ភ្នំពេញ៖ក្នុងការចាប់ឆ្នោតកំណត់លំដាប់លេខរៀងរបស់គណ បក្ស នយោបាយដែលបានឈរឈ្មោះបោះឆ្នោត ជ្រើសតាំង សមាជិក ព្រឹទ្ធសភា នីតិកាលទី៥ខាងមុខ គណបក្សប្រជាជនកម្ពុជា ទទួល បានលេខរៀងទី១ លើសន្លឹកឆ្នោត ក្នុងពិធីចាប់ឆ្នោតដែល បានធ្វើឡើង នាព្រឹកថ្ងៃទី ២៨ ខែធ្នូ ឆ្នាំ ២០២៣ ដោយ គណៈម្មាធិការជាតិរៀបចំ ការបោះឆ្នោត(គ.ជ.ប) ក្រោមអធិបតីភាពឯកឧត្តម ប្រាជ្ញ ចន្ទ ប្រធានគ.ជ.ប និងចាប់ឆ្នោតដោយសម្តេចព្រះសង្ឃរាជ ទាំងពីរ គណៈ។

លទ្ធផលក្នុងការចាប់ឆ្នោតនេះគឺ គណបក្សប្រជាជនកម្ពុជា ទទួល បានលេខរៀងទី១ ,គណបក្សឆន្ទៈខ្មែរ បានលេខរៀងទី២ ,គណបក្សហ្វ៊ុនស៊ិនប៉ិច, លេខរៀងទី៣ និង គណកប្សកម្លាំង ជាតិលេខរៀងទី៤។

ឯកឧត្តម ប្រាជ្ញ ចន្ទ ប្រធានគណៈកម្មាធិការជាតិរៀបចំការបោះឆ្នោត បាន ថ្លែងក្នុងពិធីនេះថា ការចុះបញ្ជីគណបក្សនយោបាយឈរ ឈ្មោះ បោះឆ្នោត និងបញ្ជីបេក្ខជនឈរឈ្មោះបានបញ្ចប់ រួចហើយ ដោយ មានគណបក្សនយោបាយចំនួន បួនចូលរួមប្រកួតប្រជែង រួមមាន៖១- គណបក្សប្រជាជនកម្ពុជា ឈរឈ្មោះ ៨ មណ្ឌលភូមិភាគ លើ ៨ មណ្ឌលភូមិភាគ (គ្រប់មណ្ឌលភូមិភាគ)។២- គណបក្ស ឆន្ទៈខ្មែរ ឈរឈ្មោះ ៨ មណ្ឌលភូមិភាគ លើ ៨ មណ្ឌលភូមិភាគ (គ្រប់មណ្ឌល ភូមិភាគ)។ ៣- គណបក្ស កម្លាំងជាតិ ឈរឈ្មោះ ៨ មណ្ឌលភូមិភាគ លើ ៨ មណ្ឌលភូមិភាគ (គ្រប់មណ្ឌលភូមិភាគ)និង៤- គណបក្ស ហ៊្វុនស៊ិនប៉ិច ឈរឈ្មោះ ៨ មណ្ឌលភូមិភាគ លើ ៨ មណ្ឌលភូមិភាគ (គ្រប់មណ្ឌលភូមិភាគ)។

ឯកឧត្តមបន្តថារីឯការចុះឈ្មោះអ្នកបោះឆ្នោត និងអង្គបោះឆ្នោត ដើម្បីរៀបចំបញ្ជីបោះឆ្នោតសម្រាប់ប្រើប្រាស់ ក្នុងការបោះឆ្នោត ជ្រើសតាំងសមាជិកព្រឹទ្ធសភា នីតិកាលទី៥ គណៈកម្មាធិការជាតិ រៀបចំការបោះឆ្នោត បានទទួលរួចនូវបញ្ជីឈ្មោះតំណាងរាស្រ្ត ក្នុង តំណែង និងសមាជិកក្រុមប្រឹក្សាឃុំ សង្កាត់ទាំងអស់ក្នុងតំណែង ដែលមានអ្នកបោះឆ្នោតសរុប ១១,៧៤៧ នាក់ ។ ផ្អែកតាមប្រតិទិននៃការបោះឆ្នោត គណៈកម្មាធិការជាតិរៀបចំការបោះ ឆ្នោតនឹងធ្វើការបិទផ្សាយបញ្ជីបោះឆ្នោតដំបូង នៅថ្ងៃទី៥ ខែមករា ឆ្នាំ២០២៤ ក្នុងគោលបំណងបម្រើឱ្យការប្តឹងតវ៉ា ឬប្តឹងជំទាស់ បន្ទាប់មក គណៈកម្មាធិការជាតិរៀបចំការបោះឆ្នោតនឹងផ្តល់ សុពលភាព លើបញ្ជីបោះឆ្នោតផ្លូវការ នៅថ្ងៃទី៩ ខែកុម្ភៈ ឆ្នាំ២០២៤ ខាងមុខនេះ។

គួរបញ្ជាក់ថា ការបោះឆ្នោតជ្រើសតាំងសមាជិកព្រឹទ្ធសភា នីតិកាលទី៥ នឹងធ្វើឡើងនៅថ្ងៃទី២៥ ខែកុម្ភៈ ឆ្នាំ២០២៤ ខាងមុខ៕

អត្ថបទ៖ម៉ាដេប៉ូ,រូបភាព៖គ្រីសម្បត្តិ