រថភ្លើងសណ្តោងដឹកប្រេង បានបុករថយន្តមួយគ្រឿងផ្ទុកមនុស្ស ៥នាក់ ខណៈកំពុងធ្វើដំណើរឆ្លងឆ្លងកាត់ផ្លូវនៅក្នុងខេត្តពោធិ៍សាត់។ ហេតុការណ៍បានកើតឡើងនារសៀលម៉ោង៤ និង២០នាទី ថ្ងៃទី១៩កុម្ភៈ ស្ថិតនៅភូមិក្រពើរោទិ៍, ឃុំស្នាមព្រះ នៃស្រុកបាកាន។

សាក្សីបាននិយាយថា មុនពេលកើតហេតុគេបានឮស្នូរស៊ីប្លេរថភ្លើងបន្លឺឱ្យយានយន្តឆ្លងកាត់ទាំងឡាយ ត្រូវប្រុងប្រយ័ត្នពេលកំពុងធ្វើដំណើរមកដល់កន្លែងឆ្លងកាត់ ប៉ុន្តែរថយន្តហ៊ីយុនដាយមួយគ្រឿងស្លាក លេខព្រះសីហនុ 3A-8596 ផ្ទុកមនុស្ស ៥នាក់ នៅតែបន្តបើកឆ្លងកាត់ផ្លូវទន្ទឹមនឹងរថភ្លើងបានមកដល់។

មនុស្សបួននាក់រងរបួសធ្ងន់ និងម្នាក់រងរបួសស្រាលក្នុងហេតុការណ៍រថភ្លើងបុករថយន្តនោះ។ ក្នុងហេតុការណ៍នោះ រថយន្តត្រូវបានរក្សាទុក ប៉ុន្តែរថភ្លើងមិនបានឃាត់ទុកឡើយ ដោយគ្រាន់តែទុកលេខទូរស័ព្ទសម្រាប់ទាក់ទង។