សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភានៃព្រះរាជាណាចក្រកម្ពុជា នាព្រឹកថ្ងៃពុធ ទី១៣ ខែធ្នូ ឆ្នាំ២០២៣ បានដឹកនាំបន្តសម័យប្រជុំរដ្ឋសភា លើកទី១ នីតិកាលទី៧ ដើម្បីបោះឆ្នោតទុកចិត្តសមាសភាពគណៈកម្មាធិការជាតិរៀបចំការបោះឆ្នោត ដោយរដ្ឋសភា នីតិកាលទី៧ ចំនួន៩រូប។

អង្គប្រជុំរដ្ឋសភា បានបោះឆ្នោតជូន ឯកឧត្តម ប្រាជ្ញ ចន្ទ ជាប់ជាប្រធានគណៈកម្មាធិការជាតិរៀបចំការបោះឆ្នោត ឯកឧត្តម ជឺ ចំណាន ជាអនុប្រធានគណៈកម្មាធិការជាតិរៀបចំការបោះឆ្នោត និងសមាជិកគណៈកម្មាធិការជាតិរៀបចំការបោះឆ្នោត ចំនួន ៧រូបទៀត គឺ ឯកឧត្តម មាន សទិ ឯកឧត្តម ឌឹម សុវណ្ណារុំ ឯកឧត្តម សោម សូរីដា ឯកឧត្តម ហេង ស៊ីឡេង ឯកឧត្តម យិច សមិទ្ធិ ឯកឧត្តម ហ៊ែល សារ៉ាត់ និងឯកឧត្តម ហង្ស ពុទ្ធា។

សមាសភាពថ្នាក់ដឹកនាំគណៈកម្មាធិការជាតិរៀបចំការបោះឆ្នោតថ្មីនៃនីតិកាលទី៧រដ្ឋសភានេះ ត្រូវធ្វើសច្ចាប្រណិធាននៅព្រះបរមរាជវំាងជាមុនសិន មុនចូលកាន់តំណែង។ គណៈកម្មាធិការជាតិរៀបចំការបោះឆ្នោត ហៅគាត់ថា (គ.ជ.ប) មានសមត្ថកិច្ចក្នុងការធ្វើផែនការរៀបចំ និងចាត់ចែងការបោះឆ្នោតក្នុងទូទាំងប្រទេស ក្រោមបាវចនា ឯករាជ្យ អព្យាក្រឹត សច្ចៈ យុត្តិធម៌ តម្លាភាព។

គួរឱ្យដឹងថា សមាសភាព គ.ជ.ប ចំនួន ៤រូប ខាងកូតាគណបក្សប្រជាជនកម្ពុជា មានដូចជាៈ
១.ឯកឧត្តម ប្រាជ្ញ ចន្ទ
២.ឯកឧត្តម សោម សូរីដា
៣.ឯកឧត្តម ឌឹម សុវណ្ណារុំ
៤.ឯកឧត្តម មាន សទិ
ចំណែកសមាសភាព គ.ជ.ប ចំនួន ៤រូប ខាងកូតាគណបក្សហ៊្វុនស៊ិនប៉ិច រួមមានៈ
១.ឯកឧត្តម ជឺ ចំណាន
២.ឯកឧត្តម ហេង ស៊ីឡេង
៣.ឯកឧត្តម យិច សមិទ្ធិ
៤.ឯកឧត្តម ហ៊ែល សារ៉ាត់
ដោយឡែកចំពោះបេក្ខភាពទី៩ របស់គណៈកម្មាធិការជាតិរៀបចំការបោះឆ្នោតមួយរូប ដែល គណបក្ស ប្រជាជនកម្ពុជា និងគណបក្សហ៊្វុនស៊ិនប៉ិច បានឯកភាពគ្នាជ្រើសរើសយកនោះ គឺឯកឧត្តម ហង្ស ពុទ្ធា ៕
ដោយ៖ពលជ័យ
រូបភាព៖រដ្ឋសភា