លោក ស្រ៊ុន លាង៖ បញ្ជូនអត្តពលិកទៅចូលរួមហ្វឹកហាត់និងប្រកួតនៅថៃ ជាឱកាសត្រៀមប្រជែងមេដាយស៊ីហ្គេមនៅថៃ
ភ្នំពេញ៖ កីឡាករទូកវ័យក្មេង២រូបនិងគ្រូបង្វឹក១រូប នាព្រឹកថ្ងៃទី២៨ ខែ កុម្ភៈ ឆ្នាំ២០២៤ បានចេញដំណើរពីប្រទេសកម្ពុជាទៅកាន់ខេត្ត រ៉ាក់យ៉ង ប្រទេសថៃ ចូលរួមក្នុងកម្មវិធី បោះ ជំរុំហ្វឹកហាត់និងចូលរួមការប្រកួតកីឡាទូកកានូស្លាលុំជ្រើសរើសជើងឯកអាស៊ីលើកទី១៣ (13th Asian Canoe Slalom Champinoshipe)ចាប់ពីថ្ងៃទី២៨ ខែកុម្ភៈ ដល់ថ្ងៃ ទី១០ ខែមីនា ឆ្នាំ២០២៤។
ថ្លែងបញ្ជាក់ក្នុងឱកាសជូនដំណើរ នានៅកាសយានដ្ឋានអន្តរជាតិភ្នំពេញ លោក ស្រ៊ុន លាង អគ្គលេខាធិការរង សហព័ន្ធកីឡាទូកកានូ និងរ៉ូអ៊ីងកម្ពុជា បានឲ្យដឹងថា កម្មវិធីបោះជំរុំហ្វឹក ហាត់ និងចូលរួមការប្រកួតនេះ គឺជាកម្មវិធីឧបត្ថម្ភដោយសហព័ន្ធកីឡាទូកអាស៊ី ដើម្បីចូល រួមអភិវឌ្ឍកីឡាទូកកានូស្លាលុំ ដែលជាប្រភេទទូកប្រកួតនៅក្នុងចរន្តទឹកហូ។
លោកថា ការដែលសហព័ន្ធបញ្ជូនកីឡាករថ្នាលវ័យក្មេង២រូបនេះ ចូលរួមហ្វឹកហាត់ និងប្រ កួត ជាមួយប្រភេទទូកថ្មីដែលកម្ពុជាមិនដែលចូលរួមនេះ ព្រោះយើងចង់ឲ្យកីឡាករ ទទួល បានបទពិសោធន៍បច្ចេកទេស និងស្គាល់អំពីច្បាប់នៃការប្រកួតចូលរួមលក្ខណៈអន្តរជាតិ ដើម្បីត្រៀមខ្លួនចូលរួមព្រឹត្តិការណ៍ប្រកួតអន្តរជាតិផ្សេងៗទៀតនៅពេលខាងមុខ។
អគ្គលេខាធិការរងខាងលើ បានអះអាងថា ចំពោះកម្ពុជាថ្វីត្បិតយើងពុំទាន់មានទីតាំង សម្រាប់ ហ្វឹកហាត់និងប្រកួតដូចប្រទេសថៃយ៉ាងណាក្តី បន្តែយើងត្រូវតែចូលរួមហ្វឹកហាត់ និងប្រកួត ព្រោះ ប្រភេទវិញ្ញសាទូកកានូស្លាលុំនេះនឹងដាក់ឲ្យប្រកួតប្រជែង ក្នុងព្រឹត្តិការណ៍ កីឡាស៊ីហ្គេម លើកទី៣៣ ដែលប្រទេសថៃទទួលធ្វើជាម្ចាស់ផ្ទះ។ដូច្នោះហើយ វិញ្ញាថ្វីដែល ជាវិញ្ញាថ្មី វាជាឱកាសរបស់កម្ពុជាយើង ក្នុងការប្រជែងដណ្តើមមេដាយជូនជាតិ។
ឯកឧត្តម នាវីទោ ចាយ ស៊ីជឿន អគ្គលេខាធិការរងសហព័ន្ធ និងជាអ្នកទទួលបន្ទុក ដឹកនាំ កីឡាកងទ័ពជើងទឹក បានមានប្រសាសន៍ថា សម្រាប់កងទ័ពជើងទឹក គឺសប្បាយចិត្តណាស់ ដែលកីឡាករថ្នាលរបស់អង្គភាពទទួលបានឱកាសចូលរួមហ្វឹកហាត់ ព្រោះវិញ្ញសានេះ ជា វិញ្ញ សាថ្មីសម្រាប់កម្ពុជា ។ ការដែលពួកគេមានឱកាសបានទៅហ្វឹកហាត់និងប្រកួតនេះ នឹងទទួលបានបទពិសោធន៍ល្អនាំមកចែករំលែកដល់កីឡាករដែលមិនបានចូលរួម។
សូមបញ្ជាក់ថា កីឡាករ២រូប មានឈ្មោះ កីឡាករ ចាន់ សុផៃ កីឡាករកងដាវីត និងគ្រូបង្វឹក លោក គឹម សិរីមង្គល ពួកគេទាំង៣រូបនេះ នឹងត្រូវចូលរួមបោះជំរុំហ្វឹកហាត់ និងចូលរួមការ ប្រកួតកីឡាទូកកានូស្លាលុំជ្រើសរើសជើងឯកអាស៊ីលើកទី១៣ (13th Asian Canoe Slalom Champinoshipe) ដែលនឹងប្រព្រឹត្តទៅចាប់ពីថ្ងៃទី២៨ ខែកុម្ភៈ ដល់ថ្ងៃទី១០ ខែមីនា ឆ្នាំ២០២៤ នៅខេត្ត រ៉ាក់យ៉ង ប្រទេសថៃ៕
រូបភាព ៖ ជីភារ៉ា
អត្ថបទ៖ជាវ ចន្ធូ
