អាមេរិក៖ ក្រុមហ៊ុន​អភិវឌ្ឍន៍បញ្ញាសិប្បនិម្មិតដែលមានមូលដ្ឋាននៅទី​ក្រុ​ងសាន់​ហ្វ្រាន់ស៊ីស្កូ សហរដ្ឋ​អាមេរិកOpenAI បាននិយាយ​កាលពីល្ងាចថ្ងៃអង្គារថាខ្លួន​បានឈានដល់កិច្ចព្រមព្រៀងជា​គោលការណ៍​​សម្រាប់​ការនាំយកសហស្ថាបនិករបស់ខ្លួនលោកSam Altmanត្រឡ​ប់មកធ្វើ​ជានាយក​ប្រតិបត្តិ​​​វិញ​​​ត្រឹម ​៥ថ្ងៃ បន្ទាប់ពីការបណ្តេញចេញដ៏គួរឱ្យភ្ញាក់ផ្អើល និងចម្រូងចម្រាសនៅក្នុងវិស័យបច្ចេកវិទ្យា។

ការត្រឡប់មកវិញរបស់ Altman នឹងស្ថិតក្រោយក្រុមប្រឹក្សាភិបាលថ្មីដែលទើបបង្កើតដែលមាន ​អតីត​សហនាយកប្រតិបត្តិ Salesforce លោក Bret Taylor ជាប្រធាន ​លោក Larry Summers អតីត​រដ្ឋមន្ត្រីក្រសួងរតនាគារសហរដ្ឋអាមេរិក និងអតីត​ក្រុមប្រឹក្សាភិបាល​​ដើម​​មួយរូបគឺលោក Adam D’Angelo ជានាយក។

គួររំឭកថា Altman ត្រូវបានបណ្តេញចេញ​កាលពីថ្ងៃសុក្រសប្តាហ៍មុន បន្ទាប់ពីមានការប៉ះទង្គិច​ជាមួយ​ក្រុមប្រឹក្សាភិបាលចាស់​ជុំវិញការជំរុញរបស់ខ្លួនឱ្យ OpenAI ផ្តោតលើការរុករក​កែប្រែ​បញ្ញាសិប្បនិម្មិត​ទៅជាអាជីវកម្ម​ដែលបង្កើតផលិតផល។ ជុំវិញការបណ្តេញ Altman ក្រុមប្រឹក្សាភិបាលដើម បានផ្តល់​ការ​ពន្យល់តិចតួច ដោយថា CEO របស់ខ្លួនខ្វះភាពស្មោះត្រង់ ​និងថា​ការធ្វើនោះគឺដើម្បី​ការពារ​បេសកកម្ម​​របស់ OpenAI ក្នុងការអភិវឌ្ឍ AI ដែលផ្តល់អត្ថប្រយោជន៍ដល់មនុស្សជាតិ។

ការផ្លាស់ប្តូរនោះបានធ្វើឱ្យសហគមន៍បច្ចេកវិទ្យា និងអ្នកវិនិយោគ OpenAI ភ្ញាក់ផ្អើលជាខ្លាំង។ ចំណែក​អ្វីដែលធ្វើ​ឱ្យការ​បណ្តេញ Sam Altman កាន់តែច្របូកច្របល់កាលពីចុងសប្តាហ៍កន្លងទៅ​គឺដោយសារ​លោក​បាន​យល់​ព្រម​ផ្លាស់ប្តូរទៅធ្វើការឱ្យ Microsoft ដើម្បីដឹកនាំក្រុមស្រាវជ្រាវថ្មី​មួយ ដែលធ្វើឱ្យ​ភាគច្រើន​នៃបុគ្គលិក​របស់ OpenAI គំរាមចាកចេញពីក្រុមហ៊ុន លុះត្រាតែក្រុមប្រឹក្សាភិបាល​លាលែង​ពីតំណែង ហើយហៅលោក Altman ចូលមកធ្វើជា CEO វិញ​។

លោក Johann Laux អ្នកជំនាញនៅវិទ្យាស្ថានអ៊ិនធឺណិត Oxford ដែលផ្តោតលើការត្រួតពិនិត្យ​របស់​មនុស្ស​លើបញ្ញាសិប្បនិម្មិតបាននិយាយថា៖ «បញ្ហារបស់ក្រុមហ៊ុន OpenAI បង្ហាញឱ្យយើងឃើញពី​ភាពផុយ​ស្រួយ​នៃប្រព័ន្ធអេកូឡូស៊ីរបស់ AI ពេលនេះ បូករួមទាំងការដោះស្រាយហានិភ័យរបស់ AI ផងដែរ»។

សម្រាប់ Sam Altman បន្ទាប់ពីកិច្ចចរចាបានបញ្ចប់ទៅដោយជោគជ័យ លោកបាន​ប្រកាសនៅលើ​បណ្តាញសង្គម X ថាខ្លួនបាននិយាយជាមួយនឹងក្រុមប្រឹក្សាភិបាលថ្មីរួចរាល់ និងដោយមានការគាំទ្រពី Satya លោកកំពុងទន្ទឹងរង់ចាំការវិលត្រឡប់ទៅកាន់ OpenAI និងការកសាងភាព​ជាដៃគូដ៏រឹងមាំ​ជាមួយក្រុមហ៊ុន Microsoft៕

ប្រែសម្រួល៖ ស្រ៊ុន សិរីវឌ្ឍនៈ

ប្រភព៖ https://apnews.com/article/altman-openai-chatgpt-31187f7f6eca8ff9d0eef7585aac6ace