម៉ានី( Ngampasong Muongmany )រដ្ឋមន្រី្តក្រសួ​ងសាធារណការ និងដឹកជញ្ជូនឡាវ ក៏​បានថ្លែងដោយ​ស្នើឱ្យភាគីកម្ពុជា ជួយពិនិត្យពិចារណាទៅលើការបង្កើនការតភ្ជាប់ហេដ្ឋារចនាសម្ព័ន្ធ បង្កើនការកែលម្អ​ច្រករបៀងដឹកជញ្ជូន និងបង្កើនលំហូរទំនិញ-ទេសច​រណ៍-សេវា រវាងប្រទេសពីរ។​

លោកបានបន្តថា ៖ «ការស្នើនេះ សំដៅធ្វើឱ្យកាន់តែប្រសើរឡើង ធ្វើយ៉ាងណាឈានទៅរួមចំណែកជំរុញដ​ល់ការអភិវឌ្ឍ​សេដ្ឋកិច្ច សង្គម និងវប្បធម៌ ទាំងក្នុងក្របខ័ណ្ឌទ្វេភាគី និងតំបន់បន្ថែមទៀត»។ ​

ជាការឆ្លើយតបទៅនឹងការលើកឡើង និងសំណើរបស់ភាគីឡាវ ឯកឧត្តម​ ប៉េង ពោធិ៍នា ​បានចាត់ទុកថាការតភ្ជាប់ហេដ្ឋារចនាសម្ព័ន្ធរវាងប្រទេសទាំងពីរ ពិតជាមានសារៈសំខាន់ណាស់។​

​លោកបានបញ្ជាក់ថា ៖ «ជារួម ការតភ្ជាប់ហេដ្ឋារចនាសម្ព័ន្ធរវាងប្រទេសទាំងពីរ គឺពិតជាសំខាន់ ក្នុងការអភិ​វឌ្ឍន៍​សង្គម-សេដ្ឋកិច្ច ហើយដែលការតភ្ជាប់នេះគឺស្របទៅតាមផែនការមេគ្រប់ជ្រុងជ្រោយ ស្តីពីប្រព័​ន្ធដឹកជញ្ជូនអន្តរមធ្យោបាយ និងភស្តុភារកម្ម ២០២៣-២០៣៣ ដែលរាជរដ្ឋាភិបាលកម្ពុជាទើបបានអនុម័តកាលពីពេលថ្មីៗនេះផងដែរ»។​

ពា​ក់​ព័ន្ធ​​រឿង​នេះ​ ​លោក​ គី សេរី​វ​ឌ្ឍន៍​​ អ្ន​ក​ស្រាវជ្រាវ​សេ​ដ្ឋ​កិ​ច្ច​ និង​ជា​ប្រធាន​មជ្ឈមណ្ឌល​សិក្សា​ចិន នៃ​រា​ជប​ណ្ឌិ​ត្យ​​​ស​ភាក​ម្ពុ​ជា ថ្លែងនៅថ្ងៃទី១៣ ខែវិច្ឆិកាថា កន្លងមកកម្ពុជា ក៏គ្រោងតភ្ជាប់ផ្លូវដែកល្បឿនលឿនពីប្រ​ទេសចិន កាត់តាមប្រទេសឡាវផងដែរ ហើយការដាក់ស្នើឱ្យពន្លឿនការតភ្ជាប់ហេដ្ឋារចនាសម្ព័ន្ធរបស់ ឡាវនាពេលនេះ គឺជាចរន្តសេដ្ឋកិច្ចដ៏ធំមួយរបស់កម្ពុជា ពិសេសអាចជួយលើកកម្ពស់ពាណិជ្ជកម្មទ្វេភាគីកាន់តែប្រសើរបន្ថែមទៀត។​

លោកបន្តថា ៖ «យើងដឹងថា កំពង់ផែរបស់កម្ពុជា នឹងដើរតួ​នាទីសំខាន់ក្នុងការឆ្លងកាត់ទំនិញទៅកាន់ប្រ​ទេសឡាវពីព្រោះប្រទេសឡាវមិនមានព្រំដែនសមុទ្រទេ មានតែកម្ពុជាទេ។នេះជាឱកាសរបស់កម្ពុជាក្នុងការដឹកជញ្ជូនពាណិជ្ជកម្មទៅកាន់ប្រទេសឡាវ និងការកសាងទំនាក់ទំនងបន្ថែម»។​

លោក គី សេរី​វ​ឌ្ឍន៍ បានបន្តថែមថា លើសពីនេះ កិច្ចសម្រួលពាណិជ្ជកម្មតាមតំបន់ព្រំដែនរវាងប្រទេសទាំងពីរ ក៏ជាកត្តាសំខាន់ក្នុងការលើកទឹ​កចិត្តឱ្យមានពាណិជ្ជកម្មទៅវិញទៅមកកាន់តែខ្លាំង ព្រមទាំងធ្វើឱ្យកម្ពុជាកាន់តែមានឱកាសទិញវារីអគ្គិសនីពីប្រទេសឡាវនៅក្នុងតម្លៃសមស្របថែមទៀត។ ​

បើតាមសភាពាណិជ្ជកម្មកម្ពុជា ធ្លាប់បានលើកឡើង​ កាល​ពី​ខែកុម្ភៈ ឆ្នាំ​២០២៣​កន្លងមកថា ទំហំពាណិជ្ជកម្មទ្វេភាគីកម្ពុជា-ឡាវ បានកើនឡើងពី ១៦០ លានដុល្លារអាមេរិកក្នុងឆ្នាំ២០២១ ដល់ ២១០ លានដុល្លា​រអាមេរិកនៅឆ្នាំ២០២២។​

បើតាមក្រសួងសាធារណការដដែលនោះ​ នៅក្នុងជំនួបរវាងរដ្ឋមន្រ្តីដឹកជញ្ជូនកម្ពុជា-ឡាវ ក៏បានឯកភាពគ្នាបង្កលក្ខណៈងាយស្រួលទៅវិញទៅមកដើម្បីបន្ត និងពង្រីកកិច្ចសហប្រតិបត្តិការរវាងប្រ​ទេសទាំងពីរ ពិសេសការអនុវត្តន៍​គម្រោងនានាដែលនឹងផ្តល់ផលប្រយោជន៍ទៅវិញទៅមកជូនប្រជាពល​រដ្ឋប្រទេសទាំងពីរថែមទៀត៕

ដោយ៖បូរ ពេជ្រហ្សាលីន