អាមេរិក៖មួយឆ្នាំនៃភាពចលាចលរវាងមហាអំណាចពិភពលោកគឺ ចិន​ និងអាមេរិក ជុំវិញបញ្ហាបង្ហោះ​បាឡុង ចារកម្ម ការប្រកួតប្រជែងគ្នាលើការផលិតបន្ទះឈីប និងភាពតានតឹងផ្នែកយោធា បានរុញឱ្យ ទំនាក់​ទំនងប្រទេសទាំងពីរកាន់តែល្អក់កករ។

ដោយឡែក ឆ្នាំ ២០២៤ ត្រូវបានគេមើលឃើញថា ជាឆ្នាំដែលទំនាក់ទំនងប្រទេសទាំងពីរ​មានភាព​ចលាចលកាន់តែខ្លាំង។ នោះក៏អាចបណ្ដាលមកពី ការបោះឆ្នោតប្រធានាធិបតីថ្មីនៅតៃវ៉ាន់ ក៏ដូចជា​ការបោះឆ្នោតប្រធានាធិបតីថ្មីនៅអាមេរិក និងសង្រ្គាមពាណិជ្ជកម្មបន្តទៀត។

នៅក្នុងការបោះឆ្នោតប្រធានាធិបតីនៅតៃវ៉ាន់ គណៈបក្សប្រជាធិបតេយ្យ (DPP) ដែលកំពុងកាន់​អំណាច ហាក់ដូចជាបន្តនាំមុខសម្រាប់ការបោះឆ្នោតអាណត្តិក្រោយ ខណៈដែលចិនដីគោកចាត់ទុក គណៈបក្សនេះថាមានភាពឯករាជ្យនិយមហួសហេតុពេក។

នៅរាល់មុនការបោះឆ្នោតម្ដងៗ តៃវ៉ាន់ និងចិនតែងមានភាពតានតឹងផ្នែកនយោបាយ និងយោធា។ មានម្ដងនោះ ក្នុងឆ្នាំ ១៩៩៦ ចិនរហូតដល់ធ្វើសមយុទ្ធយោធា និងតេស្តមីស៊ីល នាំឱ្យអាមេរិកដែល​ជាសម្ព័ន្ធមិត្តរបស់តៃវ៉ាន់ បញ្ចូនយន្ដហោះចម្បាំងទៅកាន់តំបន់កោះនោះតែម្ដង។

ចំណែកឯការបោះឆ្នោតលើកនេះ ទីក្រុងប៉េកាំងបានដាក់សម្ពាធផ្នែកយោធា និងនយោបាយ​ម្ដងទៀត និងថែមទាំងបានព្រមានតៃវ៉ាន់ក្នុងការសម្រេចចិត្តឱ្យបានហ្មត់ចត់ ព្រោះពួកគេមានតែ ​ជម្រើសពីរ​ប៉ុណ្ណោះគឺ សង្គ្រាម ឬសន្តិភាព។

រីឯការបោះឆ្នោតប្រធានាធិបតីនៅអាមេរិកវិញ ក៏ទំនងជាជួបប្រទះបញ្ហាចម្រូងចម្រាស់ កាន់តែខ្លាំង​ផងដែរ។ ចម្រូងចម្រាស់ដោយសារ ចុងឆ្នាំ ២០២៣នេះ សម្ទុះនៃការគាំទ្រអតីតប្រធានា ធិបតីអា​មេរិក លោក ដូណាល់ ត្រាំ ហាក់កក្រើកឡើងគួរឱ្យកត់សម្គាល់។

ទន្ទឹមនឹងស្ថានការណ៍នេះ សាធារណជន ក៏ដូចជាថ្នាក់ដឹកនាំជុំវិញពិភពលោកកំពុងដាក់ចម្ងល់ថា តើលោកត្រាំអាចនឹងវិលមកកាន់តំណែងជាប្រធានាធិបតីនៅអាណត្តិក្រោយដែរឬទេ?

សម្រាប់ចិន អតីតប្រធានាធិបតី ដូណាល់ ត្រាំ ប្រៀបបានទៅនឹងសុបិនអាក្រក់មួយរបស់គេ ស្ដែងចេញតាមរយៈការថ្កោលទោសចិនចំពោះជំងឺកូវីដ១៩ កាលពីពេលកន្លងទៅ។

ប៉ុន្តែនៅក្នុងន័យមួយទៀត ការវិលត្រឡប់របស់លោកត្រាំ ក៏អាចជាអត្ថប្រយោជន៍ភូមិសាស្ត្រ​នយោបាយ​សម្រាប់ប្រទេសចិនផងដែរ ព្រោះកន្លងមក លោកបៃឌិន បានបង្កើនសម្ពាធពាណិជ្ជកម្ម​យ៉ាងខ្លាំងដល់ចិន តាមរយៈការតម្លើងពន្ធ និងការពង្រឹងសម្ព័ន្ធមិត្តរបស់ខ្លួន ជាពិសេសនៅ​តំបន់អាស៊ី។

​

សង្គ្រាមពាណិជ្ជកម្មរវាងចិន និងអាមេរិកចំពោះបន្ទះឈីបឯណោះវិញ ក៏ទំនងជាផ្ដល់ភាពតានតឹង ផ្នែកពាណិជ្ជកម្មកាន់តែខ្លាំង។ អាមេរិក ដែលមានបំណងចង់ក្លាយជាអ្នកផលិតបន្ទះឈីបជាមួយ បច្ចេកវិទ្យាទំនើបបំផុតនោះ នឹងត្រូវប្រកួតប្រជែងជាមួយចិន ដែលកំពុងតាមប្រកិតពីក្រោយ។

ជារើយៗ ភាគីទាំងពីតែងមានជម្លោះលើបច្ចេកវិទ្យាផលិតបន្ទះឈីប។ ជាក់ស្ដែងថ្មីៗនេះ​ អាមេរិកបាន រិតបន្តឹងការនាំចេញបន្ទះឈីបទៅកាន់ប្រទេសចិន ខណៈដែលចិនកំពុងសិក្សា​ពីបច្ចេកវិទ្យារបស់​អេមេរិក សំដៅសម្រេចមហិច្ឆតាក្លាយ​ជាមហាអំណាចបន្ទះឈីបនៅលើ​ពិភពលោក៕

ប្រភព៖ The Straits Times Expect more turbulence for US and China in 2024