ធនាគារជាតិនៃកម្ពុជា និងធនាគារកណ្តាលចិនចុះអនុស្សរណៈយោគយល់គ្នាដើម្បីជំរុញនវានុវត្តន៍ក្នុងវិស័យធនាគារនិងប្រព័ន្ធទូទាត់សងប្រាក់ រវាងកម្ពុជា និងចិន
ភ្នំពេញ៖ ធនាគារជាតិនៃកម្ពុជា(National Bank of Cambodia) និងធនាគារកណ្តាលចិន (People’s Bank of China)បានចុះហត្ថលេខាលើអនុស្សរណៈយោគយល់ដើម្បីជំរុញនវានុវត្តន៍ក្នុងវិស័យធនាគារនិងប្រព័ន្ធទូទាត់សងប្រាក់ លើកកម្ពស់សុវត្ថិភាព និងប្រសិទ្ធភាពប្រតិបត្តិការទូទាត់ឆ្លងដែនរវាង កម្ពុជា និង ចិន ។
ការចុះហត្ថលេខាលើអនុស្សរណៈយោគយល់គ្នានេះបានធ្វើឡើងកាលពីថ្ងៃទី២១ ខែវិច្ឆិកា ឆ្នាំ២០២៣ នាទីក្រុងប៉េកាំង នៃសាធារណរដ្ឋប្រជាមានិតចិន ។អនុស្សរណៈយោគយល់មានចំនួនពីរ គឺទី១ កិច្ចសហប្រតិបត្តិការនវានុវត្តន៍ហិរញ្ញវត្ថុ និងប្រព័ន្ធទូទាត់សងប្រាក់ និងទី២ ការបង្កើតកិច្ចសម្របសម្រួលក្នុងការទូទាត់និងផាត់ទាត់នៅកម្ពុជា។
តាមរយៈសេចក្តីប្រកាសព័ត៌មានរបស់ធនាគារជាតិនៃកម្ពុជាបានឱ្យដឹងថា ក្រៅពី ជំរុញការធ្វើនវានុវត្តន៍ក្នុងវិស័យធនាគារនិងប្រព័ន្ធទូទាត់សងប្រាក់ហើយ អនុស្សរណៈនេះក៏នឹងកសាងសមត្ថភាពវិស័យធនាគារនៅកម្ពុជាដើម្បីឆ្លើយតបទៅនឹងកំណើននៃពាណិជ្ជកម្ម ការវិនិយោគ និងលំហូរហិរញ្ញវត្ថុទ្វេភាគីរវាងប្រទេសចិន និងកម្ពុជាផងដែរ។
នៅក្នុងបទសម្ភាសជាមួយអ្នកសារព័ត៌មានរបស់ទូរទស្សន៍ CNBC នៃប្រទេសសិង្ហបុរី កាលពីពេលពាក់កណ្តាលខែវិច្ឆិកាកន្លងទៅថ្មីៗនេះ លោកជំទាវ ជា សិរី ទេសាភិបាលធនាគារជាតិនៃកម្ពុជា បាននិយាយថា ការរីកចម្រើននៃបច្ចេកវិទ្យាហិរញវត្ថុ បានផ្តល់ផលប្រយោជន៍ជាច្រើនដល់ប្រព័ន្ធធនាគារនៅកម្ពុជា ជាពិសេសប្រព័ន្ធទូទាត់ សងប្រាក់តាមបែបឌីជីថល ដែលមានភាពឆាប់រហ័ស ងាយស្រួល និងតម្លៃទាប។ បច្ចេកវិទ្យាហិរញ្ញវត្ថុ ក៏បានធ្វើបដិវត្តកម្មក្នុងសេវាផ្ទេរប្រាក់ និងទូទាត់ទាំងក្នុង និងក្រៅប្រទេសផងដែរ។
លោកជំទាវបានបន្ថែមថា ធនាគារជាតិនៃកម្ពុជា បានបង្កើតឡើងនូវប្រព័ន្ធទូទាត់បាគង ដើម្បីផ្តល់លទ្ធភាពដល់អ្នកប្រើប្រាស់អាចទូទាត់ឆ្លងគ្រឹះស្ថានហិរញ្ញវត្ថុបានភ្លាមៗ តាមរយៈការស្កេន QR Code បានយ៉ាងងាយស្រួល។
លោកជំទាវ ជា សិរី បានបញ្ជាក់ថា ៖ «តាមរយៈកិច្ចសហប្រតិបត្តិការនេះ អ្នកប្រើប្រាស់ប្រព័ន្ធបាគងអាចធ្វើការទូទាត់ជាមួយ អាជីវករដែលមាន ប្រព័ន្ធ Alipay ចំនួន ៨៣ លានអាជីវករនៅទូទាំងសកលលោក។ ដូចគ្នានេះដែរ ភ្ញៀវទេសចរអន្តរជាតិដែលមកទស្សនានៅកម្ពុជាក៏អាចធ្វើការទូទាត់តាមរយៈប្រព័ន្ធ KHQR ដោយងាយស្រួល និងទទួលបានបទពិសោធក្នុងការទូទាត់នៅកម្ពុជាដែលល្អជាងមុន សំដៅរួមចំណែកជំរុញកំណើនសេដ្ឋកិច្ចឱ្យកាន់តែប្រសើរឡើងថែមទៀត»។
លោកជំទាវបានរំលឹកដល់អាជីវករកម្ពុជាផងដែរថា ត្រូវមានគណនីជាប្រាក់រៀល និងទទួលយកប្រាក់រៀល និងបានស្នើឱ្យគ្រឹះស្ថានធនាគារទាំងអស់លើកទឹកចិត្តអាជីវកររបស់ខ្លួនឱ្យបើកគណនីជាប្រាក់រៀល និងធ្វើការទូទាត់ជារៀល ដើម្បីទទួលបានអត្ថប្រយោជន៍ដ៏ច្រើនពីប្រព័ន្ធនេះ។
បណ្ឌិត អ៊ិន ចាន់នី ប្រធាននាយកប្រតិបត្តិធនាគារអេស៊ីលីដា ថ្លែងឱ្យដឹងនៅថ្ងៃទី២២ ខែវិច្ឆិកា ដោយលោកយល់ឃើញថា ការចុះអនុស្សរណៈរវាងធនាគារជាតិនៃកម្ពុជា និងធនាគារកណ្តាលចិន មានសារៈសំខាន់ខ្លាំងណាស់ និងជាការបើកផ្លូវមួយ សម្រាប់ធនាគារពាណិជ្ជកម្មនៅកម្ពុជា ជំរុញការទូទាត់តាមប្រព័ន្ធឌីជីថល រវាងប្រទេសទាំងពីរ។
លោកបានបញ្ជាក់ថា ៖ «បើតាមខ្ញុំចាំ កាលពីអំឡុងឆ្នាំ២០១០ អេស៊ីលីដា ក៏ធ្លាប់ចុះកិច្ចព្រមព្រៀងជាមួយ UPI (Union Pay International) ដើម្បីសម្រួលការទូទាត់ជាទម្រង់កាត។ យើងមានគោលដៅធំដើម្បីពង្រីកការទូទាត់ទៅកាន់គោលដៅប្រទេសជាច្រើននៅជុំវិញពិភពលោក។និយាយរួមកន្លែងណាក៏ដោយ ឱ្យតែធនាគារកណ្តាលរបស់យើង (NBC) គាត់ត្រួសត្រាយផ្លូវមុន បើកផ្លូវឱ្យមុន យើងនឹងអនុវត្តតាមក្រោយ»។
សូមរំលឹកថា នៅក្នុងឆ្នាំ២០២៣នេះ ធនាគារជាតិនៃកម្ពុជា(National Bank of Cambodia) បានចុះMoU ជាមួយធនាគារ និងប្រព័ន្ធទូទាត់របស់ចិន ចំនួន៣ហើយ រួមមានជាមួយក្រុមហ៊ុនUnionPay International, ក្រុមហ៊ុន AliPay Connect Pte. Ltd. និងធនាគារកណ្តាលចិន (People’s Bank of China) ដើម្បីជំរុញការទូទាត់តាមឌីជីថល ដោយប្រើប្រាស់ប្រាក់រៀល របស់កម្ពុជា និងប្រាក់យ័នរបស់ ឱ្យមានលក្ខណៈទូលំទូលាយបន្ថែមទៀតនៅក្នុងប្រទេសទាំងពីរ៕
ដោយ៖វណ្ណ សុជាតា
