(ភ្នំពេញ)៖ ស្មារតីនៃការកែទម្រង់ គឺត្រូវប្រកាន់ខ្ជាប់នូវអភិក្រមទាំង ៥ប្រការ គឺ៖ ឆ្លុះកញ្ចក់ ងូតទឹក ដុសក្អែល ព្យាបាល និងវះកាត់ ។ នេះជាការលើកឡើងរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ក្នុងពិធីបិទកិច្ចប្រជុំត្រួតពិនិត្យប្រចាំឆ្នាំ២០២៣ នៃការអនុវត្តកម្មវិធីកែទម្រង់ការគ្រប់គ្រងហិរញ្ញវត្ថុសាធារណៈ ដំណាក់កាលទី៤ នៅព្រឹកថ្ងៃពុធ ទី១៤ ខែកុម្ភៈ ឆ្នាំ២០២៤ ។

សម្តេចធិបតី ហ៊ុន ម៉ាណែត បានថ្លែងថា ចំពោះកិច្ចការកែទម្រង់ដែលជោគជ័យ គឺត្រូវផ្អែកលើ កត្តាសំខាន់បួន រួមមាន ៖ ១-ត្រូវមានចក្ខុវិស័យច្បាស់លាស់ ២- ត្រូវមានការប្តេជ្ញាចិត្តខ្ពស់ ៣- ត្រូវមានការចូលរួមដោយស្មោះត្រង់ និង ៤-ត្រូវមានការលះបង់ក្នុងការងារ ។

សម្តេចធិបតី បានថ្លែងបន្តថា រាជរដ្ឋាភិបាលនីតិកាលទី៧ នឹងបន្តជ្រោងទង់កាន់តែខ្ពស់នូវ «ស្មារតីនៃការកែទម្រង់» និងនៅតែប្រកាន់ខ្ជាប់ នូវអភិក្រមទាំង៥ប្រការ របស់សម្តេចតេជោ ហ៊ុន សែន អតីតនាយករដ្ឋមន្ត្រី សម្រាប់ការបំពេញការងារ ដែលជាស្មារតីបុរេសកម្ម ភ្ញាក់រលឹក និងម៉ឺងម៉ាត់ក្នុងការកែទម្រង់មុតស្រួច ស៊ីជម្រៅ និងគ្រប់ជ្រុងជ្រោយ ពោលគឺ ៖ ឆ្លុះកញ្ចក់ ងូតទឹក ដុសក្អែល ព្យាបាល និងវះកាត់ ដើម្បីពង្រឹងប្រសិទ្ធភាពការងារឱ្យកាន់តែរីកចម្រើនថែមទៀត ។

ជាមួយគ្នានេះ សម្តេចធិបតី ហ៊ុន ម៉ាណែត បានលើកឡើងថា រាជរដ្ឋាភិបាល មិនបានរង់ចាំសន្តិភាពឱ្យបរិបូរណ៍ពេញផ្ទៃប្រទេស ទើបចាប់ផ្តើមកិច្ចការកែទម្រង់ហិរញ្ញវត្ថុសាធារណៈនោះទេ។ សម្តេច បានបន្តថា ផ្ទុយមកវិញ ដោយតម្កល់ឧត្តមប្រយោជន៍ជាតិជាធំ រាជរដ្ឋាភិបាល បានចាប់ផ្តើមធ្វើការកែទម្រង់លើគោលនយោបាយរបស់កម្ពុជាជាបន្តបន្ទាប់ ។

សម្តេចធិបតី នាយករដ្ឋមន្ត្រី បានបន្ថែមថា រាជរដ្ឋាភិបាល បានចាប់ផ្តើមធ្វើការកែទម្រង់ ដោយផ្អែកលើអាទិភាពបន្ទាន់ទាំងឡាយ ស្របតាមកាលៈទេសៈនៃសម័យកាលនីមួយៗ ចាប់តាំងពីក្រោយការដួលរលំនៃរបបប្រល័យពូជសាសន៍មកម្ល៉េះ។ យ៉ាងណាមិញ សុខសន្តិភាព ស្ថិរភាពនយោបាយ និងការឯកភាពជាតិពេញលេញលើផ្ទៃប្រទេស ដែលសម្រេចបានមកដោយលំបាកបំផុត បានផ្តល់ឱកាសអោយកែលំអរ និងស្ថាបនាបន្ថែមទៀត លើប្រព័ន្ធអភិបាលកិច្ចតាមរយៈការរៀបចំការងារកែទម្រង់ហិរញ្ញវត្ថុសាធារណៈនៅក្នុងប្រព័ន្ធដែលមានកម្មវិធីរយៈពេលវែង នៅក្នុងការកំណត់ចក្ខុវិស័យវែងឆ្ងាយ ៕

អត្ថបទ ៖ វណ្ណលុក
អត្ថបទ ៖ វណ្ណលុក, រូបភាព ៖ វ៉េង លីមហួត